事源我12月4號食左事後丸，8號有撤退性出血，黎左四日就冇血，之後我12月26號同31號亦有發生性行為。月經app顯示我1月8號就要黎M，但係我今日（11號）都未黎，前幾日買左棒驗，係negative但係我唔係用晨尿，支棒就話適合早孕測試同埋早晚都可以驗。我一向月經都算準時，但係兩個月前仲食緊抗抑鬱藥，而家停左，有時會因為壓力情緒早到，但未試過遲幾日，所以我好懷疑到底係我食事後丸造成亂經，定係我太緊張太大壓力導致遲M，定係我用錯方法驗孕導致唔準
係呢幾日冇黎M我都好擔心…希望可以解答下我啦麻煩曬
追加，我驗孕前已經有胸脹痛同腹脹，今日都係一樣，我想知係經前症候群定係懷孕初期
Hello 
首先想同你解釋返，月經係由人體幾個繁複嘅系統互相影響下形成嘅生理現象，所以好容易受到其他因素影響月經週期嘅長度，例如飲食、作息、荷爾蒙分泌、服藥、情緒等等，都會影響到月經。所以app嘅日子只係一個參考唔可以作準，每一次月經都係新嘅週期，未必會同之前一樣。你呢排休息得唔夠或者壓力大、情緒緊張，其實都可以令到月經遲來。 
而你喺上個月亦有服用緊急避孕藥，你嘅事後丸係咪經過醫生處方後先服食嘅呢？因為事後丸係香港係屬於醫生處方藥物，唔係所有人嘅身體狀況都適合透過事後丸去緊急避孕嘅。例如你本身有服食抗抑鬱藥，都未必係適合服食事後丸架。 
緊急避孕藥係用高劑量嘅荷爾蒙干擾排卵或干擾受精，從而達致緊急避孕嘅效果。而緊急避孕藥嘅其中一項副作用係會影響月經週期，可能會提前或者延遲，亦有機會影響月經嘅血量，而呢種情況因人而異，一般只會影響一至兩個月經週期。加上你早前有服食過抗抑鬱藥物而最近停咗藥，呢個轉變本身都係可能影響到月經周期嘅原因，而我哋亦可能預計身體需要幾多時間去適應同調節。所以既然現時驗孕結果係無懷孕的話，都唔需要太過擔心月經未出現。 
你講到話食完緊急避孕之後有出血。通常撤退性出血會係服藥一星期後出現，因為子宮內膜在藥物影響下發生變化，而一星期後冇咗藥物支持就會脫落，造成好似月經咁嘅出血現象。但其實幾時會出現呢個現象、出血血量多少、時間長短都會因人而異，係本身月經周期嘅一邊階段服食緊急避孕藥亦會影響實際嘅出血情況。不過通常血量唔會超過平時月經嘅量，時間亦唔過7日。
而你所講嘅胸脹痛、腹脹，呢啲症狀的確係經前同懷孕初期都會出現，亦有其他因素影響。例如消化不良亦可能導致腹脹。所以我哋好難單憑呢啲症狀去判斷係咪懷孕嘅。 
而關於驗孕嘅問題，驗孕棒嘅原理係透過檢測尿液中嘅人絨毛膜促性腺激素（hGC) 水平去驗出懷孕結果，hGC只會喺有懷孕嘅身體中出現。通常性行為後7日驗會得到初步結果，11日後驗會得到較為準確嘅結果。現時嘅驗孕棒其實有好高嘅準確性，好多牌子用任何時間嘅嘅尿液都可以驗測到結果；但通常我哋都會建議用晨尿，因為晨尿中嘅hGC濃度會相對高，會更加容易得到準確嘅結果。你距離12月31號發生嘅性行為已經過咗11日，所以驗孕得到嘅結果都相對係比較準確。如果你擔心自己驗孕出錯，咁可以再進行驗孕。你可以考慮買兩個唔同牌子嘅驗孕棒，依照包裝說明書嘅指示驗孕，並喺指定時間內睇結果。
如果再次驗孕嘅結果都係冇懷孕，咁就唔需要擔心。只要耐心等候、放鬆心情，月經會來。另外如果你係由家計會診所處方事後丸的話，醫護人員應該有為你安排一個覆診嘅日子，到時都會再幫你驗孕為你確認結果，你都可以考慮等到個陣再覆驗呀。
發生性行為嘅時候全程正確使用安全套先可以大大減低意外懷孕嘅風險，關於正確使用安全套嘅資訊可以參考返： https://www.instagram.com/p/B4EX0FVFLUf/?utm_source=ig_web_copy_link 。
如果你同伴侶唔想使用安全套，都可以考慮使用荷爾蒙避孕法，例如口服避孕藥同避孕針。又或者使用子宮環進行避孕。食口服避孕藥之前要諮詢醫生，睇下你嘅身體是否適合同埋適合邊一種藥；而避孕針同子宮環就一定要由醫生評估咗你嘅身體狀況先。而家計會診所同埋部份私家診所都有呢啲服務提供嘅。
使用安全措施，咁就可以更加安心地享受性行為啦。 
多謝你嘅回覆呀
因為我一向飲食都冇就住，就算月經黎我都照飲凍嘢又食雪糕，但係我以前就冇影響嘅，只係M果陣血係深紅色同有時有血塊，上網睇過唔知係咪宮寒…但我平時手腳都唔會特別凍又怕熱，所以我都唔知我係咩體質…
另外其實我已經谷左好耐M每日都feel到個子宮唔舒服，但等左個幾禮拜都仲未黎所以搞到個人好容易煩躁又不安…