一向黎m都唔準
31/10 有sex 有戴套
31/11 黎左m
但直至依家都冇再黎m
會唔會有左bb?
明明冇乜壓力，點解都唔黎m?
Hello~ 首先經期係會受好多唔同嘅因素影響嘅，除咗壓力之外，生活作息習慣改變、生病服食過藥物，又或者係荷爾蒙轉變都會影響經期嘅長短，所以月經遲咗嚟唔一定係等於懷孕嘅，加上你提到本身你嘅經期都唔係太穩定，所以如果你有記錄經期嘅習慣嘅話，可以先睇返以往最長嘅經期係幾多日，如果今次嘅經期係未超過嗰個日數嘅話，都唔使太擔心住嘅，可以先嘗試放鬆心情，月經就自然會嚟㗎 
而照你所講嘅情況，只要每次性行為嘅時候都有正確咁使用安全套，懷孕嘅機會係好低嘅 
而且懷孕後其中一個明顯嘅症狀係停止來經，所以現時可以肯定嘅係31/10果次嘅性行為並冇懷孕嘅風險 有關正確配戴安全套嘅方法可以參考我哋IG嘅依個post，入面仲有影片示範配戴步驟 https://www.instagram.com/p/B4EX0FVFLUf/?igshid=1wbqlrqw6s3mv
不過如果真係好擔心懷孕嘅話，可以喺最近一次性行為嘅7日或者11日後進行驗孕，因為驗孕棒係透過檢測尿液入面嘅人絨毛膜促性腺激素(hGC)水平去測出懷孕結果，依種激素係受精卵着床之後會開始分泌，而受精卵着床大概需要6至9日嘅時間，所以驗孕棒最早可以喺性行為嘅7日後測出初步結果，而喺性行為嘅11日後檢測嘅結果會更準確，你可以買兩個唔同牌子嘅驗孕棒，並按照說明書嘅指示進行驗孕，如果兩個嘅結果都係陰性嘅話，咁就應該係無懷孕啦
如果過咗以往最長嘅經期日數都未黎經嘅話，就建議去睇醫生了解吓身體狀況同埋有冇需要調理下經期 
請問可唔可以解釋下點解現時可以肯定嘅係31/10果次嘅性行為並冇懷孕嘅風險？
我以前聽過人講，以為黎左m，但原來都係有bb
睇返你之前所講，你10月31號發生性行為，11月31號月經到。月經嘅出現係因為卵子喺冇受精嘅情況下，連同子宮內膜增厚嘅組織通過陰道排出體外。通常月經嘅出現係代表冇懷孕。。即係證明，喺10月31號至11月31號期間，卵子冇受精，所以可以肯定10月31號發生嘅性行為冇導致你懷孕。
而你所講嘅「以為黎左m」應該並唔係月經，而係因為其他原因出現嘅陰道出血。如果有陰道出血並且有懷孕，咁應該係出現咗「著床性出血」，通常喺受孕後、因為受精卵喺子宮壁著床（大概係性行為發生6－9日後）而造成。但同月經唔同嘅係，著重出血通常血量只有少量，而且通常時間為1至2日，比月經較短。著床性出血亦唔係一個懷孕時常見嘅情況，而且如果已經懷孕但係著床後嘅日子出現大量同持續出血，都唔係健康嘅跡象，有機會係胚胎有危險或者有宮外孕。
其實距離31／10當日嘅性行為都已經超過2個月嘅時間，如果擔心個次嘅性行為有導致懷孕的話，現時用驗孕棒去檢查已經會有非常準確嘅結果。如果你覺得月經嚟咗都唔能夠令你確信自己無懷孕，不妨用驗孕棒檢查一下，令自己放下心頭大石。而且如果係今次之前你未試過間距咁耐都無嚟經，呢段時間內又無發生過咩特別事（例如Ana所講嘅有壓力、情緒波動、服用過藥物、生活習慣有改變等等），都建議搵醫生檢查一下。有時荷爾蒙水平嘅變動都可以導致月經周期有明顯嘅變化，而如果相距比較耐嘅時間都未嚟月經，醫生都會按情況處方荷爾蒙藥物去催經架～ 