關於皰疹,點算好

好後悔
呢排生唇瘡,早兩日幫男朋友口交(當時傷口冇出水),以為冇問題啦。點知上網睇翻好易會傳染人。
而家好擔心佢會俾我傳染到唇瘡同生殖器會有皰疹。咁咪即係性病?佢而家係咪有極高感染率?呢啲病冇得斷尾。我好後悔,如果佢因為咁而有病我會內疚一世。

Hello~ 首先想你知道並唔係所有唇瘡都係由皰疹病毒造成,有機會係因為咬損左個嘴而感染細菌所致,或者生活壓力大亦都有機會引發唇瘡,因為皰疹本身有分一型同二型,一型主要係集中影響上半身嘅部位,所以比較常見係出現喺嘴附近嘅範圍,而且因爲好多時係透過母嬰感染傳播,所以好多時係喺幼年嘅時候就出現病徵; 而二型嘅病毒主要會影響生殖器官,所以陰部皰疹等性病一般都係由二型嘅病毒造成。如果你嗰粒唇瘡係近期先有嘅話,而出現之前又無發生過性行為嘅話,就好大機會唔係由皰疹病毒所引起架啦 :blush:

不過如果係患有一型皰疹嘅話,的確有機會透過口交傳染俾對方嘅性器官,令對方嘅性器官出現病徵,但要留意嘅係對方感染嘅係一型皰疹而唔係二型,所以並唔係頭先所講嘅陰部皰疹。但係因為無論有無患有皰疹,有唇瘡(尤其係水泡有破損嘅時候)都存在細菌傳播嘅風險,所以並唔建議依個情況下進行接吻、口交等直接接觸唇瘡嘅行為。

一般嘅唇瘡可以透過搽藥膏、保持個人衛生同埋調整生活作息時間等治癒,而平日如果想加強口交時嘅保障嘅話,亦都可以採用返口交套/安全套/口交膜等阻隔病毒嘅安全措施,咁就唔洗咁擔心啦 :blush:

想問一型同二型除咗生嘅位置唔同之外仲有咩分別?:pray:t2:上網睇話兩隻差不多,仲話可能會小便會痛之類,好擔心佢會俾我惹到

同埋我呢幾年嚟都keep住會耐唔耐生唇瘡,所以我覺得應該係hsv1嚟。不過佢係第一個同我有性接觸嘅人,touch wood我哋應該都冇二型

皰疹一型同二型其實無特定生嘅位置,雖然一般黎講一型主要係生喺口部,而二型主要係生喺陰部,但係透過口交,一型都可以令陰部出現皰疹,而二型都可以令口部出現皰疹。至於感染後嘅主要病徵包括性器官或肛門位置刺痛、痕癢、出現細小嘅水泡,水泡爆破後會留低帶痛楚嘅傷口,為期2至3星期,期間尿液流經會感到痛楚,出現感冒徵狀,如頭痛、背痛、淋巴結腫脹或發燒。

就好似我上一個回覆咁講,皰疹一型通常係幼兒期嘅時候已經開始出現病徵,所以如果你係依幾年先開始出現唇瘡嘅話,唔一定係皰疹一型。另外,雖然伴侶係第一個同你有性接觸嘅人,但係如果伴侶本身患有皰疹一型/二型嘅話,都有機僧透過性接觸傳染俾你,所以為左健康著想同埋唔洗估估下咁擔心,建議去睇醫生評估返身體狀況,你可以到衞生署嘅
社會衞生科診所做檢查,服務唔需要預約,而且香港永久性居民去做檢查係免費嘅,有關診所嘅地址同營業時間可以參閱以下網址:https://www.dh.gov.hk/textonly/tc_chi/tele/tele_chc/tele_chc_shcf.html
你亦都可以先到私家診所了解下唇瘡嘅情況先決定要唔要去做檢查 :blush: