之前做嗰陣因為用咗個有凸粒嘅套，隔咗幾日而家個窿勁痕有啲痛但應該唔會過敏，做嗰真亦都唔係好舒服，想知係整親定點因為第一次用依個套，幾耐先之可以好返？
Hello
想了解多啲，你所講嘅「個窿勁痕有啲痛」係指外陰還是陰道內？你之前有冇發生過唔安全性行為？除咗陰道插入式性行為之外，有冇發生過其他性行為，例如口交、指交？有冇其他症狀，例如陰道分泌物顏色有改變？唔舒服嘅情況喺性行為後幾耐出現？持續咗幾耐？ 
見你話係第一次用呢一種安全套，有機會係你對呢一款安全套嘅材質、或者潤滑劑嘅成份令你敏感，令你痕癢甚至痛，不過如果唔係性行為後即時有唔舒服，敏感嘅機會係比較低。而你講性行為過程中唔舒服，係唔覺得有性愉悅，定係感覺到痛？如果係覺得痛，可能係因為潤滑不足，特別係凸點型安全套摩擦會相對更加強烈，更加容易導致陰道有輕微破損，容易受到細菌感染，導致痕癢同痛楚。 
建議你下次可以用其他款式嘅安全套。
其他可能會導致你出現陰部痕癢、赤痛嘅陰道感染有：念珠菌感染，亦會導致外陰紅腫，並會有白色黏稠分泌物；滴蟲感染，會伴有分泌物增多，呈黃綠色並帶有臭味；衣原體感染，會有陰道分泌物增多，可能會有小腹痛或非經期出血。 
念珠菌感染通常係因為身體狀況或者陰道環境改變，例如使用抗生素、服食高劑量荷爾蒙、經常穿著唔透氣嘅衣物等。而滴蟲、衣原體感染則係性病，係因為唔安全性行為有體液接觸傳播。
你發生今次性行為前有冇已經出現不適？如果有，而且情況有加深，建議你盡快去睇醫生檢查下，如果有感染狀況要服用藥物，通常一個星期左右會好返。不過療程會因為每人嘅狀況唔同，因人而異。 
如果冇分泌物改變等其他症狀，只係今次安全套嘅問題，而且情況有所改善，可以再觀察下。喺呢段時間建議你著棉質底褲同寬鬆嘅下身衣物，避免陰部喺潮濕悶焗嘅環境。注意日常清潔，去廁所後由前向後抹；沖涼時用溫和溫暖嘅清水清洗陰部，但唔好灌洗陰道。如果幾日後情況冇改變，就要睇下醫生檢查下。 
係外陰痕，隔咗幾日先係咁。而念誅箘嗰方面，一直分泌都偏黃有少少味唔知係咪念誅箘感染，由嗰日做完之後開始由少少痛到好痕，自己不嬲冇任何敏感。
同伴侶嘅性行為係開頭戴之後唔戴但佢出嘅時候係用手，上半part用都係買個保障，之後唔太舒服就除但唔會去到就射先猛出嚟，用手都用10分鐘先出。之後都有口交指交。
都想知道你外陰痕嘅情況係有無特別指邊度架？因爲陰蝨同埋滴蟲都會係陰毛嘅地方痕嘅，但係滴蟲就會多一個狀況係分泌物顏色都改變埋嘅。睇返你嘅情況，你啲分泌物之前已經有少少顏色同埋氣味，可能會有少少感染嚟嘅姐。
唔洗擔心嘅，無論乜情況都好，如果情況繼續係咁，就要去睇醫生啦，你可以去社會衛生科或者家計會見醫生，啲醫生經驗好豐富，佢哋好專業，唔洗怕尷尬架。
你話做完當日就痛，有可能係性行為嘅動作太過激烈，再加埋用啲凸紋安全套唔太習慣，又或者唔夠潤滑、角度太刁鑽都有可能引致痛嘅情況架，建議你用多啲潤滑劑呀，咁樣可以保護雙方，唔會因為唔夠潤滑導致雙方摩擦太多而有腫脹疼痛嘅情況。
見你話係性行為途中除咗安全套，雖然明白係會有啲唔太舒服，但咁樣會有懷孕風險架，因為陰莖係受到刺激勃起之後，會分泌尿道球腺液，裡面都會有少量精子架，所以你除咗套插入嘅時候都有可能會有尿道球腺液進入體內，都有懷孕嘅風險架
同埋如果分泌物有異常同埋陰道有痕癢，都係一啲懷疑會有感染嘅徵狀，都唔係咁適合唔用安全套發生性行為，每人嘅性器官都會有可能出現唔同嘅狀況，我地都好難講係邊個感染先，當你地無用安全套嘅話，每次性行為就會將啲病菌互相傳嚟傳去，例如你一開始有發炎，可能係念珠菌增多導致，當你地無用安全套嘅時候就會將念珠菌傳俾伴侶，就算你醫好咗，下次無套佢又會傳返俾你，咁樣就好似一直都循環落去咁。
建議你檢查完如果發現有感染，可以帶埋伴侶一齊去檢查，一齊治療就可以避免呢個循環啦。同埋都係建議你全程使用安全套呀，唔單只可以避免懷孕，仲可以避免感染性病架。
如果男方性器官有我陰道細箘，但冇影響男方，而我地隔好耐先再發生性行為但冇安全套，我會唔會再感染？
正如 @Kaleo_StickyRiceLove 所講，假設你嘅陰道本身有感染到病菌，傳左去男方嘅性器官，之後男方係有機會無出現病徵，但並唔代表佢體內並無感染到病菌（ 
潛伏期期間，有D性病於部分人身上係有機會毫無病徵）。如果男方係無接受治療的話，之後發生無套性行為係依然有機會傳番到你身上，令你再次感染啊。所以如果有感染的話，都好建議帶埋男方一齊做檢查及接受治療 
，咁樣先有效避免病菌重複感染嘅循環。
暫時如果外陰痕癢、分泌物顏色異常及出現異味等嘅情況持續，都建議去社會衛生科或家計會睇醫生做番個檢查啊 
無論有無感染念珠菌，或者其他性病病菌都好，睇醫生都可以幫到你及早治療，舒緩外陰痕癢、分泌物顏色異常、及輕微異味嘅狀況。
最後無論咩時候都好，建議整個性行為過程中，都戴好安全套。一方面可以避免懷孕風險，另一方面都可以減低性病傳播嘅風險啊