2/11-20/11係上次黎m,12月有2次性行為，男朋友全程戴套同拎出黎射。但12月到今日都冇黎m,只係12月中有1-2日有小量啡色分泌物。我同我男朋友 都好擔心唔知點算好
你好呀 @Kynn
睇到你講話你之前嘅性行為「男朋友全程戴套同拎出黎射」，其實都無咩懷孕嘅風險嘅，唔洗咁擔心架。 
其實月經來遲嘅原因有好多，例如睡眠時間不足、生活作息唔固定、精神過於緊張、生活壓力大、生活或者飲食習慣改變等因素都會有影響。排除左懷孕風險的話，都可以睇下最近係咪有咩特別因素（如藥物因素、情緒因素）影響，導致出現月經延遲嘅情況。 
如果真係好擔心嘅話， 可以選擇性行為11日後驗孕 。一般受精卵著床需要6-9日，所以性行為7日後驗孕已經可以有初步結果。而性行為11日後驗孕，就會比較準確同埋可靠啦，不過記住要跟返說明書嘅指示同埋係指定嘅時間內睇結果呀。
都想知道你平時嚟月經係咪都係咁長架？或者有無食緊藥？之前有無食過緊急避孕藥呀？最近會唔會情緒波動好大或者生活習慣有改變呀？因為見你話對上一次月經係2/11-20/11，都屬於一個比較長嘅時間，有時身體一啲肉眼察覺唔到嘅嘢，例如荷爾蒙嘅變動等等都會令月經週期耐咗嘅，如果之前都無試過係咁嘅話，你都可以去見一見醫生，醫生都會幫你檢查咗之後視乎情況有可能幫你開啲催經嘅藥嘅。如果你打算去睇醫生嘅話，其實就唔洗再自己驗孕嘅，因為一般情況下醫生都會幫你驗埋孕嘅。亦都可以上去家計會度睇醫生啦，因為疫情嘅關係，你可以打電話去家計會睇下佢哋嘅現時服務情況係點樣嘅。 
我冇食過任何藥。呢幾個月每次都係隔30幾至40幾日先黎m
就黎考試有壓力唔知關唔關事同埋呢排有啲夜訓
針對呢個月嘅狀況，其實就黎考試有壓力，同埋夜訓，的確有機會係月經來遲嘅原因 
。如果之前幾個月都係隔30幾至40幾日先來經，而今次都有明顯嘅因素令月經有機會來遲，咁都可以再嘗試等多少少時間先啊。上文你提及到發生嘅性行為，都因為全程都有戴安全套，所以懷孕嘅風險係好微，可以撇除懷孕嘅影響先 。
特別見你都提及到呢幾個月每次都係隔30幾至40幾日先來經，都想再了解多少少，咁呢幾個月之前你嘅月經週期係大概隔幾耐？呢幾個月又有無好似 @Kaleo_StickyRiceLove 提及過咁，生活上有特別嘅改變（例如呢幾個月作息都比較唔定時、情緒比較有起伏等） ？如果月經相隔比較長嘅時間，係突然無咩原因咁出現的話，都會建議去睇睇醫生，了解一下月經週期變長嘅原因啊
最後，祝你考試一切順利
以前月經周期最多都係三十幾 係呢半年先越黎越長。同埋前幾日用驗孕棒係冇事，但一日唔黎都仲係好不安
同埋上個月21-23 有黎過小量啡同粉 我唔知果次計唔計黎m?
知道你一直唔嚟M，就算全世界話俾你聽唔會懷孕，你一直焦慮嘅心都係放唔低。 
如果真係好擔心嘅話，都可以試下再驗多一次呀，但係呢次就要拎住個結果同自己講：「嗯，我無懷孕，唔洗擔心。」然後就回歸正常嘅生活啦。 其實你都知道「男朋友全程戴套同拎出黎射」，所以你係理智上都知道懷孕嘅風險好低，但係都係好擔心好擔心，咁你就要諗吓你最相信嘅係啲咩啦，係驗孕棒？係論壇同你傾計會比較放心？定係真係要去驗血先至放心？又或者你可以另行一條路，就係選擇順其自然，放鬆心情，回歸自己嘅生活步調，等待你一直都唔穩定嘅月經到訪，因為你知道，月經嚟到先會令你最放心。 
一直令自己處於擔心同焦慮之中，都會延緩月經嘅到來，試下做下自己鍾意做嘅嘢，話唔定月經好快就嚟搵你架啦。
Thank you