非常擔心!!!

Hello,我係今個月16號同27號都有同男朋友一齊搞過,係16個日係排卵期,27號係安全,而我都有app記錄我嚟m嘅日子,我上個月係25號嚟,再上個個月係22號嚟,而今日係29號,啫係遲咗4日到,我本身經期都係唔準嘅人,而係親密嘅過程中,係16嗰日我同男朋友都有著內褲,佢就著埋佢條睡褲,佢都有用手指搞我下面不過係隔著內褲咁搞,而且我哋都有著內用下面磨擦過,我感覺到佢下面有d痴粒粒野,我好驚佢d分泌物掂到我下面搞到我有咗。而家個肚好痛好痛,個位係肚臍落dd嘅位同埋有d谷住,個胸有d脹咁,有時唔想食野咁,但係分泌物好少,我想問我係咪有咗:persevere:

而家我個肚臍位都有d痛同谷住,個胸有d脹咁樣,feel有d攰同暈,冇咩胃口咁,但前幾日好想食甜野所以食咗好多

Hello @Abc111 :wave:t2::wave:t2::wave:t2:

答咗你最擔心嘅嘢先,根據你嘅情況,無任何陰道交同埋隔住衣物摩擦,係無懷孕嘅風險嘅。雖然陰莖係興奮狀態之下,會分泌透明嘅尿道球腺液,裡面的確會有精子,但係含量都係好少。不論係尿道球腺液,或者精液,接觸空氣之後,好快就會隨住空氣,令入面嘅水分蒸發變乾,並令精子失去活動能力而死亡。接觸到唔同物質例如枱面、衣服、化學物、清潔劑,都會進一步降低精子嘅活動能力。所以一般幾分鐘內尿道球腺液/精液都已經會乾透,令精子無辦法游入陰道內,導致懷孕。 :relaxed:

另外,你所謂嘅「安全期」、「排卵期」,其實係講緊出現咗月經嘅第一日,倒數返去14日,果一日先係推算排卵日,所以你只可以推算之前果次嘅排卵日,將來嘅排卵日係推算唔到嘅,而呢個只係一個推算嘅日子。要知道排卵嘅準確日子嘅話,係需要係醫生嘅指導下每日使用排卵棒驗先會知道邊一日係排卵日,而今個月嘅排卵日子又同下個月未必一樣,而且排卵嘅日子受到好多因素影響,都未必一定係月經完結先會排卵嘅,有啲人月經週期比較短嘅,好可能係嚟緊月經嘅時候已經排緊卵架啦,所以唔可以講實係邊日,都只能夠粗略估計架咋。App只能夠係估計,作為參考,唔能夠作準。因為月經、排卵呢啲生理現象,係由身體唔同嘅繁複系統配合而產生,所以好容易受到其他因素影響,例如:荷爾蒙分泌、飲食、藥物、作息、壓力等等,所以每個月經週期嘅排卵日都可能唔同架。 :crazy_face:

其實唔可以用身體有啲咩徵狀嚟判斷自己係咪有懷孕嘅,因為有果種徵狀嘅原因有好多,例如你所講嘅「肚臍位都有d痛同谷住,個胸有d脹咁樣,feel有d攰同暈,冇咩胃口咁」,亦都有人係懷孕期間一啲徵狀都無,而導致你有頭暈、胸脹或者無咩胃口嘅原因都有好多,所以唔可以單憑徵狀就判斷自己懷孕嘅。其實月經嚟之前都有可能會有啲咁嘅徵狀嘅,都唔洗特別擔心嘅。 :wink:

明白你都會好擔心,但係好似頭先咁講,其實你係無懷孕嘅風險架,不如試下做下自己鍾意嘅嘢,令自己心情放鬆啲,話唔定過幾日月經就會嚟搵你呢。 :smiling_face_with_three_hearts:

記得之前你都有問過類似嘅情況,當時都同你解釋過隔住內褲磨擦係唔會有懷孕風險,你唔洗咁擔心架,如果下次再遇到同樣情況,覺得好擔心嘅時候,都可以參考返我哋以往嘅答案,令自己冇咁緊張先,如果真係有新嘅情況唔識處理,都好歡迎你繼續搵我地架。 :kissing_smiling_eyes:

1個讚

唔該你呀:sob:

1個讚