因為近排嗰度有啲痕同汾泌 屋企人話睇婦科 但係我16歲有性經驗 去check會唔會check到？如果我話自慰自己整穿 會唔會話比屋企人知？
thxxx
你好呀 @qwerty123 
你話你近排有啲分泌，都想知道你啲分泌係點樣架？有無話黃綠或者有豆腐渣狀呀？同埋你所講嘅嗰度係外陰定係陰道裡面呀？ 
你唔洗擔心住，可以去檢查咗先，因為陰道有痕嘅情況有可能係細菌感染或者念珠菌等等嘅情況，呢啲都未必一定係透過性接觸先會有嘅，例如細菌感染咁樣，其實有可能係內褲洗得唔乾淨，或者唔透氣等等嘅原因導致嘅。而念珠菌就係一直都係你陰道內存在緊嘅，平時身體無咩事嘅時候。佢地嘅數量比較少，因此唔會出現任何情況。但係如果你食緊藥、用緊抗生素、著啲好緊嘅內褲等等，都有可能令念珠菌大量繁殖，最後變成陰道炎。所以都真係要俾醫生啲咗先，咁先會知道你發生咩事嘅。 
另外，陰道前膜（俗稱處女膜）可以因為做運動嘅情況破裂嘅，你所講嘅自慰都有可能嘅，亦都有啲人天生就無陰道前膜嘅，所以都唔洗擔心架。 
其實一般婦科醫生你同佢講咗咩徵狀，醫生就大概知道你嘅情況架啦，佢都會循例問下你有無性經驗嘅，就唔會話一定要你訓上床檢查你陰道前膜有無穿嘅，除非你陰道裡面係有痕癢，醫生就會叫你訓低檢查下啦。你可以同屋企溝通返去到婦科嘅時候單獨見醫生，睇下可唔可以。又或者你可以可以選擇去家計會單獨見醫生，家計會都可以幫你做到性病嘅測試嘅，因為疫情嘅關係，你可以打電話去家計會睇下佢哋嘅現時服務情況係點樣嘅。放心，通常醫生都會問一啲相關嘅資料例如月經嘅情況、性行為嘅情況等等，都唔會話第一時間就要話俾你屋企人知嘅，可以放心架。 