男朋友抑鬱症 好無安全感

同男朋友一齊左一個月,知道左佢有抑鬱症,有睇醫生食藥,所以平時都控制到,但目前為止我未見過佢病發嘅時候,好驚自己會接受唔到,唔敢肯定自己有足夠能耐可以繼續落去。而且佢家庭背景好複雜,幾乎無屋企,驚自己屋企人唔接受佢。所以成日覺得自己同佢好無將來,唔知大家係唔係真係適合。

佢係同我一齊之前曾經同一個女仔同居好似情侶地相處但無確立關係,佢解釋係因為兩個人都有抑鬱症,對方好明白自己就發展成咁,後來知道呢種關係唔健康,所以撇清左之後先同我一齊。但我有時自己諗諗下仲係好介意呢件事,對佢無信心,覺得無安全感。前幾日又發現佢instagram close friend list無我,我問佢佢話個list只add男人,但之後佢又話add左一個女仔,雖然我都識個個女仔,知道佢地真係無野,但始終有啲唔開心,原因係我覺得佢一定係有野唔想比我知或者驚我接受唔到,所以唔add我。

呢個月以來佢唔係對我唔我,但又無特別對我好,簡單講就係無令我感受到自己有女朋友身分,我唔知係唔係佢有抑鬱症,未必咁擅長表達自己?但咁樣真係令我好無安全感好難享受戀愛。

sorry可能有啲亂,希望大家睇得明啦。

Hello @wing11 :relaxed: :wave:t2: 如果男朋友有按醫生指示覆診,並有依時定時服藥,咁藥物方面對抑鬱症嘅病情控制上應該都會有所成效,而發病嘅機會都係比較低嘅,無需太擔心 :blush:

抑鬱症嘅患者一般其實都知道自己情緒低落,但係無奈病情嘅影響,讓佢地難以走出呢個無助、低自尊、或者不斷責怪自己嘅漩渦之中。如果你真係好擔心唔知對方病發嘅時候,自己唔識應對,或者擔心接受唔到的話,其實都可以嘗試向男朋友表示自己有呢方面嘅憂慮,問對方假如真係發病嘅時候,就佢對自己病情嘅認識,到時候可能出現D咩嘅狀況,而你又可以點樣幫助或者陪伴佢去渡過呢個難關 :blush:,例如陪佢去搵專業人士尋求協助(如精神科醫生、社工、輔導員等),以及適當嘅陪伴 :two_hearts:。或者當男朋友有時好需要比人陪伴嘅時候,而你亦覺得自己無辦法去經常陪伴對方/持續承載對方嘅情緒嘅時候,亦記得你係可以搵support,例如搵男朋友可信任嘅朋友去陪伴佢啊 :wink: :heart:

撇除抑鬱症方面,其實從文字中都感受到你覺得呢段關係之中,缺乏左安全感,同埋都難以想像同對方嘅未來 :pleading_face:

首先,安全感方面,如果對方都好清楚自己唔會再想同之前該位同居嘅女仔發展,亦都係鍾意你的話,咁都無需太擔心對方會離開你 :relaxed:。交往初期,好在意男朋友過往同其他女仔發生過嘅感情事,都係正常嘅。有時可能都的確需要透過同男朋友多少少嘅相處,製造多D共同回憶,讓你感受到你在對方心中嘅獨特性及重要性,咁樣對於維持一段關係都係有幫助,亦都會讓你對佢有多點信心 :smiling_face_with_three_hearts:

Close friend list無加伴侶,對於部分人黎講,都有機會係擔心伴侶知道之後會過分擔心自己,又或者擔心會影響自己在伴侶面前所塑造嘅理想形象 :see_no_evil: :hear_no_evil:。又或者都有機會,可能對方都希望有一個空間,可以暢所欲言,向摯友分享自己在感情、親情、生活上嘅煩惱。咁樣未必等於對方唔鍾意自己,或者信唔過自己,只係每個人就住唔同嘅事情/煩惱,都可能會有自己習慣分享嘅對象 :two_hearts:。例如有人鍾意向伴侶分享工作交友上嘅煩惱、向朋友分享感情上嘅煩惱、向家人分享自己對未來生活安排嘅煩惱等,每個人嘅習慣喜好都未必一樣。假如你真係好在意的話,其實都可以考慮同男朋友表達你對只向close friend顯示嘅post感到好奇,以及在意自己點解不在list之中,內心都好希望能夠更了解有關男朋友嘅事情 :heart:。聽下男朋友點樣回覆先都可以啊 :wink: :blush:

有時未必係同抑鬱症有關,每個人表達自己嘅方式都唔同,有人可能好容易或者願意直接透過言語表達自己嘅感受,亦有人可能需要透過觀察生活細節,先知道對方嘅想法或者感受對方嘅愛。而暫時交往左一個月,話唔定對方亦需要時間磨合或者希望透過相處進一步認識你多D先,再慢慢投放更多感情於關係之中

有時現實嘅環境確實都會好影響自己想像與對方嘅將來,例如雙方嘅家庭背景、經濟狀況、健康、彼此對關係嘅期望有差異等。未必每一段關係,都能夠透過彼此磨合溝通,就一定可以跨越這些現實環境帶來嘅限制或困難。不過如果你都清楚暫時自己都有一顆愛對方嘅心 :heart: :hear_no_evil:,而對方亦希望與你在人生路上再向前走多一步,或者多幾步的話 :revolving_hearts:,都可以先放眼現在,一齊睇睇現階段有咩方式可以讓你更感受到安全感、一齊感受戀愛嘅感覺,或者點樣面對相處上嘅困難先啊

最後,你都可以諗下你於呢段關係之中希望得到嘅係D咩,而雙方係咪都係適合彼此嘅伴侶。亦可以嘗試先為自己設定一D嘅界線,例如有無咩嘅情況發生,你都知道自己未必ok,或者心理上未必能夠承受,可能連自己都take care不到自己嘅情緒 :heart:例如情緒方面嘅界線,雖然情侶之間,照顧對方嘅感受都係重要嘅。但係亦要緊記,對方嘅情緒你係無辦法控制,而你地亦只能為自己嘅情緒同埋行為負責。覺得自己情緒都被對方牽動到,讓自己都覺得照顧唔到自己嘅時候,就記得需要適當地抽離番,甚至分開一下 :pleading_face:,等自己狀況調整好,先有機會有心力去照顧對方。如果交往第一個月都已經讓你有咁多唔開心、或者唔舒服擔憂嘅感覺,都好建議同伴侶好好傾下磨合。而如果過多一段時間情況都係持續的話,有時分開對於兩個人黎講未必一定係一件壞事。反而有時雙方勉強自己互相遷就的話,可能對彼此嘅傷害亦會更大 :pensive: