我食咗Yaz嘅避孕藥兩個月，我係19/1開我第三盒避孕藥，同時係個日黎M（19/01-22/01）。而我係24/1有發生性行為，冇用套。我24/1都有食藥嘅。但係我係今日（25/01）食避孕藥個陣發現我食漏咗一次避孕藥，而且我係唔知幾時食漏咗。我即時補食返，所以我今日食咗兩粒避孕藥。請問我懷孕嘅機會大唔大？需唔需要睇醫生食事後？thanks 
我啱啱都係即時去咗睇醫生，因為係漏食嘅24小時內冇補食到，醫生建議都係食事後，然後之後嘅避孕藥再正常食返。Thanks 
Hello
首先都想了解返，你食呢隻避孕藥之前有冇諮詢過醫生意見㗎？因為唔係每個人都適合食避孕藥，而且市面上有好多唔同牌子同劑量嘅避孕藥。所以建議喺第一次食避孕藥之前，要睇醫生，等醫生評估你嘅身體狀況係咪適用避孕藥，同埋根據你嘅狀況建議適合你嘅種類同劑量。現時部分私家診所同家計會診所有提供呢個服務嘅。 
發現漏服藥物之後，應該立即補服漏咗嘅個粒藥，然後再喺每日應該服藥嘅時間服食當日個粒藥。但如果漏食兩粒藥，就要向醫生查詢補食嘅方法。
你已經服用避孕藥2個月，如果身體冇咩唔舒服或者副作用，咁你嘅身體應該已經適應咗藥物，產生比較穩定嘅避孕嘅效果。按日子去計算，你係係20號至23號期間有一日唔記得食藥，今日25日先發現的話原則上已經過咗補食藥嘅時間（YAZ嘅補食時間係24小時）。不過呢幾日期間你都係嚟緊M，而且發生性行為當日（24號）同之後果日（25號）你都有準時食藥，會導致意外懷孕風險都相對比較低嘅，唔使太擔心。
如果你依然擔心有意外懷孕風險，你都可以睇醫生資訊下醫生意見，睇下需唔需要食緊急避孕藥。如果你衡量完，覺得唔想食緊急避孕藥，而你又擔心有風險，你可以自行驗孕，通常性行為後7日會有初步結果，而11日後會有比較準確嘅結果。 
見你有漏服藥嘅情況，你都可以考慮用一啲app提醒同埋記錄你每日服藥，咁就可以減少食漏藥嘅情況發生啦。 
原本一直食開嘅避孕藥係家計會啲護士建議嘅。而我漏食咗一粒，我都唔知要唔要食事後藥。不過我好擔心食事後越遲食效果越差，所以係我發現我食漏咗一日藥個陣，我即係睇醫生。不過對方醫生話唔係好了解我呢種情況，但係基於我係24小時內都冇補食返啲藥會有懷孕嘅風險，佢都係比咗事後藥我食。而我食完藥之後一直都好擔心食避孕藥過量呢個問題（因為我食咗兩粒避孕藥加一粒事後），加上事後嘅說明書寫漏食三片或以上先要食，咁夠竟我有冇食多到呢？食多咗對身體會唔會有啲不良嘅影響？我都好疑惑，所以我係今日約咗睇家計會嘅醫生。
同埋，我發現淨係用一種避孕方法真係唔太好，我真係唔想再食事後藥啦，因為食完真係會好唔舒服，所以我同男朋友傾完都同意以後都係避孕藥＋套，咁對大家都好啲。
最後，好多謝你覆得我咁快同咁仔細呀，感激不盡。
首先欣賞你有就住服食避孕藥同事後藥嘅情況主動約見醫生，亦都有同伴侶商量較適合你地嘅避孕方法 
緊急避孕藥分為單一荷爾蒙（黃體酮）以及黃體激素受體劑兩種，單一荷爾蒙（黃體酮）嘅服藥時限係性交後嘅 72 小時內，越遲服藥，失敗率越高；而黃體激素受體劑嘅服藥時限係性交後嘅 120 小時內，服用時間唔會影響效果。但要注意嘅係，只有單一荷爾蒙（黃體酮）先可以同避孕藥一齊服食，因為黃體激素受體劑係會降低避孕藥嘅功效嘅，所以如果你服用嘅係單一荷爾蒙（黃體酮），就先唔需要太擔心會影響避孕藥嘅功效 
至於擔心服食過量荷爾蒙藥物方面，事後藥嘅唔可以喺同一個週期內服用多於一次，所以你係無服食過量嘅，而你服食緊嘅Yaz避孕藥係屬於超低劑量類型，所以都唔需要太擔心會服食過量嘅荷爾蒙藥物