覺得自己好冇經驗

雖然自己有過幾個女朋友,但只係上一個ex開始佢試過幫我口交,同呢個女朋友就有扑埋。但同呢個女朋友其實冇其他問題,甚至覺得其實可以同佢結婚,但最令我放唔低嘅就係好似令我嘅性經驗停喺呢個位咁。

我好鍾意我女朋友,但一諗到自己唔可以試下同其他女仔性愛,探索下其他性嘅感覺,就會成日唔開心。特別有時聽到其他男性朋友講佢地唔同嘅經驗嘅時候。其實我同女朋友close到咩都可以講,但偏偏呢樣野就唔可以同佢傾,感覺我只有分手、成世繼續唔開心或者出軌三個選擇,但三個都唔係令我開心嘅解決方法,唔知可以點算⋯⋯

Hello~ 每個人都有權選擇佢嘅性生活方式,所以你想嘗試多啲唔同嘅性經驗呢個諗法係冇問題嘅 :blush: 只不過而家最令你困擾嘅係,你正處於一段戀愛關係之中,而依種關係亦限制咗你只能夠有對方一個性伴侶。

不過其實戀愛關係之中嘅性亦都只係由你哋雙方決定,例如有啲人會選擇開放式關係(open relationship),即係雙方維持着戀愛關係,同時唔會限制對方同其他人發生性關係或者建立親密關係。所以其實並冇規定戀愛關係中嘅性必須限於伴侶之間,只要係雙方有共識嘅情況下,你哋係可以選擇自己嘅性生活方式嘅。

見你提到唔可以同女朋友傾關於依方面,相信你係基於對女朋友嘅了解認為佢接受唔到,亦都見你提到結束關係或者出軌依兩個選擇都會令你唔開心,睇得出你都着緊女朋友嘅感受,而且你亦認為宜家依位女朋友係你嘅結婚對象,相信佢都有令你欣賞、愛慕嘅地方 :smiling_face_with_three_hearts: 所以係你依然想繼續同女朋友行落去嘅前提下,我哋可以諗吓係而家呢段關係中有啲咩可以做,係既可以達到你嘅期望,亦都唔會破壞雙方嘅關係 :blush:

首先,想了解多少少你所講嘅探索下其他性嘅感覺係指邊啲方面?例如係想嘗試吓多啲唔同嘅情趣體驗 (角色扮演、BDSM等)?或者係想嘗試吓喺唔同嘅環境/氣氛下發生性行為?依個問題係想了解吓你其實係因為同女朋友嘅性生活缺乏新鮮感所以想尋覓性伴侶,定係你想透過唔同嘅性伴侶去體驗與唔同女性發生性行為時嘅感覺?

如果係前者嘅話,其實係好多長久嘅情侶或者夫婦都會面對嘅情況,但並唔係冇辦法改變嘅,你可以嘗試同女朋友傾吓,睇吓大家會唔會可以嘗試下一啲新嘅情趣體驗,例如嘗試吓新嘅體位、性玩具或者喺新嘅環境下進行性愛,都可以增加性關係嘅刺激同新鮮感 :heartbeat:

而如果係後者嘅話,的確係你同女朋友對於性持唔同價值觀嘅情況下,就只有結束關係、維持現狀或者出軌三個選擇,好難有兩全其美嘅方法。相信你都預想到依三個選擇分別會為你帶嚟咩好同壞影響,每個選擇都要有所取捨,我哋唔會建議你一定要選擇邊一個方法,因為呢個亦都係你個人嘅決定,只係見你都着緊女朋友嘅感受,或者你係做決定嘅時候,都可以考慮吓每一個選擇對你女朋友黎講會有咩影響 :thought_balloon: