月經遲到了

[Secrett]

近排月經遲到，都好擔心。
事源我前兩個月開始同男朋友有性行為，其實對上嗰兩個月嚟m時都會有啲唔舒服，好似第一日谷極都嚟唔到咁，但最後第一個月都有跟app嘅預計日期嚟，但就嗰日夜晚嚟少少，到第二日先嚟返正常量。（因我以往都係比較多量同經痛得好勁嘅人）
第二個月時，直頭第一日時凌晨肚痛醒咗，然後起身肚屙咗3次，又有啲子宮痛，但嗰日成日都冇血，到第二日先嚟返少少。依兩個月係有嚟嘅，但都谷得辛苦啲。同埋，唔係嚟m時，我個肚平日都有少少肚谷谷，唔知到底有性行為後係咪都會影響女性月經？

再嚟，12月時我哋有2次係開頭無套，25/12係開頭無套，男友龜頭喺陰道口磨擦咗一輪，之後插入時有帶返，26/12時又無套磨咗一輪，佢直接插咗入去5分鐘左右，抽返出嚟帶返套。到1/1本身個app預計我第一日嚟m，嗰日有少少谷住感覺，但冇血嘅，然後中午我哋做咗次，全程帶套，佢最後抽返出嚟時，個套有啲血絲。咁我諗住都係嚟m。

但依2-3日都係冇m，然後我個肚又谷住谷住，胸又係，又有啲肚瀉，又會腰痛，同平時谷m一模一樣。我自己本身因為身體比較差，所以都冇食避孕藥，主要係用避孕套。依家幾日冇m到，真係幾擔心。雖然係做緊嘢，都唔細，但都係會擔心。希望可以解答下我依家個情況應該點算好，謝謝。

[Ching_StickyRiceLove]

Hello

首先想當你解釋返，月經嘅出現其實係由身體繁複嘅系統配合而成，排卵同月經呢啲生理現象會受好多唔同因素影響，例如荷爾蒙分泌、飲食、作息、壓力、藥物等等，呢啲因素都會導致月經週期嘅長度同日期發生變化。你用app去記錄嘅時間只係一個參考，唔可以作準。如果你呢排休息得唔好、壓力大、或者有服用藥物，呢啲因素就可能導致你月經嘅日期有變化。其實每一個月經週期都係一個新嘅開始，唔一定會同之前嘅週期一樣嘅。

除咗日期之外，伴隨月經出現嘅症狀，或者經前不適嘅徵狀，都有機會每個週期唔同。你所講嘅肚痛、肚瀉、「谷住」、胸漲、腰痛，呢啲都係常見嘅經前和月經症狀，係因為身體荷爾蒙發生變化、子宮充血收縮呢啲因素造成。通常呢啲症狀會喺月經出現後慢慢好轉，不過都會因人而異，亦可能每次都唔同。而用熱敷腹部、飲熱飲、經前適量運動呢啲方法可以舒緩經期肚痛不適嘅感覺。
不過呢啲症狀都有機會係因為其他原因造成，例如食錯嘢都會導致個肚唔舒服；長時間坐或者企亦會導致腰痛。所以唔可以單憑呢啲症狀去判斷自己是否就快月經。

所以性行為其實並唔會直接影響月經，但如果因為性行為而造成情緒波動，例如你對性行為好期待、興奮、擔憂或者緊張，咁就有機會間接咁去影響月經。 而呢個都係因人而異嘅。

而你所講嘅喺12月25號同26號發生嘅性行為，其實有一定嘅意外懷孕風險 。陰莖喺受到刺激或者性興奮嘅時候會分泌透明嘅尿道球腺液，當中有機會含有少量精子。而你有提及你地陰道同陰莖有直接接觸，亦發生咗冇使用安全套嘅插入。所以呢兩次性接觸係有風險嘅，而你已經過咗可以採取緊急避孕嘅時間（72小時或120小時）。如果你擔心會意外懷孕，可以自行驗孕，一般嚟講，性行為後7日驗孕已經可以得到初步結果，而11日後則可以得到較準確嘅結果。你可以購買驗孕棒並按照說明書指示使用，喺指定時間內睇測試結果。
而你所提及1月1號發生嘅性行為，安全套有少量血絲，之後並冇持續出血，咁就應該唔係月經，而係性行為中陰道輕微損傷而出血。可能係因為潤滑不足或者性行為過程太激烈。建議你地下次再發生性行為嘅時候可以考慮使用潤滑劑（建議使用水性、矽性或者水矽混合型嘅潤滑劑；要避免使用油性潤滑劑，因為油性產品會導致乳膠避孕套破裂，亦會影響陰道酸鹼平衡從而影響陰道健康），避免因潤滑不足而導致陰道受傷，亦可以避免安全套潤滑不足摩擦之下破損。想了解多啲關於潤滑劑嘅資訊可以參考我哋嘅ig post：https://www.instagram.com/p/B5cf5Z9FCaS/?utm_source=ig_web_copy_link
如果進行驗孕，結果係冇意外懷孕嘅，咁只要放輕鬆耐心等待，今次月經會出現。

好明白你同伴侶未有生育嘅打算，會擔心意外懷孕。所以建議你同伴侶溝通，話俾佢知你嘅擔憂。同埋之後嘅性行為要全程正確使用安全套，喺性器官接觸之前已經要戴好安全套（詳情可以參考：https://www.instagram.com/p/B4EX0FVFLUf/?utm_source=ig_web_copy_link ），咁就可以更加安心去享受性歡愉。
另外，除咗安全套之外仲有其他嘅避孕方式。你所講嘅避孕藥係荷爾蒙避孕法嘅其中一種，通過人造荷爾蒙抑制排卵，同埋令子宮內膜發生變化使受精卵唔能夠著床，仲會增加子宮頸分泌嘅粘稠度令精子難以穿過黏液。現時有低劑量嘅荷爾蒙避孕藥，對身體影響比較細。都明白你擔心自己身體狀況未必適合，都想了解多啲你身體有啲咩唔舒服。有啲人有疾病、高血壓或者心臟問題，咁就未必可以使用避孕藥。而有啲人亦好似你咁，月經唔太穩定，又會有比較嚴重嘅經痛，其實服用避孕藥可以改善呢啲狀況嘅。所以如果你考慮服用避孕藥，建議你諮詢醫生意見先，等醫生評估你嘅身體狀況，確認你適合使用避孕藥。 現時家計會診所同某啲私家診所有提供呢個服務。而避孕針、子宮環都係常見嘅避孕方式，不過一定要由醫生評估你嘅身體情況後先可以使用。 家計會診所同某啲私家診所都有提供服務。如果你想同伴侶發生冇安全套嘅性行為，而又唔想有意外懷孕風險，咁就可以考慮使用呢啲方式。
你可以同伴侶傾下，搵到最適合你地嘅避孕方式並正確使用，咁就可以更加放心地發生性行為啦。

[Ching_StickyRiceLove]

同埋都想補充多少少關於避孕藥嘅資訊。
見你有講話自己有嚴重經痛同流量比較大，服用避孕藥前睇醫生嘅時候可以話俾醫生知，醫生會幫你做詳細嘅檢查，確認咗你唔係因為一啲疾病例如子宮肌瘤而導致有咁樣嘅情況，咁服用避孕藥係可以改善經痛嘅；但若果發現你有一啲病變嘅話，就可能未必適合食避孕藥嘅。