焦慮感好重

Hello
話咁快踏入事前藥第8個月了
我發現呢八個雖然都好準時食藥 好準時尼m
但我嘅惡懼感係每愈倍增 好似同人行反方向咁。。。
我已經停止性行為兩個月,但不安感好似仲嚴重咗

因為擔心自己做錯開始諗好多問題
例如飲食方面,查過好多食物吾食得
茶,咖啡,西柚,豆類,亞麻子好多好多
我緊張到每放野食入口都會google下咁濟

早排天氣凍
又怕氣溫影響咗排藥
驚自己白食

又會諗食藥都吾會一世
總會有日要停。。。

雖然好多野擔心 但我仍然每日準時食藥
不過已經兩個月無發生關係了
我好想幫自己搵出口

我同伴侶傾過
佢有支持我停藥 因為已經影響我生活
食左又吾做 都無享受過
佢都有提議由佢帶套

但我又開始諗帶套雖然少左生活上因為食藥
而驚飲食,病左有其他藥相沖,或者本身避孕藥風險嘅問題
因為數字上安全套吾夠避孕藥成功率高

佢都有用逆向方法同我解釋
即使做好保護都有意外 咁都係承受得起。。
已經係成年人,都有經濟能力。。。
我明白。。。
但有意外無人想。。。

有d人戴左套就好安心
有d人食左藥都好安心
至於我。。。。無論咩都覺得吾夠咁。。。

我已經停左兩個月比自己好好思考。。。
但我實在諗唔到方法令自己吾驚
好想解決
好想面對

呢件事困擾到我成日喊,覺得自己欠左伴侶
雖然佢從來無怪責我
亦都好專重我

但我就一直原地踏步
好羨慕咩都吾怕嘅大家
我可以點做。。。
我好想快d解決呢件事。。。

可吾可以答下我…

你好呀 @Ppp1 :wave:t2: :wave:t2:

欣賞你係避孕呢件事上面所作嘅努力,睇得出你做咗好多嘢,希望減低意外懷孕嘅情況。 :grin:

雖然你已經好努力,但係永遠都擺脫唔到嗰種恐懼嘅感覺,即使你做每一步都係小心翼翼,係飲食上係生活習慣上你都盡量希望將懷孕嘅風險減到最低,但係無論你點做都好,你都覺得唔夠,都係好驚唔小心做錯一步就會意外懷孕,睇嚟樣嘢已經影響緊你生活上嘅每一個細節。 :pleading_face:

你有個好好嘅伴侶,佢會同你一齊承擔,會同你傾,亦都冇怪責過你,仲好尊重你添,但係當佢越對你好你就越內疚,覺得連呢少少嘅嘢都俾唔到佢咁,自己亦都唔知點樣做好,好無助,就好似細個喺人群裏面蕩失咗路咁,覺得好慌張,而周圍嘅人都幫唔到你,你諗住靠自己,但係原來連自己都幫唔到自己。:persevere:

好想知道有咩原因令你咁驚懷孕嘅?

如果可以穿梭時空,你會返去邊個時間段,睇吓係幾時開始咁驚懷孕?

請你相信,呢個世界唔止你一個承受緊呢樣嘢,有好多人都好似你咁,每一日都無止境咁樣擔心緊會唔會懷孕,並唔係全世界得你一個人會咁樣諗。的確,好似你咁講,有啲人戴咗套就會好安心,有啲係食咗藥都會好安心,但係同時都有啲人即使做齊晒所有嘢都會好擔心。 :pleading_face:

好多時候人都會將一件事睇得好重要好重要,將懷孕所帶來嘅壞處睇得太過嚴重,「萬一我喺呢個時間懷孕,好多我想做嘅嘢都做唔到,好多我想實現嘅嘢都會失去晒,冇晒自由,成個人生都係養兒育女,我會後悔㗎。」「如果我係呢個時候大肚,屋企人會點樣睇我,朋友會點樣睇我,社會會點樣睇我,我唔敢諗呀。」「大左肚之後,我唔想生個BB出嚟就要落咗佢,好似殺咗個生命咁,好殘忍呀我做唔出,但又唔想放棄晒而家有嘅嘢,我唔識點面對啊。」 :sob:

我都想知道你嘅諗法又係點㗎。 :thinking:

其實依家有好多人都會採取幾種唔同嘅避孕方法,嚟提高避孕嘅成效,例如同時使用避孕藥同埋安全套,甚至用埋子宮環,你都可以試吓嘅,睇吓咁樣會唔會幫到你減少擔心嘅感覺。 :kissing_closed_eyes:

你已經將所有嘅嘢都聯想到同避孕相關,成個生活做緊嘅嘢就好似為咗避孕,為咗提高避孕嘅成效,你嘅飲食生活習慣都受到影響,不如我哋試吓用呢啲方法令你個重心唔好再停留喺避孕呢度。 :relaxed:

我哋試吓搵日搵一個舒服嘅地方,用一個舒服嘅姿勢,無論坐低又好,企喺度又好,甚至瞓低都好,我地試下做靜觀嘅練習。

一開始可以做3分鐘。

試吓深呼吸三下,然後再慢慢咁樣留意自己嘅呼吸,嘗試喺果段時間裏面將自己嘅注意力全部擺晒喺呼吸呢件事上面。

網上都有啲錄音可以俾你跟住做:

希望咁樣可以幫到你啦,可以再搵我地架,糖不甩嘅大家會陪你度過架。 :wink:

我記得已前幾年都只係靠伴侶外射
我都已經好信任佢 無驚過d咩野
直到上年四月
我突然有一下跳左制 驚自己會有bb
睇左好多醫生
驚左好多晚
終於去照超聲波 個醫生話我有子宮內膜異位症
有個瘤
叫我開始食避孕藥
個時一心就去曬呢個病到
直至第二次去照
醫生話咩事都無 個個月先叫放心d
食藥頭一兩個月都無咁驚
因為醫生都無特別講d咩 剩係話呢隻藥幾好
吾想食就帶返套
我又繼續食落去 不過每個月差吾多要尼m就會好緊張
雖然佢每次最後都係個日尼左

慢慢我開始睇好多有關避孕藥資訊
睇下點樣先可以令自己無咁驚
點知愈睇我精神就愈差
樣樣都話吾好食 食左話會影響藥效
連坐飛機都會增加風險

其實真係有咁多野吾食得?
我初時都無理 咩都照食

後來進化到 咖啡 茶 蒜頭 康鈣c 都吾敢飲

但上網d人又講到帶套無咁安全
好似個個都會經歷穿咁

其實我地都好忙
一個月可能先得3 4日有時間可以做

之前有提議過兩種方法一齊再加外射
但佢有啲吾開心 寧願唔要。。。

我都知我已經好過份 所以吾可以咁

其實一般食野係咪真係無問題?
我真係好想知。。。
起碼我吾會連食野都覺得吾開心。。。

仲有儲存方面
我見説明書寫30度以下
但網上又話15到25度
我一直都將排藥搵個袋仔裝住放係個手袋到
之前咁凍其實有無影響咖。。。

兩樣之間要取捨
可以點做。。。
吾食藥 風險會吾會仲高。。。

有無咩食物係特別吾食得?
我今日食過蒜頭 我見又係吾食得
於是又焦慮左成日。。。

一日三餐都要顧慮自己食嘅食物,會唔會影響藥效,我都感覺到你呢段日子都過得好辛苦,同埋自己好難放鬆落黎 :pleading_face: :cry: 無可否認網上有各式各樣嘅平台,讓我地有好多嘅渠道去搵自己想要嘅資訊。但係到底資訊嘅來源係咪可靠,又或者係咪適合自己嘅情況,就需要我地再加以篩選以及判斷。所以有時單單睇得越多資訊,都未必有助我地釋除到我地嘅擔憂或疑慮。

其實暫時無醫療文獻,有特別指名食咩食物,會減低避孕藥嘅功效及減低幾多成嘅避孕功效。只係部分藥物 :pill:與避孕藥同時服用嘅時候,有機會與避孕藥嘅藥物產生藥物相互作用,減低避孕藥嘅藥效。

所以除非醫生及藥物說明書有特別提醒,有咩食物唔建議服用避孕藥嘅期間服用,否則都無需擔心自己所服用嘅食物,對避孕藥嘅藥效有所影響 :blush:。所以一般嘅飲食係無問題啊,無需擔心。

如果你依然都係好擔心所食嘅食物會影響避孕藥藥效,都可以考慮將飲食嘅時間,與服用避孕藥嘅時間錯開,例如兩者之間起碼相隔4小時,確保藥物已經被消化咗之後先再食其他食物,又或者確保食嘅野都已經被消化先再服用避孕藥。雖然暫無根據係話食物係會影響避孕藥藥效,但係如果你內心係好擔心的話,嘗試錯開服藥及飲食時間,都可以減少到你覺得可能會出現嘅影響,同埋希望令你都可以安心一點啊 :blush:

藥物嘅存放方式,未必每一款藥物都一樣,所以儲存溫度上,建議跟番說明書上嘅指引就可以

服用避孕藥嘅同時,配合埋安全套一齊使用,避孕嘅成功其實都已經好高,而外射方面嘅需要,亦可以再同伴侶再溝通。

因為有依足正確步驟戴安全套的話,其實無需射精之前抽出嘅。 :grinning: 一般安全套嘅設計係有儲精囊,所以係有顧慮到使用者射精之後先抽出。當然你都可以選擇戴安全套嘅時候,射精前都就已經抽出,咁就可以避免到安全套因為射精時衝力太大而破裂嘅風險(如果戴套前手指有按實儲精位置先開始戴套的話,呢個機會率本身都好微嘅) :blush:

對於部分男性黎講,每次射精前都要算好時間抽出先射精,有時都會有一種無形嘅壓力或者焦慮感,有機會影響日後嘅性表現或者射精情況。

另外,有戴套嘅情況下突然抽出其實都會有機會反而比單單使用安全套射精後抽出嘅風險大。因為好多人會於呢個突然抽出嘅過程中,無按住安全套開口位置就抽出,導致安全套意外甩左/殘留於陰道內,令安全套裡面嘅分泌物流出 :disappointed_relieved:

所以都建議可以同伴侶溝通一下,未來係咪都希望戴安全套嘅情況下,都係抽出先射精,還是選擇於體內射精後先抽出都可以 :wink:

最後,安全措施之間要如何取捨,最主要係能夠滿足到你與伴侶之間嘅需要(包括生理及心理上) :blush: :heart:。假如你都覺得自己對避孕藥嘅成效依然有唔少疑問及憂慮嘅時候,都建議搵番之前一直睇開嘅醫生,釐清一下存有嘅疑問,令自己掌握到清晰而可靠嘅資訊。同時,亦可以討論下有無其他安全措施,係更能符合你依家嘅需要及生活上嘅狀況啊。

記得你之前都有提及自己覺得服用避孕藥嘅狀況,暫時都好影響你嘅生活,而伴侶亦支持。我地亦留意到你現時擔心嘅狀況都比較嚴重,及好影響你嘅精神健康狀態,所以都建議你可以考慮停止發生性行為,及嘗試停藥一個月先。等狀況好番D嘅時候,再考慮用安全套發生性行為。始終現時如果一發生性行為時,自己都已經會好緊張好焦慮嘅時候,有時暫停以下讓自己都可以稍微放低呢一份擔憂,好好放鬆一下先,對你自己,以及與伴侶之間嘅關係長遠黎講,話唔定都有好處啊 :smiling_face_with_three_hearts:。更何況性行為亦唔係只包含插入式性行為,依然可以以好多其他嘅形式發生,或者都嘗試與伴侶一齊使用性玩具,可以選擇較低,甚至無懷孕風險嘅形式先啊。

聽到可以食返野 個人都定d先
我要慢慢放鬆。。。。
相信自己努力成果

大家都同我講
我一直準食藥再加外射
已經去到第8個月
其實真係吾需要擔心。。。

係都要成日有人提住
比信心自己。。。

其實我已經停左兩個月無發生關係
不過都有keep住食藥
因為吾想做錯決定
始終食下停下都吾好。。。

不過今日我食到今個月第21粒藥
有鼓起勇氣同另一半發生關係
其實過程真係好開心。。。
只不過完左之後我又不停亂諗
我學識放鬆。。。
享受自己努力左嘅野
畢竟我真係每日都準時食藥啊!

亦都要好好聽大家嘅説話
無事就係無事
焦慮已經困擾左我快一年
我再吾行返出尼
相信自己 相信人
無論做咩都吾夠
就算吾做都只係逃避
因為我無相信 無去面對

我想試下聽大家
明白只要我準時食藥
保持身體健康
其實已經好足夠
可以好好享受!

呢個月仲有一個星期又到經期日子
我要努力放鬆
着睇係90%成功上面

希望我成功:disappointed:

好欣賞你有努力幫助自己放鬆啲同埋享受性愛嘅過程 :sparkling_heart: 的確有研究證實多啲同自己講一啲正面、肯定嘅說話係有助減低我地嘅焦慮感同埋提升我地嘅自信心 (參考資料: https://positivepsychology.com/positive-self-talk/) ,所以鼓勵你感到焦慮嘅時候多啲嘗試透過依個方法幫助自己放鬆 :smiling_face_with_three_hearts:

努力嘗試已經係向成功踏出一大步 :100: 不過克服焦慮嘅過程同我地建立好習慣一樣,都會經歷唔同嘅困難同挑戰,有成功嘅時候,亦都可能有覺得挫敗嘅時候,所以如果我地一開始就將個目標訂得好高嘅時候,例如想keep fit,然後將目標訂為一個星期內要瘦10kg,就好容易令自己感到好大壓力,同埋因為同理想中嘅目標有落差而放棄 :pleading_face: 所以建議你可以先為自己訂立一啲小目標,例如: 今個月黎經前嘅日子可以做到一日唔感到焦慮就係達標,到下個月就可以做到兩日唔感到焦慮就係達標,如此類推咁,直至黎經前完全唔會感到焦慮 :smiling_face_with_three_hearts: 每達到一個目標就稱讚下自己,而如果嗰個月達唔到標都唔緊要,擁抱自己嘅唔完美,休息下再重新嘗試過,總有一日可以行到目的地嘅 :relaxed: :muscle:t2:

希望我呢7日真係可以好好地
靜待月經來臨
望住個排食剩一個星期嘅藥
有時真係會覺得好吾真實:pleading_face:

同埋好似每次到最後一個星期都會覺得周身吾舒服
下腹會冤冤痛咁
吾會係排卵 或者中招㗎可:dizzy_face:
好似每似做完我都有呢d吾舒服感覺

然後又疑神疑鬼
雖然我都仲會亂諗
然後不停google自己係咪安全

但至少呢24個鐘我都有好好訓教 好好工作
算吾算係進步咗呢。。。

距離要尼m尚餘6日。。。:sob:

而且只係一日
無理由就出現徵兆?

不過我自己都有記錄低
好似每次尼之前一星期就會周身痛

又可能咁啱每次都係一星期前有性行為過:slightly_frowning_face:

好多謝你信任我哋,同我哋分享咗好多你嘅經歷。想話比你知,你已經盡力做得好好。可以試下深呼吸,做下鍾意嘅嘢,搵親密嘅人陪下你,令你感覺放鬆啲。 :gift_heart:

你講到話月經前一個星期會有不適嘅感覺,而經前一個星期你有性行為。想解釋返,呢種唔舒服嘅感覺唔會係因為排卵,因為避孕藥會抑制排卵嘅,同埋唔會發生完性行為即刻有懷孕症狀嘅。希望你知道呢啲資訊之後可以安心多啲。而周身酸痛同下腹痛可能係因為你發生性行為嘅時候動作太激烈令你肌肉酸痛,飲食令你覺得肚唔舒服、亦可能係因為你覺得好擔心而引起嘅不適,所以唔可以單憑呢啲症狀去推測自己是否懷孕。 :nerd_face:

好明白你有焦慮同緊張嘅情緒,可能因為未有心理準備應付意外懷孕,你都可以同伴侶溝通下如果真係有意外懷孕你哋會點樣處理,現時香港可以選擇終止懷孕或繼續生育,而繼續生育亦可以選擇領養或者寄養。同伴侶溝通完有共識可能都可以幫助你舒緩情緒。 :blush:
同埋可能你嘅焦慮係來自社會對於意外懷孕嘅污名,會怪責人冇做好準備。但現時冇一種安全措施係有100%成功率。社會教育對性嘅態度相對保守,呢樣嘢會影響我哋點樣面對性,甚至產生對性嘅恐懼同緊張,或者影響我哋嘅性生活。但想話俾你知,無論你有咩問題疑慮,我哋都會喺度陪你嘅。 :smiling_face_with_three_hearts:

見你對於食藥會唔會同其他食物或者藥物互相影響,搞到你好緊張。你會唔會同伴侶溝通下,試下其他避孕方式。例如打避孕針(有1個月打一次,同3個月打一次兩款)同子宮環,呢兩種避孕方式都有好高嘅成功率。不過一定要經醫生評估你嘅身體狀況後,確定你適合用先可以幫你打針/放置子宮環入你體內,尤其你話之前有子宮內膜異位嘅問題,要同醫生講。現時家計會診所、母嬰健康院、部分私家診所都有呢啲服務嘅。或者安全套配合避孕藥,兩種方式都用,可能令你更加有信心。 :relaxed:

如果你覺得自己心理上未準備好發生陰道插入式嘅性行為,可以同伴侶溝通,做一啲懷孕風險較低嘅行為,例如口交、幫對方自慰等,再配合口交膜、指套呢啲安全措施,避免分泌物直接接觸。慢慢來,等你準備好,再發生進一步嘅性行為都係完全冇問題嘅。 :wink:

或者換個角度講
我自己都有mark低
每次尼m前一星期都有吾舒服
都係谷m徵兆?
因為有人講食藥就吾會有
但我觀察呢8個月我一星期前就會周身吾舒服
又或者可能係我緊張
不過都算幾規律
所以我依家嘅不適應該係原於緊或者係谷m?

係谷m就好了

暫時都會揀食藥先
其他方法怕痛
加上吾可以隨時停

呢家可做嘅剩係希望星期日準時m到:sob:

避孕藥的確有舒緩經前不適同經痛嘅功效,但係效果如何都會因人而異。而且經前不適嘅徵狀每人唔同,甚至同一個人每次月經都會唔同,再加上呢啲感覺係好主觀嘅,所以未必話食咗避孕藥就一定完全唔會出現經前不適嘅感覺。加上食咗藥8個月,身體都已經適應咗藥物,習慣咗藥物導致嘅週期,令月經變得規律嘅同時,一啲經前症狀變得規律都係可能嘅事嚟嘅,所以你感覺每次嚟之前一個星期左右身體都會有啲唔舒服都係合理架~ :blush:

而且正如之前所講,你所講嘅「谷m」嘅感覺,例如肚唔舒服、肌肉酸痛,呢啲症狀都仲有好多其他原因可以導致嘅。都比較難單憑呢啲症狀去判斷。同埋心理因素多有機會影響嘅,可能你見到啲藥得返最後幾粒,你覺得月經應該就出現,所以可能都會有感覺嘅。 :relaxed:

其實而家距離星期日都仲有幾日時間,我明白你嘅心情好緊張,但都盡量嘗試放鬆心情,做下其他你有興趣嘢分散下注意力,例如睇下書、睇戲、做下運動、同朋友傾計,唔好俾顧慮佔據咗你嘅生活。放鬆下,月經會出現嘅。