想請問我食左一個月多啲嘅事前避孕丸，如果無用安全套+內射 係唔係都唔需要食事後？
Hello~ 事前避孕藥嘅原理係透過人造荷爾蒙抑制卵巢排卵、令子宮內膜產生變化，使受精卵無法著床，同埋增加子宮頸分泌物嘅黏稠度，使精子難於穿過黏液，進入子宮腔內，所以避孕成效係相對高嘅 (婦女喺第一年使用這種避孕方法後嘅意外懷孕機會為 0.3－9%)。不過，因為冇一種避孕方法係100%成功嘅，所以係有持續服食事前避孕藥嘅情況下，無論係有冇使用安全套以及體內射精，都有懷孕嘅機會。
當然，如果服用避孕藥時配合使用安全套，避孕成效會較高，而且亦都可以預防經性傳播嘅疾病。而體內射精方面，因為男性受到性刺激嘅時候，陰莖會自動分泌一啲透明而黏黏地嘅液體，叫做尿道球腺液，當中都含有少量精子嘅，所以無論體內射精與否，都有懷孕嘅機會。
另外，事前避孕藥嘅成效亦都會受到服用情況及身體適應程度所影響。例如漏服、不按時服藥，或者服食過抗生素等因素都有機會影響藥效。而因為身體需要時間適應藥效，所以係持續服食避孕藥三個月或以上，藥效會發揮得較好。
其實，除非唔發生性行為，如果唔係無論係使用邊種避孕方法，都有懷孕嘅機會。當然，係正確使用有效嘅避孕方法嘅情況下，懷孕嘅機會會相對唔使用避孕方法低好多 
而因為緊急避孕藥嘅副作用較大，係一個經期內唔可以服用多於一次，並唔適宜作恆常嘅避孕方法，所以你哋可以考慮一下要唔要服用緊急避孕藥。
講多少少有關緊急避孕藥嘅資訊，緊急避孕藥主要分為兩種，分別係服用時限為性行為嘅72小時及120小時內，如果過咗呢個時限服藥就無效。因為緊急避孕藥喺香港係法例規定必須經醫生處方嘅藥物，所以如果決定服食緊急避孕藥，就必須到診所見醫生，經醫生評估後先領取緊急避孕藥。你哋可以到家計會診所、母嬰健康院或者私家診所向醫生領取 
