月經時性交/口交

請問來m果時,可以性交嗎?有沒有一些要注意呢?

另外可以口交嗎?食到經血會有問題嗎?

聽到話高潮可以緩解經痛,係咪真嘅呢?

下面個網頁講關於月經時做嘅係咪正確ga? 謝謝

來經時進行性交,最緊要都係要記得性感染疾病(Sexually Transmitted Infections, STI),例如愛滋病病毒(HIV),係能夠血液及體液傳播 :sweat_drops:。所以無論進行性交或口交,都建議使用番阻隔式嘅工具,例如安全套或口交膜等,避免同彼此血液/體液有直接接觸 :blush:

同埋都要記得要留意/提醒對方有無使用棉條作月事用品 :drop_of_blood:。如果一時唔記得左取出棉條先發生性行為,係有機會令棉條進入陰道更深嘅位置後,難以取出,咁到時就有需要搵醫生協助取出棉條 :persevere: :persevere:

亦要知道月經期間進行無套性交,係依然有懷孕嘅風險 :face_with_hand_over_mouth:。因為精子能夠於陰道內生存2-3日,對於月經週期較短(例如22日)嘅女性黎講,有機會月經期間/月經後精子存活時就已經遇上排卵日,讓精子有機會與卵子結合成受精卵,導致懷孕。

的確高潮係有機會幫助紓緩經痛。經痛係源於子宮透過收縮,排出子宮內膜,形成經血。高潮期間子宮嘅肌肉亦會同時收縮,有助紓緩經痛。而性交過程中,本身亦能釋放令人愉悅嘅安多芬(Endorphines)。思想集中於性行為嘅時候,亦有助消除本身經痛嘅不適感覺。

亦都建議性行為期間,鋪番條毛巾(建議係深色)於床上,又或者沖涼期間發生性行為,保持環境衛生。同埋如果常用嘅體位對象有感到不適時,亦需考慮嘗試轉其他感覺較舒服嘅體位啊 :wink:

參考:
Watson, S. (2018, April 13). Is It Safe to Have Sex During Your Period? Tips, Benefits, and Side Effects. Healthline. Retrieved from: https://www.healthline.com/health/womens-health/sex-during-periods#takeaway

謝謝你,咁即是說其實係可以嘅,但要安全套就會無咁易感染細菌嗎?

可以多問下,女朋友做到中間覺尿急,係興奮,定有感染呢?我地應該繼續定停好呢?

我怕停又失咗佢高潮機會,但佢又話個感覺未試過,怪怪地,所以最後停咗

無錯,月經期間發生性行為,戴番安全套都已經可以避免性病傳播風險,以及減低懷孕嘅風險 :relaxed:

性行為期間覺得有尿意係屬於正常嘅情況 :wink:。因為陰蒂、陰道、尿道的位置都好接近,所以有時刺激其中一個地方嘅時候,都會帶動其他部位有反應,所以性行為過程中有機會因為壓到膀胱或者子宮,產生尿意。有時部分嘅性姿勢(例如傳教士式)都會比較容易壓到膀胱嘅位置,所以透過轉姿勢(例如轉做女上男下嘅姿勢),都可能會有助減低尿急嘅感覺。

尿道嘅附近亦有另一個組織,叫做尿道海綿體,當受到性刺激,組織膨脹同埋敏感嘅時候,都有機會壓到附近嘅尿道位置,產生尿意嘅錯覺。另外,性行為時盆骨底肌肉亦有機會刺激到附近嘅尿道、膀胱組織。

有部分人會覺得差不多高潮嘅時候,都會同尿急嘅感覺好似,因為兩者都係肌肉收縮緊。所以一般都會建議性行為之前去一去廁所排尿 :sweat_drops:,咁性行為嘅過程中,就會比較容易分辨到自己係就快高潮,還是尿急 :wink:

如果對方覺得呢種尿急嘅感覺對佢黎講,係依然可以接受嘅,咁都可以選擇繼續。不過如果對方覺得呢種尿急嘅感覺對佢黎講,都係唔太舒服,都建議暫停一下,等待對方排尿後,再考慮係咪繼續發生性行為 :blush:。因為如果於性行為過程中過分抑制排尿,其實都會影響膀胱嘅健康,有機會發展成尿道/膀胱炎。