今日同男朋友發生行為個陣,去到最尾個套係入面"sip"住咗,啲精好似漏咗出黎,我之前已經食咗4次事後,唔知依家應唔應該再食,因為都咦好接近嚟月經嘅時間. 上一次月經係24號, 平時都係會遲2~3日.咁樣嘅情況應唔應該再食事後? 唔該曬你地
你好呀 @leelomay 
我想知道你嘅意思係咪個套最後嘅時候留咗係陰道裡面，但係陰莖就抽咗出嚟？如果係嘅話，有三種情況：
第一，就係安全套嘅尺寸過大，係抽插嘅過程裡面唔小心滑出。安全套嘅闊度一般都有分M size、L size、XL size等唔同尺寸，一般以mm為單位（例如52mm ± 2mm）。如果過往買安全套之前，都未試過度陰莖尺寸的話，建議可以先度度陰莖嘅圓周量度嘅方法，就係當陰莖勃起嘅時候，可以用一個卷尺（或類似嘅物件，如繩），圍陰莖一圈，去得出陰莖嘅圓周。然後將 圓周除2，就係安全套所指嘅闊度 。因為安全套係有彈性，所以就可以選擇比實際尺寸細少少嘅安全套款式，比較可以避免安全套滑落嘅情況。 
第二，就係陰莖係射精後無即刻就抽出陰道，依然留係陰道裡面，直到疲軟先抽出，就會容易將安全套遺留係陰道裡面啦。其實射精後就要即刻壓住陰莖底部嘅安全套抽出陰道，咁樣先可以避免到安全套裡面嘅精液倒流出嚟，掂到陰道架。 
第三，就係去到最後，陰道可能會比較乾，所以會吸實咗安全套，而安全套裡面有精液就比較滑一啲，好容易就滑咗出嚟。如果係呢個情況嘅話，建議你下一次可以按實安全套嘅根部再將陰莖拔出嚟，就可以避免精液流出架啦。 
另外你話你食咗四次事後丸，想知道你中間隔咗幾耐呀？其實一般嘅緊急避孕藥係唔可以係同一個月經週期裡面食兩次嘅，月經週期就係有月經開始嘅第一日去到下一次月經嚟嘅第一日嘅日數，係呢中間嘅時間你只可以食一次緊急避孕藥嘅。 
如果你對上果四次都係喺月經週期內只係食咗一次，而今個月經週期都無食到嘅話，都建議你去搵醫生開藥俾你食嘅。仲有仲有，緊急避孕藥係香港嚟講都係處方嘅藥物嚟，因為佢係一個好大劑量嘅荷爾蒙藥物，都要經過醫生評估先可以判斷到啱唔啱你身體嘅情況架。 
同埋都建議你地約家計會醫生幫下你，如果你係26歲以下，咁你就需要打電話去家計會度預約嘅，26歲以上就直接入家計會登記就可以架啦。
睇返你咁講，平時都係會遲2-3日，其實都唔洗咁擔心住，因為擔心嘅情緒同食藥呀、生活作息嘅改變等等都會影響到月經週期嘅。
如果真係好擔心，都可以買驗孕棒驗孕嘅，最佳使用時間一般是預計受精時間11日之後，但其實最快可以在性行為後7日或預期經期開始那天進行檢驗。只要你跟足說明書上面嘅指引正確咁使用驗孕棒，其實個結果都可信架啦。 
見你好似成日食事後避孕藥咁，都知道可能係用避孕套嘅時候都好唔小心，都會擔心，但事後避孕藥係一個高劑量荷爾蒙劑量嘅藥物，都唔建議用嚟做恆常嘅避孕嘅方法嘅。除咗要增進下如何使用安全套以外，你會唔會係用安全套以外都考慮用其他嘅荷爾蒙避孕方法，例如避孕藥、避孕針等等，再加埋使用安全套，咁就更加放心啦。
因為4次食, 有兩次係穿咗,有兩次係sip 咗入去,其實就今次呢個情況我仲有幾日就嚟m 係咪其實可以唔食都可以? 因為對上一次食好似係年頭, 最主要驚食咁多真係會好傷,就今次黎講 應該係無漏入去嘅,但就應該有掂到外陰,我有google 過好似話啲精掂到皮膚就會死亡
雖然可能過幾日就會黎月經，但係始終月經週期有好多因素可以有影響，例如最近生活作息唔定時、情緒有起伏、壓力過大、最近病過有服藥（特別係抗生素）等，都有機會令月經來遲。所以都唔能夠知道今次嘅性行為會否有機會於排卵期期間發生 
。
上一次服用事後丸係年頭嘅事，咁今次服用事後丸應該都唔會有太大嘅影響，始終並非同一個月經週期服用兩次。如果你都肯定精液無漏入陰道內的話，咁你都可以視乎自己需要，睇睇有無需要去睇醫生諮詢一下醫生有無需要服用事後丸，還是只係留待之後進行驗孕。
精子接觸空氣後，的確一般會幾分鐘內就會失去活動能力死亡。接觸皮膚嘅表面亦會加快呢個過程。所以都提醒番並非精子一觸碰到皮膚就會馬上死亡，而係可能數分鐘內精子就會失去活動能力 
。
當然最後要唔要服用事後丸，決定權都係在你手上 
。雖然本身預計過多幾日就會黎月經，不過始終呢個只係預計嘅日子，如果到時於你預計嘅來經日子，發現月經都係未黎，你都可以想像一下，到時你會唔會因此而覺得好擔心，或者會有後悔嘅感覺 。如果覺得自己都承受得到呢個風險，係可以選擇唔服用是事後丸嘅 。只係暫時都未能100%肯定精液漏出嘅時候，係無流入陰道內，所以都依然係有風險嘅，覺得擔心的話，先睇醫生諮詢意見有無需要服用事後丸（提醒：事後丸最長服用時限為120小時），都係一個可行嘅選擇 。
最後，就好似 @Kaleo_StickyRiceLove 提及過咁，既然過往都曾經因為各種因為安全套嘅原因，而需要服用4次事後丸（2次sip左入去、2次穿左），咁其實都反映番現時用緊嘅安全套尺寸未必適合，或者性行為過程有地方出左問題（例如射精後陰莖無馬上抽出、潤滑劑不足等）。建議可以考慮選擇其他安全套尺寸，或使用其他款式嘅安全套。調整好相關因素之後，希望未來都能夠減低類似情況再次出現嘅機會啦 
又或者都可以考慮諮詢醫生意見，配合埋其他荷爾蒙避孕措施（例如避孕藥、避孕針）啊
我諗我應該過咗120小時啦… 唯有希望無事…另外呢,我都依家都仲未嚟m, 今日同前幾日都試過驗孕,都係一條線係咪代表有咗嘅機會唔大? 因為都係呢幾日先開始胸痛同肚漲
因為見26/11嘅post，都係寫「今日」，如果係26/11發生性行為的話，宜家應該未過事後丸最長服用時限120小時（5日）的。所以都想了解一下如果宜家已經過左120小時的話，其實實際發生性行為嘅日子，係大概邊一日 
？
因為發生性行為嘅日子，都會影響之後可以進行驗孕嘅日子。我地通常會建議性行為11日後進行驗孕，到時嘅結果會比較準確同埋可靠。而一般受精卵著床需要大概6-9日，所以好擔心的話，性行為7日後已經可以有初步嘅驗孕結果，不過性行為11日後進行驗孕就會較準確及可靠 。見你都有提及到今日同埋前幾日都有進行過驗孕，所以都要留意下到底當時驗孕嘅日子，係咪已經過左性行為11日後。否則，呢兩次／幾次嘅驗孕結果，都唔能夠視為有效而準確嘅驗孕結果。
如果有依足驗孕棒嘅說明書進行驗孕，而驗孕棒嘅結果，只有質控區C區有一條線，而結果區T區係空白的話，就係代表你無懷孕啦
胸漲、腹脹除左可能係懷孕初期徵兆之外，其實部分女性月經來潮之前都會有機會出現乳房脹痛以及腹脹嘅情況，所以都唔需要太擔心 其他常見嘅經前症狀，包括：頭痛、肌肉酸痛、容易疲倦等。經前症狀會因為每個人嘅身體嘅情況而有所唔同，唔係每一個女性，亦唔係每一次月經都會經歷經前症狀。
因為我依家唔hai香港,呢邊最多得72hours 嘅事後藥呀
如果係咁嘅情況嘅話，你可以了解下當地有無銅質子宮環緊急避孕嘅服務，因為子宮環除左可以用作恆常避孕之外，亦都可以喺性行為後五天內，由受過專業訓練嘅醫護人員將子宮環放入子宮內，透過銅質促使子宮內環境產生變化，影響精子嘅活動能力，減低卵子受精嘅機會，從而發揮緊急避孕嘅作用。留意配戴前必須由醫生作身體同盤腔檢查，以確定係唔係適合採用，因為例如有生殖器官異形、現患盤腔炎、嚴重經痛、經量多、不正常嘅陰道出血、嚴重貧血、患有風濕性心臟病、對銅質物體有過敏反應嘅婦女等都係唔適合使用子宮環嘅。