可以接受有愛無性嘅關係
唔會主動要求性行為
但對方有要求嘅話，我又完全唔會抗拒
應該就唔係asexual喇
但係又好似唔係demisexual
唔係唔肯就應該唔算性冷感啦
定係我根本好正常
我係男
Hello 
首先想同你講，性同感情呢啲嘢，每個人嘅感受同經歷都唔同，係冇一個客觀而統一嘅標準嘅。所以，無論你對性嘅需求如何，都無話「正常」或者「唔正常」。只要你覺得舒服嘅就係啱你嘅。 
通常asexual（無性戀）係指性喺擇偶條件同親密關係入邊唔係必要嘅，或者唔存在嘅。而demisexual（半無性戀）係指平時甚少感受到性吸引，只有同對方產生咗強烈嘅情感連結之後先會感受到性吸引。但要注意嘅係，無性戀光譜好大，族群入邊可以有好多種多樣嘅人。就好似每個人都獨一無二一樣，無性戀族群入邊每一個個人對於性同性別身份嘅睇法都可能唔同。 
可能你而家想探索自己，想知道自己係咪同其他人唔一樣就係「唔正常」。但每個人嘅相處方式都唔同，只要你同伴侶相處得舒服，就冇問題嘅，唔需要太在意其他人係點樣。就算係有性戀嘅關係入邊，都可能有唔想發生性行為嘅時候。如果你同伴侶溝通過，大家都覺得冇問題，咁就唔需要擔心啦。 
同埋如果你唔介意，都可以同我地分享多少少點解你咁想搵到一個名稱去形容自己嘅性身份？其實香港對於唔同性別小眾嘅討論都唔係太多，未必有好足夠嘅資料話到每一個身份標籤係咩意思。我地唔需要去搵一個性別身份嘅標籤，然後覺得自己有啲似個標籤所講嘅特點但又有啲唔同，然後就好擔心係咪自己有問題。唔應該係我地去為標籤而質疑自己，而應該慢慢探索出一個最適合用來形容自己嘅標籤。同埋想搵到一個形容到自己嘅標籤對於你來講係咪有咩影響或者意義？其實有時有標籤都未必係件好事，我地唔需要用標籤去限制自己嘅。 
1個讚