我同女朋友上係危險期22/11，一日做咗兩次，喺第二次我用下體直接同佢下體互相摩擦，大約五次六次，唔記得我有冇分泌物，但係佢係有分泌物，最後係射咗係肚，佢呢排話大約子宮位脹咗，會唔會係懷孕
你好呀 @Wyt 
見到你地有計危險期/安全期去避孕，雖然呢個係一個好好嘅習慣去紀錄個月經週期嘅，但係計算安全期/危險期並唔係一個安全嘅避孕方法，因為女仔嘅月經週期有好多原因會導致遲或早咗，要等到月經嚟咗之後先可以計得返排卵嘅日子，之後先可以計到安全期同危險期，因此其實並唔係十分準確，唔可以太依賴安全期嚟作為防止懷孕嘅方法架。除非真係每日係醫生嘅指示之下用排卵棒去測試，如果唔係都唔會可以好準確咁知道邊一日先係排卵日。所以就算一直觀察緊自己嘅月經週期都唔能夠好準確咁知道自己邊一日排卵，啲安全期、危險期都有可能會向前或者向後推一兩日，而呢一兩日其實都可以影響好多嘢架啦。 
如果無插入式性行為嘅話，其實懷孕嘅風險係比較低嘅。不過都要留意下嘅，因為唔知你地點樣摩擦呀，有機會係摩擦嘅過程中唔小心插咗少少入去，而男性係性興奮嘅時候，姐係陰莖勃起嘅狀態，會分泌尿道球腺液嘅，裡面都有少許精子，都有導致懷孕嘅風險嘅，而且當時女朋友都有分泌液，係摩擦嘅過程中尿道球腺液都有流入陰道嘅風險。另外，雖然你係射咗係肚上面，如果唔係即刻抹乾淨，都有唔小心流向陰道而你唔知嘅風險嘅。下次除咗避免性器官直接接觸到以外，如果真係要射係身體嘅其他部份，都儘量揀一個高啲嘅地方，例如腰以上、胸嘅位置，儘量避免精液流向陰道嘅風險。 
腹部有脹脹啲嘅感覺，其實有好多因素造成嘅，有可能係排卵或者月經等等，所以都唔可以單憑一個徵狀去判斷有無懷孕架。如果真係擔心嘅話，你依家都可以去買驗孕棒嚟驗架啦，因為你地有性接觸都係22/11，依家已經超過咗11日，驗出嚟嘅結果都好可信架啦。記住要跟足說明書上面嘅指示去做，同埋要係指定嘅時間內睇結果呀。 
雖然性器官都有接觸過，但係比起係體內射精，個風險都會相對低啲，不過唔可以話係絕對無風險，因為只要一條精子就可以導致懷孕架啦。
原本應該尋日月經嚟，但係佢都係未嚟
月經來遲可以有好多原因，例如壓力過大、情緒有起伏、生活作息唔規律、飲食唔均衡、最近病過有服藥（特別係抗生素）等。所以如果暫時只係遲左1日，都無需太擔心住 
可以耐心等多幾日先。
正如 @Kaleo_StickyRiceLove 所講，如果係擔心22/11嘅性接觸有機會導致懷孕的話，其實宜家已經超過性行為11日，建議可以進行驗孕，而宜家驗嘅結果亦會係準確及可靠嘅 。
如果驗孕棒顯示兩次都係冇 咁係咪可以代表冇事
同埋夜晚測會影響？
驗孕棒係透過檢測尿液中嘅人绒毛膜促性腺激素(hCG)水平去驗測有無懷孕，hCG係會喺卵子著床之後開始分泌嘅，而呢個過程大概需要6－9日，所以如果你已經懷孕，基本上係11日係體內就已經可以有足夠濃度嘅hCG可以被檢測得到架啦。你依家已經超過咗11日架啦，個結果其實都準確架啦，唔洗咁擔心嘅。
某啲牌子係說明書上面會寫明一定要用晨尿驗，代表呢隻牌子嘅驗孕棒係需要比較高濃度嘅hCG先可以被檢測得到。如果無寫嘅話，其實都夜晚同早上驗都係無分別嘅。 