擔心非淋病情

12月同sp有過高危性行為,之後陰部好痕就去咗睇家庭醫生,當時家庭醫生話可能係細菌感染,開咗啲消炎藥同抗生素比我,當時我食咗三四日就冇病徵了。我食完一個療程(7日)之後過幾日就黎M,黎完M幾日都好似冇咩事。點知上兩個禮拜又好似出現病徵,之後就去咗社衛睇。社衛抽咗血同分泌物,初步睇話我係非淋,開咗7日Doxy比我。依家食到第5日都仲有病徵,係咪因為之前開嘅抗生素唔夠力殺唔死,之後依家有抗藥性?非淋係咪會好難斷尾?

非淋,即係「非淋菌性尿道炎」,係所有唔係由淋病引起嘅尿道發炎嘅統稱。非淋可以由幾種細菌導致,包括衣原體、生殖道支原體、人型支原體等等。 :persevere:
非淋係可以通過適當嘅抗生素治療之後痊癒嘅。同埋要喺完成醫生處方嘅療程,一至兩個星期左右(視乎醫生同你講嘅跟進測試日期)後去覆診,確保療程有效。如果仍然有症狀或者仍然有病菌,醫生會幫你進一步治療。 :woman_health_worker:t2: :man_health_worker:t2:
每個人嘅身體狀況唔同,病菌嘅嚴重程度唔同,對於藥嘅反應都會有啲唔同。好明白你擔心自己嘅身體未好返、好緊張,但而家首先你要服用埋剩低嘅兩日藥完成整個療程先,如果食完整個療程藥仍然有病徵就要去睇醫生,醫生會根據你嘅情況調節藥嘅品種或者劑量繼續治療。所以唔使擔心斷唔到尾嘅。 :blush:

至於你所擔心係咪出現「抗藥性」嘅問題,抗藥性係指以唔恰當嘅方式(例如無完成整個療程、無跟從醫生指示、過分服用等等)去服食抗生素,而令體內嘅細菌無法被完全消滅,倖存嘅細菌因而出現基因變異而變得難以靠原本嘅抗生素去消滅細菌。不過你嘅情況就未會引致抗藥性嘅出現嘅,一來你係經醫生嘅判斷先服用抗生素,亦有完成嘅療程,唔算係唔恰當嘅使用。而且好多抗生素都可以用作殺滅一種或以上嘅細菌,特別係好似非淋病性尿道炎咁,好多時都係由不同嘅細菌引致,但都係透過處方同一隻抗生素去殺滅,當時醫生都係判斷為細菌性感染,所處方嘅抗生素都有機會係可以殺滅都引致非淋病性尿道炎嘅細菌。而且其實我哋都唔能夠100%肯定你第一次睇醫生嘅時候,當時嘅病徵係咪因為非淋病性尿道炎而引起,都有機會係其他嘅細菌性感染,所以都唔需要太擔心關於藥物嘅問題啊~如果你仲有保留上次醫生處方俾你嘅抗生素藥名,可以係去社會衛生科覆診嘅時候帶埋去等醫生再作判斷。 :wink:

同埋喺呢段時間內都要做好日常清潔同護理。每日要用溫和嘅暖水溫柔地清潔陰部,要著棉質乾淨嘅底褲,同埋鬆身嘅裙或者褲。記得飲多啲水同埋唔好忍尿。 :relaxed:

記得下次發生性行為嘅時候,要用安全套、口交膜、指套呢啲安全措施(關於正確使用安全套嘅資訊,可以參考: https://www.instagram.com/p/B4EX0FVFLUf/?igshid=1bfquu6hsioj1 ,而關於口交膜同指套嘅資訊,可以參考: https://www.instagram.com/p/B57ZtvGlckR/?igshid=zqn5jv130m06 )。咁就可以更加安心咁享受性啦。 :smiling_face_with_three_hearts:

多謝解答。雖然暫時都未有好轉嘅跡象,不過我都會食埋嗰療程先,以防萬一。
因為我覺得我嘅病徵都同念珠菌感染好似,有冇機會社衛嘅醫生誤診咗?因為社衛啲醫生係話我有發炎細胞,所以判斷係非淋,但仲等緊報告,但社衛嘅報告好似唔包括驗念珠菌?但念珠菌感染發炎都係炎症嘅一種?
呢幾日我上網做咗啲research,見到治療非淋用嘅藥同念珠菌嘅藥係唔同的,會唔會有機會係用錯藥,所以我嘅病情先冇好轉到?
你地覺得我應該食完呢個療程再返社衛複診,定食完呢個療程去睇私家醫生檢查好啲呢?
萬分感謝!

sorry 可能我一開頭講得唔太清楚,社衛醫生話見到我有發炎細胞,判斷我係「非特異性生殖道感染」,通常會係因為衣原體導致。

我一開始都擔心會係感染性病,因為我第一次係12月10號同sp冇帶套做,有清潔乾淨身體。之後身體冇咩特別。第二次喺12月19號有戴(中間冇套插咗幾下),但係sex之前冇沖涼,sex後有。之後第二日,即係12月20號我下體就好痕,21號就去咗睇第一次私家醫生。想請問會唔會係因為咁惹到念珠菌?而唔係「非特異性生殖道感染」?

「非特異性生殖道感染」(女性生殖道感染)其實即係「非淋菌性尿道炎」(男性生殖道感染),佢嘅病徵包括下陰痕癢、 陰道分泌增加、盆腔或小腹疼痛、排尿困難、性交時感到痛楚、有非經期陰道出血等,而念珠菌陰道炎嘅病徵就包括陰道分泌會增加、變黃、呈豆腐渣狀,外陰痕癢,陰道疼痛,或性交時感不適等,所以兩者嘅病徵的確係有啲相似嘅,只係念珠菌陰道炎並唔會經性行為而感染。不過都唔洗太擔心,社會衛生科係會檢驗到導致發炎嘅係衣原體定係念珠菌嘅,所以你宜家可以先等待檢查報告結果,再按報告決定就醫嘅方向 :blush:

多謝你地詳細嘅解答 :bowing_woman: 釋除咗我一啲嘅疑慮,唔該晒你地!