我已經食咗7個月yaz，今個月食到第八包第10粒嘅時候無套內射咗，當時月經app話我係中懷孕機率。
而咁啱嗰陣我有腸胃炎所以有食抗生素，不過每次食抗生素都有同yaz相隔半小時至一小時。
想問我會唔會咁就有咗？我有準時食藥而上次經期都有準時。
另外，自從我開始食藥至今，只要一踏入原定嘅排卵期嘅時候，分泌物都有增多，想問係咪正常？
如果你呢幾個月都有按時食藥，冇漏服嘅情況，咁你嘅身體應該已經適應咗藥物嘅藥效，只要有每日食藥，冇食完藥嘔吐嘅話就會維持有避孕效果，唔需要擔心。 
其實避孕藥其中一個可以避孕嘅原因係依靠人造荷爾蒙去抑制排卵，所以當服用避孕藥後，就唔會有所謂『排卵期』嘅。但藥物都會令身體形成一個穩定嘅週期，穩定地出現「月經」。而月經App一般係紀錄無任何額外人造荷爾蒙影響下嘅月經周期，而係使用藥物後月經App推算嘅月經周期就已經無太大參考嘅意義，主要係用作自己紀錄係藥物控制下月經嘅日子。 
避孕藥同時會增加子宮頸分泌嘅粘稠度，所以可能會造成分泌物變黏稠嘅。而陰道平日有分泌係正常嘅，只要唔係突然增量好多，或者顏色／氣味有明顯唔同，就唔使太擔心嘅。 
係醫生處方抗生素俾你嘅時候你有冇提及你現時服用緊避孕藥？因為抗生素本身對身體嘅影響會比較大，特別係影響荷爾蒙水平，亦有唔少嘅藥物係唔適合同俾避孕藥同時服食，所以最好都係徵詢一下醫生嘅意見先。如果醫生係知悉你有服用避孕藥嘅情況係處方抗生素俾你咁就無需要太擔心啦。