想問咁樣會唔會有機會中?

上個禮拜同男朋友有親密接觸,期間佢隻手有掂過佢啲分泌物 (尿道球腺液?),之後好快又再幫我捽 (手冇伸入陰道)。
*過程中生殖器冇喺陰道外磨擦、冇射精、冇任何嘢進入陰道
我知道精液以外嘅分泌物都有少量精子,而親密時我都有唔少分泌物,所以我好擔心佢掂完佢啲分泌物再掂我嗰到,啲精子會游到入去:cry:
雖然嗰陣係我嚟完M嘅第3日、距離第一日嚟M嘅第9日,應該未係排卵期。我每次嚟M都係每個月嘅嗰幾日,但唔係真係超準,我都知計安全期係唔安全⋯
呢個禮拜越諗越擔心,我仲細個,有咗嘅話面對唔到屋企人⋯希望可以解答下我:sob::pray:t2:

唔知表達得清唔清楚,因為我唔係好識⋯:persevere:
想補充返:男朋友嘅手指冇插入陰道,只係有掂陰唇同陰蒂

你好呀 @aaa1 :wave:t2: :wave:t2: :wave:t2:

如果係無進行過插入式性行為,單純係有少量分泌物接觸到外陰嘅話,懷孕嘅風險都非常低嘅,因為精子都會需要一定媒介(例如精液/陰道分泌)去進入子宮,而且係接觸到空氣後精子會好快死亡,所以相對嗰風險係低。如果你都係覺得擔心,可以買驗孕棒測試一下,性行為後7日就會有初步嘅結果,11日就有比較準確嘅結果架啦,不過記住要跟說明書嘅指引去做同埋要係指定嘅時間內睇結果呀。 :relaxed:

每一次性接觸都會有相對嘅風險嘅,可能係意外嘅情況下分泌物直接進入到身體,就有懷孕嘅風險架啦。如果真係未有計劃懷孕嘅話,每次係性行為都可以使用一啲口交膜去避免體液嘅接觸嘅,你可以睇返我地嘅Post:
https://www.stickyricelove.com/post/口交膜及指套
裡面會好詳細咁介紹咗口交膜同指交膜架。又或者同伴侶傾返每次掂完自己之後一定要清潔好雙手先至再掂對方,同埋每次有性接觸嘅時候都使用安全套啊。 :wink:

你可能睇完以上咁多嘅嘢,可能都會係非常擔心嘅,都仲係覺得唔知點算好,係等待可以驗孕嘅時間都會好擔心,但係都好似之前咁講啦,其實你呢次嘅性接觸懷孕嘅風險係非常低嘅,唔係咁擔心架真係。當你好緊張好焦慮好擔心嘅時候,有可能都會因為咁樣而令你嘅月經週期延遲咗,到時就會更加擔心架啦,不如依家搵一啲自己鍾意嘅嘢做下,放鬆下心情,將重心放返係生活當中。 :leaves:

雖然你今次懷孕嘅風險真係非常低,但係退一萬步講,就算驗孕結果真係顯示你懷孕,都唔洗怕嘅,你可以上返嚟同我地講,到時我地再根據返情況再俾建議你啦。放心,糖不甩嘅大家都會陪伴你度過每個你覺得好辛苦嘅時刻,隨時搵我地啦。 :relaxed:

好的 萬分感激:pray:t2: 希望唔會咁唔好彩 多謝你教咗我咁多 會同男朋友傾返:cry: