同男朋友一直以嚟都有做足安全措施，正確使用安全套，亦會不時攞出嚟檢查下有冇破損，但係個人比較多疑，成日搞完都會好擔心，所以想做多一層保護，想問如果去打避孕針需唔需要18歲以上？係咪去家計會就可以打？如果用避孕環又有咩要求？
Hello @Xxxxyyyy 
如果係家計會的話，基本上打避孕針係無年齡上嘅限制。26歲以下嘅未婚女性可以去睇家計會青少年保健診所，而26歲或以上，或者已婚嘅女性，就可以去睇家計會節育指導診所 。
荷爾蒙式避孕措施（例如事前避孕藥、避孕針）一般都無年齡限制，因為呢類避孕措施嘅功能有時不單只係為左避孕，有唔少女仔可能會為左調節月經而選擇服用／注射呢類避孕措施 
見你都對年齡方面嘅限制，都有D好奇，都可以分享番正正因為部分女性有時有機會可能係為左調節經期而注射避孕針，所以即使年齡上未夠16歲嘅女性，其實家計會嘅醫生都係會開藥比佢地 所以就算你未夠18歲，都無需擔心啊～ 
如果你未夠16歲，而避孕功效都真係你注射避孕針嘅主要原因的話，咁可能到時醫生都會開藥比你，但係亦會問你多少少問題，例如性行為對象係邊個，而性行為過程中係咪彼此都有共識。
一般注射避孕針，建議係月經週期頭7日（即係黎月經嘅時候）期間注射，注射之後就會有避孕功效。避孕針成分方面，去診所打同去家計會打分別不大，而收費上都可以預約打針嘅時候，詢問護士收費大概係幾多，可以比較一下 注射之前嘅時候，都可以諮詢醫生身體比較適合打單一荷爾蒙避孕針（每3個月打一次），還是需要打混合荷爾蒙避孕針（每1個月打一次）。
一般如果身體狀況都係健康的話，都會建議打混合荷爾蒙避孕針（每1個月打一次）。單一荷爾蒙避孕針（每3個月打一次）主要都係適合生活比較忙碌較難經常打針，又或者餵緊母乳嘅女性，而注射呢一款針一般第一個月嘅經期都會比較混亂。不過都無需太早決定自己選擇注射邊一款針，當你諮詢家計會醫生嘅意見嘅時候，醫生都會向你解釋兩款針嘅分別，同埋因應你嘅身體狀況，評估你比較適合注射邊一款針。
如果你都想調節經期的話，其實調節經期功效方面，事前避孕藥嘅效果會比避孕針好，不過事前避孕藥嘅缺點，就係需要每日定時服藥 ，所以都可以考慮一下。
雖然一般注射避孕針之後，係會即刻有避孕功效。不過我地安全起見，都會建議注射後頭7日，都額外配合番安全套進行性行為。因為身體一開始萬一唔適應藥效（例如嘔吐）嘅時候，呢個狀態下發生唔安全嘅性行為，其實都會有懷孕風險。所以配合安全套，就會可以避免到呢個情況帶黎嘅風險
比起服用避孕藥、注射避孕針，其實子宮環相對上對於身體嘅限制亦都會多好多。因為子宮環係要放入子宮腔入面，所以如果身體係有生殖器官異形、患盤腔炎、經血量多、會有嚴重經痛、不正常嘅陰道出血等情況的話，就唔適宜使用呢個避孕工具 
而配戴子宮環嘅過程，亦屬於醫療程序嘅一種，所以係需要諮詢過醫生意見，同埋醫生進行過相關嘅體格檢查，確認你嘅身體係適合配戴子宮環，先可以進行嘅 。
不過如果你年齡都係比較細的話，可能都會建議你再三考慮有無使用子宮環嘅必要，始終子宮環一用就可以用大概5-10年。而放入子宮環嘅過程，始終係屬於一個入侵性醫療程序，可能未夠18歲的話，都需要有定心理準備，可能需要徵求你家長／監護人嘅同意。不過實際上係咪一定要得到家長／監護人同意方面，我地都唔係好肯定回答到你，建議可以先諮詢一下醫生意見先 
無論最後你嘅決定係點，都希望你能夠同我地分享你嘅經驗及情況（特別係未夠18歲而需要使用子宮環方面，家計會嘅處理狀況會係點），讓我地都可以有更多嘅資訊，幫助之後其他發問嘅人 
。
多謝你嘅解釋！好詳細！
另外想問 72小時時效嘅事後丸同120小時嘅有咩分別？副作用方面又有冇話邊種嚴重啲？
兩種藥中含有嘅荷爾蒙種類唔同：72 小時嘅係單一荷爾蒙（黃體酮）型緊急避孕藥，有效率為97－98%，越快服用成功率會越高；而120小時嘅係黃體激素受體劑型，有效率為98－99%，呢一款服藥嘅時間並唔會影響藥效。現時家計會通常都係俾黃體激素受體劑型嘅。醫生會評估身體狀況適合使用藥物緊急避孕後，先處方合適嘅藥嘅。
副作用方面，因為兩者都含有高劑量嘅荷爾蒙，所以有機會產生嘅副作用症狀都好類似，例如頭痛、噁心、頭暈、疲倦、經痛、腹痛、背痛、乳房脹痛等，呢啲副作用通常會24小時內消退。如果服用短時間會嘔吐，咁就要去盡快去醫生度覆診，有機會需要補服藥物。亦有人係服用後嘅月經可能會受影響，例如係經期日子、經期長度、經血量等等，不過一般都只會影響一至兩次經期。如果唔係用作長期避孕，對身體唔會構成大影響架～