事後藥問題

6/12晚同男朋友發生咗兩次關係,兩次都有戴套,好安全,7/12朝早發生咗第三次,今次個套穿咗。Apps話我前兩日排卵期,20/12嚟m,事後即刻睇醫生買事後藥食,醫生處方咗兩粒1.5mg安立婷,叫我食完第一粒後,12個鐘再食第二粒。但我上網睇同睇說明書,好似0.75mg份量先係分兩次食,1.5mg份量只係食一粒。

想問

  1. 我喺完事後兩個鐘後食第一粒1.5mg,12個鐘後再食第二粒1.5mg,用法正確?如果食多咗份量,對身體同避孕有咩影響?
  2. 避孕成功率大約幾多?
  3. 假如已經排咗卵,事後藥效果係咪冇咁高?
  4. 原本20/12嚟m,食咗藥係咪會提早嚟?

謝謝,心急人上。

補充:個套穿咗,男朋友射咗入面,但男朋友已經第三次出,精子數量冇咁多,懷孕機率係咪會較低?

首先想同你解釋返,其實排卵同月經受好多因素影響嘅,例如荷爾蒙分泌、作息、飲食、壓力等,App嘅紀錄只係一個參考,唔係一定準確嘅。 :blush:

  1. 安立婷係屬於單一荷爾蒙(黃體酮)型緊急避孕藥,配方上係一粒1.5mg為一次服用份量,如果按照慣常做法以及藥物說明書嘅話,你只需要係性行為發生72小時內盡快服用一粒就已經可以達到緊急避孕嘅功效。原則上你服用一粒就已經足夠緊急避孕,現時我哋無法確定點解醫生認為有需要處方兩粒藥物比你。如果你未服用第2粒藥物的話,建議你聽日打返去診所向醫生查詢。緊急避孕藥係用高劑量嘅荷爾蒙去抑制排卵或者干擾受精過程,所以有機會對身體會造成一啲副作用,例如頭痛、噁心、頭暈、疲倦、經痛、腹痛、背痛、乳房脹痛等,但呢啲副作用通常會24~48小時內消退。有人係服用後嘅月經可能會受影響,例如係經期日子、經期長度、經血量等等,不過一般都只會影響一至兩次經期。假如醫生認為你有需要用較高嘅劑量(2粒1.5mg)先可以穩陣做到緊急避孕嘅功效都唔需要太過擔心,雖然身體吸收高劑量荷爾蒙嘅份量會比較大,但只要唔係唔係用作長期避孕,對身體唔會構成大影響。不過都要有心理準備係兩粒藥物嘅情況下出現副作用嘅可能性都會更加大。 :persevere:

  2. 安立婷係屬於單一荷爾蒙(黃體酮)型緊急避孕藥,需要係發生性行為後72小時內服用先有效,而且越早食效果越顯著,避孕成功率有97-98%。 :wink:

  3. 就算已經排卵,緊急避孕藥可以干擾卵子受精或者干擾受精卵著床。所以只要係醫生處方之下係指定時間內食咗藥,基本上都可以發揮到效用做到緊急避孕,唔需要擔心。 :relaxed:

  4. 服用緊急避孕藥後可能會影響本身嘅月經週期,有機會造成月經提前或者推遲。而且月經週期本身可以被唔同因素影響到,所以現時都唔可以好確定咁講月經係咪一定會受影響或一定會提早嚟。但月經日子改變係其中一個服藥後常見嘅情況。 :blush:

導致懷孕只係需要一個精子,所以如果有精液進入陰道,無論量有幾多,都係會有意外懷孕風險嘅。
而安全套穿可能係因為潤滑不足/冇將貯精囊嘅空氣全部擠出等原因,下次可以考慮使用潤滑劑,同埋記得檢查貯精囊仲有冇空氣。咁就可以更加安心享受性歡愉。 :smiling_face_with_three_hearts:

我已經喺完事後14個鐘內食咗兩粒安立婷,到今日都暫時未有任何副作用,會唔會係藥力唔夠未見效?:persevere:定係好大機會已經避孕成功,只需要靜待下次月經嚟,唔需要擔心?

就算食咗事後避孕藥,都未必會有副作用出現嘅,副作用唔係一個衡量藥物有無生效嘅指標嚟架。你係醫生指示之下完事後14個鐘內食咗藥嘅話,其實都唔洗擔心嘅,避孕藥已經係身體裡面產生緊作用架啦。 :wink: :wink: :wink:

要留意返嘅係,因為安立婷通常都會係食一粒嘅,但係醫生開咗兩粒俾你嘅話,服用嘅劑量就會比一般多,身體吸收嘅高劑量荷爾蒙係比例上就會再多啲,對月經嘅影響都會更加大,下次嚟月經嘅日子、日數、血量等等都可能有改變嘅,要留意返啦。如果真係好擔心嘅,都可以係性行為後7日用驗孕棒驗孕得到初步結果,性行為11日後再驗多次,呢次嘅結果就會更加準確同可信,但記住要跟返說明書上面嘅指示去驗同埋係指定嘅時間裡面睇結果呀。 :grin:

近日發現乳房顏色變深,但冇其他特別感覺,想問呢個係咪避孕藥嘅副作用之一,係咪正常?定係其他例如月經前或者懷孕嘅徵狀?

一般當荷爾蒙有明顯轉變嘅時候(例如青春期、懷孕),乳暈嘅顏色就有機會出現變化。

首先,乳暈顏色變深,係服用避孕藥時有機會出現嘅副作用之一,並非每一個人會出現,一般停藥後係會恢復番原本嘅顏色 :blush:。原因係因為避孕藥入面含有雌激素同埋黃體激素,會造成類似生理激素嘅變化,令乳暈顏色變深色

另外有時月經週期期間,乳暈顏色亦都有機會隨住身體入面因排卵造成嘅雌激素變化,而令顏色有所改變 :wink:。所以部分女性可能排卵期或來經前嘅時候,都會觀察到自己乳暈比較深色。

而懷孕期間,乳房會因為受到雌激素嘅影響,而變得較腫脹同埋堅硬,乳暈顏色亦有機會變得更深。一般生育後,乳暈變深左嘅顏色會慢慢退去。

一般服用左事後丸之後,其實懷孕嘅機會率係好低,建議可以耐心等候下次月經先(提醒:下次月經有機會受事後丸影響,提早/延遲出現 :wink:)。又或者真係好擔心的話,可以好似 @Kaleo_StickyRiceLove 所講,

詳情可以再參考以下嘅文章 :relaxed:
Healthline - Dark Nipples: Causes, Symptoms to Watch For, and More