嚟緊M進行性行為

Hello 我之前食咗5個月事前藥 直到上個月停咗
M期都好正常 我本身都唔會話突然遲/提早好多嚟
我琴日係嚟m第3日 同男朋友有進行性行為 第一下無帶到套入 但入咗一下就帶返套了 想問即使有前列腺液 但會唔會因為我嚟緊m所以懷孕風險係接近0?

Thank you!!

Hello @Hellooo :blush: :wave:t2: 首先,都想提醒番一般停止服用避孕藥後,身體就會即時恢復生育能力,亦會有懷孕嘅風險。一般1至2個月內就會回復自然嘅排卵及月經週期。所以如果依家係無服用避孕藥的話,都已經會有懷孕嘅風險啊 :pleading_face:

:point_right:t2: 就住你嘅情況,都想了解一下過往平均月經週期係大概幾多日?

陰莖性興奮嘅時候,已經會分泌出透明嘅尿道球腺液(俗稱Pre-cum),內含少量精子,係有機會導致懷孕嘅 :blush:。而一般精子可以於女性體內存活約2-3日,所以部分月經週期較短嘅女性(~21日),因排卵日會比較早(約月經週期的第10日),所以有機會黎月經嘅過程中發生的無套性行為,讓精子進入體內後,精子於體內存活的2-3日期間剛好遇上排卵,就有機會導致懷孕 :flushed:。所以對於月經週期較短嘅女性,於黎月經期間越後嘅日子,發生唔安全嘅性行為,就會有越大機會導致懷孕 :pensive:

如果你過往月經週期唔算較短的話,就無需太擔心嘅 :relaxed:。雖然過程中曾經有一下因為無戴安全套,尿道球腺液內嘅精子有機會進入體內,不過因為本身尿道球腺液導致懷孕嘅機率比精液低,加上係月經第三日發生性行為,精子遇到排卵嘅機會都較低,所以懷孕嘅機會係比較低 :relaxed:

事後丸方面,始終今次性行為都唔能夠話係完全無懷孕嘅風險,所以你都可以自行決定有無需要去攞事後丸,又或者約左醫生後再問問醫生意見,睇下有無需要服用事後丸 :woman_health_worker:t2: :man_health_worker:t2:

所以如果你想安心一點的話,可以考慮於性行為後120小時內(事後丸的最長服用期限),選擇去家計會/母嬰健康院/普通科門診/婦科診所/急症室睇醫生(事後丸喺香港係屬醫生處方藥物 ),諮詢醫生嘅意見後,視乎情況攞埋事後丸 :relaxed: 。咁就可以進一步確保懷孕嘅機會減到最低。

不論最後有無服用事後丸,都建議性行為11日後(或於服用事後丸後同家計會護士預約的覆診日期)進行一次驗孕,到時嘅結果已經會係準確同埋可靠嘅 :relaxed:。因為一般受精卵著床需要6-9日,所以性行為7日後驗孕已經可以有一個初步嘅驗孕結果,而性行為11日後驗孕,就會較準確及可靠。

最後,都建議之後發生嘅性行為,整個過程都戴好安全套,一方面可以減低懷孕嘅風險,另一方面都可以避免性病傳播嘅機會啊 :wink:

我睇返上幾個月嘅cycle都係around 27/28,最短試過25,最長試過31。以我記憶之中我都無咩試過短到21日,好小會提早一星期。我本身period都算穩定。

同埋我都聽過嚟m都算係安全,因為好小人排卵同period一齊嚟。同埋我都唔係全程無帶,只係第一下,之後都有即刻帶返。我諗呢個情況下都唔需要太擔心?

感謝你詳細嘅回覆:pray:t4:

睇返你嘅情況,意外懷孕風險係比較低嘅。
不過都想同你解釋返,每一次月經週期都係一個新嘅週期,之前週期嘅長度、日期、流血量呢啲資料都係參考,未必一定每次都一樣。 :nerd_face:而且你之前5個月都係有服食事前避孕藥,當時嘅月經週期係受藥物內嘅人做造荷爾蒙所控制,變相唔能夠為現時無藥物控制嘅自然週期作參考。而且月經同排卵係由身體入面幾個繁複嘅系統互相配合而成,所以好容易受到其他因素影響。例如荷爾蒙分泌、作息、飲食、壓力、情緒等等。呢個都係我哋唔建議用所謂「安全期」作為一個長效而可靠嘅避孕方法嘅原因。雖然比例上嚟M期間排卵嘅人唔多,但我哋係無辦法憑日子或者肉眼去判斷身體係咪已經排卵,而且好似上面 Sze所講,精子可以係體內存活約2-3日,而卵子排出後一般亦可以生存到1-2日。如果咁啱係你哋發生性行為嘅日子前後身體排卵的話,精子一樣係有機會接觸到卵子嘅。特別係你剛剛停藥,現時都比較難去計算排卵嘅日子,變相亦會有意外懷孕嘅風險。 :persevere:

而之前都有解釋過,陰莖喺受到刺激嘅時候會分泌透明嘅尿道球腺液,當中有機會含有少量精子。而要造成懷孕,只係需要一粒精子。今次嘅性行為雖然性器官只係有短暫嘅接觸,但因為你剛剛停止服食事前避孕藥,雖然身體未必會即時自然排卵,但變相體內嘅排卵同月經周期都比較難去計算,亦比較難去量度實際風險。所以結論係雖然今次性行為意外懷孕嘅風險唔算高,但都係有一定嘅風險係度。你可以同伴侶商量一下有無需要做緊急避孕,否則係性行為發生7日後驗孕已經可以獲得初步嘅結果嫁啦~ :wink:
我哋都係建議每次發生性行為,整個過程(由性器官開始有接觸起計)都要正確使用安全套(或者其他安全措施),咁就可以更加安心享受性歡愉啦。 :smiling_face_with_three_hearts:

明白。

但係過去嗰個月經週期係停用事前藥的第一個週期,係27日。咁可唔可以推斷到我已經係回復「正常」排卵期?

唔好意思,好多問題,唔係好識想求個安心:pray:t4:

Hello
正如之前所講,每一次月經都係一個新嘅週期,未必次次一樣。而「排卵日」係要喺月經出現之後推算返係邊一日排卵,所以除非每日用排卵試紙去測試,我哋都好難好清楚咁知道邊日係排卵日嘅,亦都冇所謂「正常」嘅排卵期。27/28日嘅週期都唔等於係「正常」,28日呢啲數字本身就只係一個科學計算嘅平均值,所以無論係接近或者偏離呢個數字都代表係「正常」或者「唔正常」架。 :grimacing:
而你停咗避孕藥,身體冇人造荷爾蒙去令月經週期變得規律,同一時間身體自然嘅荷爾蒙分泌本身就好容易受其他因素影響,所以係無藥物控制嘅情況下,你每次週期嘅長度、排卵日都機會有唔同。而且係停藥後嘅頭幾個週期,因為身體要慢慢去調節返去無外在荷爾蒙嘅自然狀態,日子同血量都有機會比較混亂同大啲變動,有定心理準備就唔需要太擔心啦! :wink:

Hello 距離上次性行為大概11日,今朝我驗咗次,發現得一條線。想問其實呢個結果係咁已經準備?洗唔洗再隔幾日再驗多次?

*已經準確

Hello~ 就好似 @Sze_StickyRiceLove 咁講,因為一般受精卵著床需要6-9日,所以喺性行為嘅11日後驗孕,結果係相對準確同可靠嘅,所以你驗到係陰性就應該係無懷孕架啦 :relaxed: 如果想進一步提升結果嘅可靠度,可以買另一個牌子嘅驗孕棒,再按照說明書嘅指示進行驗孕,如果結果都係陰性嘅話就唔需要擔心有懷孕嘅風險啦 :relaxed: