介意男朋友嘅過去

同男朋友一齊左差唔多成年,都識左幾年先一齊,以前都有追過我,只係我覺得佢帶比我嘅感覺太似Player 覺得唔認真 後尾突然聯絡翻,好快就一齊左。一齊都覺得佢一定拍好多拖,算係經驗老到嘅人,雖然佢一直話自己唔係player,但佢話過佢拍得最長嘅拖都只係四個月都唔知有無,前任加加埋埋都最少五個以上。雖然我唔知佢同過幾多個前任有Sex黎樣嘢。但每次無啦啦諗起都會覺得好唔開心,好驚好多野其實佢同佢前任都做過,一諗起佢以前有咁多個Ex就會想喊咁。
點先可以令自己唔介意黎D嘢?

你好呀~ @Kkkkkkkk

的確,一諗起以前佢嘅經歷,就好似個心拿住拿住咁,好似佢有好多嘢你都唔知,係不知不覺間,就會唔信任佢。 :pleading_face:

我諗你最擔心嘅係付出咗真心,先至發現俾人呃咗,呢刻嘅你,好擔心受傷害。 :frowning_face:

唔知係咪以前發生過啲乜嘢事,令你咁擔心受傷呢?

你以前同佢相處過,感覺佢係一個player,再加埋佢拍拖嘅時間都好短,令你好擔心你同佢都係得好短嘅時間。

我留意到你,用咗好多「覺得」,「我覺得佢帶比我嘅感覺太似Player」「覺得唔認真」「一齊都覺得佢一定拍好多拖,算係經驗老到嘅人」,我建議你可以將你呢啲嘅覺得,同你個伴侶去分享返,睇吓可唔可以解答到心裏面嘅呢啲好多嘅疑問,你可以同佢分享有咩原因你會咁樣「覺得」,你咁樣覺得之後又會有啲乜嘢嘅感覺,例如擔心、憂慮、迷惘等等。

雖然你覺得佢係player,但係你哋都差唔多一齊咗一年,係呢差唔多一年嘅時間裏面,係咪都發生過啲咩事令到你咁擔心呀? :thinking:

我見到你話你驚佢唔知同幾多個前女朋友有性行為,你驚緊嘅係佢同佢女朋友有性行為呢件事?定係驚緊嘅係其他嘢呀?我都想知道呢樣嘢對於你來講,係咪好重要㗎? :thinking:

如果呢個時候你有一支魔杖,揮一揮就可以變走晒佢以前嘅經歷,瞬間變成左一個A0,咁樣你而家嘅情況會唔會有改變㗎? :crystal_ball:

好多時候我哋會介意別人嘅以往,係驚自己同其他人會有比較,「佢以前女朋友好叻㗎,但係我好似乜都唔識咁」「佢以前個女朋友好大波㗎,我成個飛機場咁」「佢以前個女朋友性格好好㗎,我又成日控制唔到脾氣」,驚自己比唔上其他人,對方就會因為你做得唔夠而拋棄你。 :pleading_face:

人生有好多嘅苦難,其實都係來自於執著。你執著住佢以前同幾多個女朋友發生過性行為,就好似扯大纜咁,你不斷不斷咁樣退後,同時不斷不斷咁捉緊手中嘅繩,其實你知道㗎,你知道放手你就唔使再後退,你知道放咗手你就可以向前行,但係唔知點解,你就係唔肯放低呢一條令你不斷後退嘅繩,但係你又知唔知,同你鬥緊力嘅係邊個?

係一個名為「過去」嘅烏雲。 :cloud:

你以為同佢係鬥緊力,但係其實只不過係你捉住咗舊烏雲唔俾佢走咋。 :fist:t2:

我知道一時之間叫你突然之間放手,係一件好難嘅事,但係我哋嘗試逐隻逐隻手指咁放開,學習慢慢咁樣接受人人都有過去,學識感激佢嘅呢啲過去,因為有咗呢啲過去先可以造就咗而家嘅佢。

如果你都仲係好唔知點樣可以接受,點樣可以放手,咁不妨同伴侶溝通下,不過要循序漸進,可能一開始嘗試了解吓多啲男朋友以前嘅事,再慢慢去了解下佢同佢以前嘅女朋友係點樣嘅,然後再了解吓佢同佢以前女朋友嘅性係點樣樣嘅,當你了解多咗之後,話唔定慢慢慢慢就會唔介意,但係呢啲都係要睇吓你同佢本身係點樣溝通嘅,又或者你哋本身係咪都係願意分享以前嘅嘢,如果唔係就唔好勉強啦。

一切都會好起來的。:wink:

同佢一齊左幾個月個陣佢有同我講過自己大約拍左幾多次拖,佢自己都話其實都拍左好多下。 我唔想問佢以前嘅嘢係因為每次一問完知道左,個人會仲唔開心左。
我好想唔在意黎啲嘢,但我又唔知可以點做:sob:

睇到你依家嘅內心有一種好矛盾嘅感覺:pleading_face: 一方面好在意男朋友過往交往嘅經歷,到底會唔會依家同男朋友經歷過嘅事情,其實以前對方已經同前任經歷過 :persevere:,令自己同男朋友發生每一件事之前,有所卻步;同時另一方面,其實都好擔心知道左之後,自己會唔開心,甚至有機會更加忍唔住會就住特定嘅事情,同男朋友嘅前任比較(e.g. 原來佢地已經去過呢個地方、佢地已經互相送過呢D禮物,等等) :pensive:

人生就係一段單程路,不斷往前走,從來都無辦法去回頭,更改過去已經發生過嘅事情。有時諗深一層,的確不論你男朋友過往同前任經歷過咩事情都好,其實你都無辦法去刪除呢一D嘅回憶;套用在你身上,假如你過往有其他戀愛又或者其他經歷都好,依家嘅男朋友亦無辦法回到過去參與翻你當時嘅人生。

見到提及過你好介意男朋友有好多個前任,同埋好驚其實有好多事情男朋友都同前任經歷過。再問多一層,男朋友過去其他戀愛經歷外嘅事情,你又係咪都同樣在意呢?如果唔係的話,介意男朋友嘅戀愛經歷,其實在於你黎講,又代表緊D咩?例如擔心呢一段嘅交往關係會唔長久,還是擔心男朋友會唔專一?

而換個角度而言,你有無咩事情,或者經歷,其實都唔太想男朋友知道? :face_with_hand_over_mouth: :pleading_face: 而唔想對方知道嘅原因,又係D咩呢?

繼唔繼續去問男朋友過往嘅經歷,又或者你男朋友會唔會選擇主動分享過往交往嘅經歷,可能彼此都需要知道及考量嘅,就係「到底講左之後,對依家嘅關係係咪一件好事:thinking:。如果依家關係都未算係好穩定,而講左之後只會令關係有更多摩擦的話,說不定依家知道得咁清楚,並非係一個適合嘅時機 :disappointed_relieved:。當關係穩定落黎,又或者彼此都信任伴侶,知道即使講左之後,都唔會影響雙方對對方嘅感覺、相處,以及安全感,咁選擇坦承地分享往事,亦係一個可以選擇嘅決定 :heart:

有關戀愛嘅事情,往往並無絕對嘅答案。別人適用嘅方法,亦唔代表你會適用。不過,我都可以分享一D嘅方式,比你參考以下,睇睇會唔會幫助到你比較唔介意男朋友嘅過去 :smiling_face_with_three_hearts:

  1. 問下男朋友鍾意你D咩:既然男朋友都追過你一段時間,亦都拍左拖一年,相信在你男朋友嘅眼中,你一定係有特別/獨特嘅地方,令佢咁鍾意左你咁耐 :wink: :kissing_closed_eyes: 聽到男朋友嘅答案,除左可以令你知道自己對佢黎講有咩獨特之處 :see_no_evil:,相信亦可以令你更有自信,知道自己並非能夠咁容易被其他人,甚至其他經歷去取代:heart:

  2. 呼應上一點,正正每一個人都係獨一無二嘅存在,就算有D事情,對方同前任經歷過都好,同你一齊再次經歷嘅時候,對男朋友黎講,亦係一個全新嘅體驗。就例如你一直同朋友A會去某間Cafe飲咖啡都好,下次帶朋友B去呢間Cafe飲咖啡,話唔定都可以有新嘅感覺。可能朋友B會同你傾唔同嘅話題,又或者朋友B會點其他嘅咖啡、蛋糕同你分享,成個體驗,已經可以同你過往與朋友A所經歷過嘅好唔同。

到底同邊個人經歷嘅開心D呢?同邊個人經歷嘅深刻D呢?有時答案可能真係自己都唔知,又或者真係心中出現一個答案嘅時候,對你/男朋友黎講,當眼前已經有一位自己好鍾意嘅伴侶時,呢個答案又帶出咩意義呢?有時比起呢個答案,珍惜眼前人,珍惜能夠一齊經歷嘅每一分每一秒,反而黎得更加重要 :smiling_face_with_three_hearts: :blush:

當我地無辦法改變「過去」嘅時候,唔好唔記得,我地係可以同伴侶,喺「現在」同「未來」一齊創造更多美好、難忘嘅共同回憶啊 :smiling_face_with_three_hearts: :muscle:t2: