4月既時候有食避孕藥但因為副作用太嚴重
食過三個月都係有副作用
會頭痛 想嘔 情緒好低落
之後都有分泌物問題 見到有橙紅色 即刻去睇左醫生 又話無事
6月做過定期身體檢查 都無咩事
但就係唔適應避孕藥
因為始終唔想有小朋友
雖然每次都有戴安全套但都會有擔心
變相過程好難享受 同埋最近 好難先高潮
之前都唔會
攪到佢好似覺得大壓力
同埋最近有時會覺得痛 咁佢都無繼續
佢有無話不滿 但長期都咁 始終都唔好
想知點搵到合適既避孕藥 同埋點樣令佢無咁大壓力
Hello @Ku2345 
都想了解一下宜家有無繼續服用避孕藥？或者之前有無嘗試同醫生反映過副作用嘅問題，考慮轉其他牌子／款式嘅避孕藥，或者轉打避孕針？
而橙紅色分泌物方面，醫生當時有無話係因為咩原因所以出現？而果段時間你又有無服用過其他嘅藥物 ？
擔心安全套嘅懷孕風險方面，其實睇番數據，第一年使用安全套呢種避孕方法後， 意外懷孕機會為2％（perfect use，完全正確使用），同埋18％（typical use，一般使用）。 所以只要有正確戴好安全套，同埋透過使用潤滑劑減低安全套因摩擦而破損嘅機會，其實安全套嘅失敗率係好低嘅，無需太擔心 
。
的確安全套再另外配合埋荷爾蒙式避孕措施（例如口服避孕藥、避孕針）係可以進一步提升避孕方法，不過都建議再向醫生了解一下，係本身個人體質完全唔適合使用任何荷爾蒙式避孕措施，還是只係該款避孕藥內含嘅荷爾蒙唔適合你 
。因為每個牌子／款式嘅避孕藥內含有嘅荷爾蒙類型同埋劑量都會有唔同，有機會某部分避孕藥唔適合你嘅體質，係有機會引致嚴重嘅副作用。 亦建議同醫生反映宜家服用嘅果款避孕藥副作用方面嘅狀況，睇睇會唔會有其他牌子／款式嘅避孕藥比較合適 。
如果短期內都無懷孕嘅想法，都可以考慮使用無藥性嘅子宮環 。不過都留意番，配戴子宮環嘅過程，係屬於醫療程序嘅一種，所以係需要諮詢過醫生意見，同埋醫生進行過相關嘅體格檢查，確認你嘅身體係適合配戴子宮環，先可以進行嘅 。
建議可以去家計會預約醫生，了解一下醫生建議停藥嘅原因，同埋諮詢一下醫生嘅意見，睇睇邊一款避孕措施比較適合你嘅需要及體質 
。
透過掌握戴安全套嘅正確步驟，以及配合其他合適嘅避孕措施，都可以睇下會唔會都幫助到你放鬆心情，投入番去性生活之中 
如果對戴安全套嘅部分有任何疑問，都可以考慮睇睇我地嘅文章：
《Stickypedia系列－安全性行為：第一寶》安全套
https://www.instagram.com/p/B4EX0FVFLUf/
如果性行為過程中感到痛楚，亦都唔係一個理想嘅狀況 
。想了解一下痛嘅感覺，係源自於咩原因？例如潤滑度不足時摩擦帶黎嘅疼痛感、進入陰道時陰道口部分比較緊難放鬆，還是覺得頂到子宮頸嘅部份而覺得痛？建議可以嘗試配合潤滑劑黎減低因摩擦帶黎嘅疼痛感，或者花多少少時間落前戲嘅部分，令你比較容易放鬆心情及放鬆陰道口嘅肌肉 
。或者配合其他環境氣氛、音樂、潤滑劑嘅味道，都可能可以幫助你同男朋友放鬆一下彼此嘅心情。
都留意到你好擔心自己嘅身體狀況及憂慮，會為男朋友帶黎壓力 
。其實都可以搵個時機，同男朋友傾傾 
，了解一下男朋友嘅想法。亦都可以一齊搵方法減低性行為時嘅疼痛感，以及討論適合嘅安全措施啊 
。