想了解下避孕藥

同男朋友有keep住sex,但係我地都唔打算有bb住,所以就算用左套都好驚,諗住食避孕藥,但係又有太多唔知既野,係家計會website睇到避孕藥有副作用,好似好辛苦咁,同埋長期食住藥,將來想要小朋友友既話會唔會好麻煩嫁?會唔會影響經期?

Hello @Bombala :blush: :wave:t2: 的確如果戴安全套嘅同時,如果可以配合埋避孕藥一齊避孕,避孕嘅成功率會更高。所以針對你同男朋友嘅需要,服用避孕藥都係一個可取嘅方式,去進一步減低懷孕風險 :wink:

避孕藥嘅副作用,主要係服用初期發生,荷爾蒙類避孕措施嘅適應期一般都係3至6個月。身體就會慢慢適應藥效,令副作用嘅情況慢慢紓緩或者消失。所以無需太擔心長期服用,副作用會依然好明顯或者好辛苦 :relaxed:。一般過咗適應階段,副作用嘅情況就會有明顯嘅好轉,甚至部分人適應咗之後,係能夠完全唔覺有副作用出現。

如果你係第一次服用避孕藥的話,一般都會建議服用避孕藥之前,必須諮詢醫生嘅意見,等醫生評估你嘅體質/生活習慣,係咪適合服用避孕藥,或者適合服用邊一個牌子/款式嘅避孕藥:relaxed: 因為每個牌子/款式嘅避孕藥內含有嘅荷爾蒙類型同埋劑量都會有唔同 ,有機會某部分避孕藥唔適合你嘅體質,係有機會引致嚴重嘅副作用。 避孕藥亦並非每個人都適合服用 ,一般常見唔適合食藥嘅情況,例如有心血管疾病、不規律陰道出血、體重過高等。

第一次服用避孕藥時,都建議月經期間開始服用。同埋雖然係月經期間開始服用,不過都建議服用避孕藥頭7日時,都配合番阻隔式嘅安全措施(安全套)使用,因為有機會適應不良嘅時候,會出現嘔藥嘅情況,而減低避孕藥嘅藥效,增加懷孕嘅風險。

正如上文提及每個牌子/款式嘅避孕藥,內含嘅荷爾蒙同劑量都唔同,萬一副作用情況真係令你好辛苦的話,亦唔應該勉強自己,到時可以再同醫生討論有無需要換藥,或者嘗試其他嘅避孕措施 :woman_health_worker:t2: :man_health_worker:t2:。過往我地嘅服務中,亦聽過有女性服用避孕藥後,出現較嚴重嘅副作用,例如呼吸困難、喉嚨有血腥味,懷疑出現靜脈血栓栓塞狀況。

其實現時會出現嚴重副作用嘅情況已經好少見,因為市面上嘅避孕藥都係非常安全。不過為咗避免類似嘅情況發生,我地都好建議服用前諮詢醫生意見,始終有時自己身體出現咩嘅狀況,可能唔太清楚如果醫生評估過後都覺得ok,咁都無需太擔心啊 :relaxed:。一般初期都係出現頭暈、有噁心感覺/嘔吐狀況等副作用,但係狀況通常都比較輕微。如果副作用都係好影響你日常生活時,亦都建議睇醫生,睇下係咪需要換藥啦 :blush:

未來想懷孕的話,其實停服避孕丸後,就會即時恢復生育能力,亦會有懷孕嘅風險。所以都要提醒番,如果到時停藥嘅時候,其實係未準備好懷孕,咁就要記得戴番安全套,減低懷孕嘅風險啦。一般1至2個月內就會回復自然嘅排卵及月經週期,所以都唔算太麻煩啊 :smiling_face_with_three_hearts:。而曾服用避孕丸嘅婦女較非用者,喺生育及胎兒健康方面並無分別。

服用避孕藥嘅其中一個功能,係幫助我地調整經期。透過控制體內嘅荷爾蒙含量,令我地嘅經期調整作28日嘅月經週期 :blush:。服用初期,可能身體喺適應階段時,會出現不規律嘅陰道出血,或者月經週期日數會比較唔穩定。但係隨著慢慢適應,經期一般就會變得穩定~ 所以都無需太擔心服用避孕藥後,會長期影響月經週期變得唔穩定啊~ :relaxed:

想了解更多有關口服避孕藥嘅資訊,都可以參考埋《衛生署藥物辦公室-口服避孕藥》嘅資訊,裏面都有提及避孕藥嘅選擇,同埋服用期間有咩情況需要留意 :blush:
https://www.drugoffice.gov.hk/eps/do/tc/consumer/news_informations/knowledge_on_medicines/oral_contraceptives.html

你好!多謝你嘅回覆!
如果要問醫生意見既話,一般係睇家庭科醫生就得?定係要家計會先得?一般食藥初期會有咩副作用?

我平時日日都要食藥,但係成日唔記得,見到有避孕針,係咪每個月打一次就得?

Hello :gift_heart:

如果要諮詢醫生,私家診所嘅家庭醫生同家計會嘅醫生都係可以嘅;而母嬰健康院亦有提供呢個服務,不過要提前預約同可以預約嘅時間相對比較少。你睇開嘅家庭醫生會比較了解你嘅身體狀況同過去有冇咩醫療需要,而家計會醫生則可能相對更加熟悉避孕藥物可以俾更多資訊你,你可以根據你嘅需要選擇。 :wink:

食藥初期因為身體要適應人工荷爾蒙,所以可能出現一啲副作用。例如:作嘔、輕微陰道出血、乳房脹痛、體重增加、頭暈、情緒波動、皮膚狀況改變等等。 :persevere:通常身體適應藥物之後副作用就會消失。身體適應藥物嘅時間因人而異,1至6個月不等。而且呢啲副作用因人而異,未必每個人都會有。但如果副作用令你覺得好唔舒服,咁就要諮詢返醫生,睇下係咪隻藥唔適合你,要換藥或者使用其他避孕方法。

有啲人都係擔心每日食藥會因為唔記得而漏食,所以會選擇打避孕針。避孕針同避孕藥原理一樣,都係通過人造荷爾蒙避孕。避孕針分為兩款:第一種係單一荷爾蒙避孕針,三個月注射一次;第二種係混合荷爾蒙避孕針,一個月注射一次,由於含有雌激素,未必每人都適用。使用避孕針初期亦會有一啲副作用,例如體重增加、頭暈、頭痛、乳房脹痛、月經不規則、經量減少。 :confounded:呢啲副作用都係因人而異,未必個個會有,如果出現嘅話會短期內消失。如果副作用嚴重,出現嘅時間長,咁就要諮詢醫生意見。 :woman_health_worker:t2: :man_health_worker:t2:
不過同避孕藥唔同嘅係,視乎你使用避孕針嘅時間長度,停止注射之後都需要一段時間身體先會恢復生育能力,所以唔建議短期內有生育打算嘅人。打避孕針前都係要經過醫生檢查,確定你嘅身體適合使用。某啲私家診所、家計會同埋母嬰健康院都有提供呢項服務。通常家計會要求經期頭7日內打針,所以如果你考慮使用避孕針,可以喺月經來潮期間打電話預約。 :blush:

如果你比較擔心荷爾蒙避孕法會帶來副作用,都可以考慮下子宮環呢一種避孕方法。子宮環係一種長期嘅避孕方法,要經醫生做詳細嘅身體檢查同盆腔檢查確定適合使用之後放置入子宮腔入面,通過改變子宮內環境達致避孕功效,避孕成功率有99.4%。而當你決定生育嘅時候,可以經醫生取出子宮環,就立即有懷孕機會。現時家計會、母嬰健康院同某啲私家診所都會提供呢項服務嘅。 :sparkling_heart: