我2、3、8、10、18、22、23呢幾日都有同男朋友做
而我懷孕機率正常既時段係8-14（13號係高懷孕機率），我本身應該係今個月既23-24號會黎m
但係我今個月遲左6日黎m…
我之前一向黎m都好準時…大部分時間都會同個app提示既時間一樣黎m
我呢排的確係夜訓左同操勞左，因為呢排都忙返工返到凌晨，不過我自己覺得唔係太大壓力
但之前都有試過夜訓，但就算遲都係遲1-2日唔會去到咁耐
而性行為方面…
我同男朋友做果時有幾次係入左幾下先用返套（唔記得邊幾日），但其他時間都係全程用套
係中間8-14號呢段危險期期間我有一啲谷m既跡象，有胸漲痛，生痘痘等等既狀況
同埋我有係8號同10號呢兩日有做，有用套，我好似係10號果日有食到事後丸，因為佢果日戴住套係入面射左…我驚有時所以我食左…
最後一日做果陣我都仲未黎m,但做完去廁所抹既時候見到有少少血絲出左黎，不過血量就係得果少少，我就以為我黎左m，用左m巾
到左第二日睇返塊m巾有啲啡啡地色偏稀既血（血唔係話係好多），換左m巾之後咩血都冇流過，但係我係果啲平時m到頭3日都係流極多經血既人黎，今次真係好反常，呢幾日不停咁搵資料，見好多人話呢啲係著床既血黎
我今朝早用左驗孕棒，但係佢得一條線，我唔知佢係太早驗唔準定係我真係冇
各位可唔可以比啲建議我？
照呢個情況睇會唔會係真係似有左？如果我再驗多次要幾多號驗先會準啲？
我真係好大壓力唔知自己應該點做…雖然我男朋友話叫我照生出黎會同我一齊照顧佢，但其實我主要係真係唔知點同屋企人交代，屋企人較保守，佢地會覺得我未結婚就生仔好唔岩
Hello~ 首先想你知道經期係會受好多唔同嘅因素影響嘅，例如生活作息習慣改變、心理壓力大、生病服食過藥物等等，而見你提到今個週期裏面有服食過緊急避孕藥，因為緊急避孕藥含有高劑量嘅人造荷爾蒙，所以係有機會令月經比預期嘅日子提早或者延遲嚟，所以月經遲嚟都唔一定等於係懷孕嘅 
而你提到流啡嘅情況，都有機會係因為服食過緊急避孕藥而影響到體內嘅荷爾蒙。
不過正正因為經期嘅長短會受好多唔同嘅因素影響，所以好難準確咁計算排卵嘅時間，好多時要到黎經後先可以推算返排卵期，亦都係因為咁安全期避孕並唔係一個有效嘅避孕方法，所以都建議每次性行為嘅整個過程都使用安全套。因為男性受怕刺激嘅時候陰莖會自動分泌一啲透明而黏黏地嘅液體，叫做尿道球腺液，當中都含有少量精子，所以如果唔係喺整個性行為嘅過程中都有使用安全套嘅話，的確係有懷孕嘅機會嘅。
至於緊急避孕藥嘅有效時限係性行為後嘅72或者120小時內（視乎當時係服用邊種藥)，佢嘅避孕原理係透過人造荷爾蒙抑制排卵或干擾受精過程，從而有效地減低懷孕嘅機會。所以，你所提到嘅8號同10號呢兩次性行為嘅懷孕機會非常低
如果想確認有冇懷孕，驗孕的確係一個可靠嘅方法。驗孕棒最早可以喺性行為嘅7日後驗出初步結果，而係性行為嘅11日後驗出嘅結果會更準確。因為驗孕棒嘅原理係透過檢測尿液中嘅人絨毛膜促性腺激素（hGC) 水平去驗出懷孕結果嘅，依種激素會喺受精卵着床後開始分泌，而受精卵着床大概需要6-9日嘅時間，所以係性行為嘅11日後或者預計來經嘅日子驗孕，結果會更準確。
見你提到今朝(29號)使用過驗孕棒驗孕，而結果係陰性，其實就已經可以幾肯定22號之前嘅性行為冇懷孕嘅風險 至於22號同23號呢兩次性行為，如果想獲得更準確嘅驗孕結果，可以喺性行為嘅11日後再次驗孕，你可以買兩個唔同牌子嘅驗孕棒，並按照說明書嘅指示進行驗孕，如果兩個結果都係陰性嘅話，咁就應該係冇懷孕啦 
除咗自行使用驗孕棒驗孕之外，如果月經距離預期嘅日子過咗一個星期仍未來經嘅話，你亦都可以去見醫生了解返身體狀況，咁就唔使咁擔心啦
如果現時未有計劃懷孕嘅話，建議每次性行為嘅時候都使用返安全措施，有效嘅避孕措施除咗安全套之外，亦都有口服避孕藥、避孕針等荷爾蒙避孕方法，你可以同男朋友商量吓邊種方法比較適合你哋，只要正確咁使用安全措施，係可以有效減低懷孕嘅機會嘅
好多謝你既回覆呀
我可能過多幾日會再去驗一驗先
不過我琴日晚開始就多左胃氣同幫feel到個胸開始漲大左
都仲係好擔心真係有左…
當有好多症狀出現嘅時候，真係會有好多擔心，而呢種擔心，無論旁人講幾多，你都好難放低，我相信你都不斷叫過自己「唔好擔心唔好擔心」，但依然都會好不自覺地去留意身體嘅變化，有少少變化都覺得關懷孕事，只要一日無嚟月經，就無辦法停止擔心。 
但係有胃氣呢樣嘢，都有可能係腸胃出現問題嘅係咪？胸漲都有可能係嚟月經嘅前兆架嘛，雖然我地無辦法停止擔心，但係出現症狀嘅時候，我地可以試下靜下心，諗吓會唔會有除咗懷孕嘅其他可能性，試下呀，話唔定會幫到你呢。 
如果真係好擔心日後性行為有懷孕嘅風險，記住一定要全程戴安全套，唔可以一開始插插下先至戴，因為男性陰莖勃起時流出嘅透明液體，即係尿道球腺液，都會有少量嘅精子，而導致懷孕只需要一粒精子，當你全程帶安全套嘅時候，做愛做得開心啲，過後嘅擔心又少啲，咁樣先至可以避免再出現同樣擔心嘅情況㗎嘛。
嗨各位，好多謝你地既回應等我update返大家先
睇完您地既留言之後我都有驗到，仲去埋家計會驗，但驗左都係冇，不過我仲係未黎m
琴日開始見到有一點血水係條底底到
之後到左今日就多左少少血水，佢唔同啲m一樣，佢係比較稀啲
我都唔係好清楚係咪會黎m定點
個人都仲係好亂
Hello 
正如我哋之前解釋過，月經會受好多唔同因素影響，你之前服用過緊急避孕藥，可能會影響一至兩個月經週期；而你呢排如果休息唔夠、壓力大、情緒緊張，呢啲都會影響月經嘅。
明白你呢一刻依然會覺得好擔心，思緒亦可能會好混亂，經常會諗起可能懷孕嘅情形同要點樣去面對。不過要記住，你已經進行過驗孕，而且亦有去過家計會由醫護人員幫手驗孕去確認結果，而結果顯示都係冇懷孕，咁就要努力嘗試去相信結果啦。唔需要擔心，嘗試耐性等待，放鬆心情，月經自然會出現嘅。
而你提到呢兩日有「血水」出現，介唔介意講多少少資料，你所講嘅「血水」係咩顏色？係類似經血定係有血嘅分泌物？大概量有幾多？
如果之後幾日都有呢種情況，咁就應該係月經來潮。呢兩日比較稀係因為月經頭幾日，經血比較快被排出體外，所以你見到嘅經血好似比較「稀」，顏色比較鮮紅，會隨著月經去到後幾日而漸漸變深色同黏稠。而且服用過緊急避孕藥亦有機會影響月經嘅血量同經血顏色，所以呢個情況唔使太擔心，一兩個週期後月經就會恢復到同平時差唔多嘅情況。
而如果你所講嘅「血水」唔係經血，而係帶有血絲嘅分泌物，咁就要留心觀察。如果之後幾日冇月經來潮，呢幾日亦無生過陰道插入式性行為所以唔係因為性行為而導致陰道輕微破損，而出現短暫嘅非經期出現帶有血絲嘅分泌物；咁就要留意有冇其他唔舒服，同埋帶血分泌物係咪時常出現。因為分泌物有血，可能子宮病變等疾病導致，呢種情況下就要盡快就醫，等醫生幫你檢查下啦。 
果啲血水係偏少少暗暗地既啡紅色
第一日有血水果陣個量係一節手指咁少
第二日既量係大概半張護墊
今日去完廁所抹果陣有啲暗紅色既分泌物（拉到血絲）
不過唔肯定係咪月經黎，要睇多幾日先
如果你睇到嘅血水有逐日增多嘅話，咁就應該係月經啦 不過因為服食過緊急避孕藥有機會影響月經嘅流量，所以經血都有機會比平日少，你可以觀察多幾日先，留意吓分泌物嘅變化，如果發現分泌物持續有血絲，又或者依然唔肯定係咪月經嘅話，最好都係去睇醫生檢查一下，咁就唔使估估下咁擔心啦
