好驚惹到性病

話說小弟有個長期穩定的女朋友幾年,中途佢去咗working holiday 3年,開頭都好地地冇咩野,好多時都係自己打飛機解決性需要。其後年半我好學唔學走去學人搵按摩女郎按摩同打飛機。到女朋友番咗嚟香港,我重有去過兩三次。而最後果次,就係今個月大概9-12號D位置,重要係我第一次同按摩女郎發生性行為,全程都有戴套的。

到咗18號-19號左右,我發現反開龜頭發現有部分地方少少紅咗同紅點,內包皮位置痕痒,我即刻走去睇醫生。當時醫生問我有冇其他性伴侶同埋有冇搵按摩女郎,我膽細話冇(除咗女朋友之外,我唯一有過性行為嘅就係果個按摩女郎)。跟著醫生就有反開我包皮睇,佢話有少少發炎,問我要唔要用棉棒擦擦種菌。我當然話好!當日佢就開咗3星期抗真菌嘅藥膏我塗。每日兩之。過咗幾日,即係星期五,番去拎報告話有大腸桿菌。我當下聽完放心咗,醫生都開咗7日抗生素我食,每日2次。但我可能睇少咗大腸桿菌。我番到去2-3日都冇塗藥膏同埋食藥。星期日同女朋友發生過一次性行為,有口交。星期二自己有打飛機,打完之段龜頭突然有兩點紅點,跟住尿道有少少唔舒服,我即刻塗番藥膏同埋食藥,之後幾日龜頭都有少少紅斑,另外感覺上又膀胱同大腿內側都有少少拿住拿住咁,同埋個人好攰,我有唸過唔知係咪尿道炎。但龜頭有少少紅斑又令到我好驚係性病。想問下專業人呢個情況係點?因擔心同藥食埋聽日就冇曬,我已經約咗醫生聽日再去覆診。

我好驚,同好後悔有呢個唔好既習慣,我好內疚,感覺對唔住女朋友同家人,好羞家。

想補充多少少,呢幾日感覺到尿道,大腿內側近睪丸位置間唔時都會有焯熱感覺,大腿內側唔知係咪呢個星期頭跑咗兩日步搞到肌肉酸痛定點,同埋有時又好似感覺到陰莖條筋會拿住拿住,搞到都唔知係邊到唔舒服。至於龜頭紅斑就一時明顯D一時無咁明顯。

Hello~ 照你所講嘅情況,有機會係因為大腸桿菌進入左尿道而引致發炎,雖然大腸桿菌唔係引致性病嘅細菌,但都一樣會引致發炎,如果唔對症下藥嘅話有機會會導致敗血症或者不育,所以都需要按醫生嘅指示用藥。大腸桿菌直接或間接來源於糞便,而如果大便後之後無抹乾淨肛門,而性行為前亦都無清潔性器官及肛門嘅話,就好容易會令性器官感染大腸桿菌,所以建議性行為時使用安全套,並喺性行為前後都清潔性器官及肛門,以減低感染風險。

至於龜頭出現紅斑有機會係因為大腸桿菌引致龜頭發炎,建議你先去覆診同按醫生嘅指示用藥,睇下情況有無改善,而日平日沖涼嘅時候亦都記住要反開包皮清潔龜頭,同埋沖完涼之後印乾龜頭先反返包皮,因為包皮好容易積藏污垢,如果無清潔乾淨同樣有機會引致龜頭發炎。

如果真係好擔心感染性病嘅話,可以到社會衛生科嘅診所進行性病測試,資料完全保密,只要持有香港身份證嘅人士都係費用全免嘅,不過因為疫情期間部分診所暫停服務,所以如果決定去嘅話,可以先參照以下網址上列明嘅診所營業時段或者直接打去確認下: https://www.dh.gov.hk/tc_chi/tele/tele_chc/tele_chc_shcm.html

明白你對於宜家依個不確定嘅狀況感到好擔憂同內疚,不過都想你知道一方面性工作者唔一定就等於有性病,二黎喺整個性行為期間都有使用安全嘅情況下感染性病嘅風險係好低嘅 :blush: 不過要提一提嘅係,如果知道自己嘅性器官有發炎嘅情況,或者懷疑自己感染性病,就應該避免與他人發生性行為,因為咁樣係有機會將病菌傳染俾其他人嘅 :pleading_face:

多謝你嘅回覆。我想講多少少呢個月我嘅心路歷程。

就上次講到我係1月9-12號第一次同按摩女郎發生性行為,全程都有戴套的。自上次睇完醫生加出埋呢個post之後,呢兩個月期間,2月2日我睇咗社會衛生科,有抽血及棉棒採樣,驗完之後所有都係negative。之後私家都睇過 (男士健康科,普通科,皮膚及性病科),喺2月22日做個全面嘅test,抽血, 尿test,棉棒採樣。驗完之後所有都係negative。呢排再回想番,我1月頭買咗條窄身褲,未按摩之前,都因為果條褲太緊搞到大脾內側同埋大脾痕,好大機會係果條褲搞到我個龜頭痕。其實果次睇完醫生當日,佢開嘅類固醇藥膏我搽咗一次,第二日就冇事。加上我冇再著果條褲,都冇再番發,但因為就好似上文提及過,過咗幾日有打過一次飛機,之後龜頭突然有兩點紅點,跟住尿道有少少唔舒服,我即刻塗番藥膏,加上之前醫生話要搽三個星期,所以我冇事情況之下都搽咗三個星期。

但因緊身褲同埋按摩個時間又好接近,做咗咁多test同睇咁多醫生,我重係成日都好擔心個空窗期。本身個人都比較sensitive,依家基本上身體上一有少少唔舒服,就會即係唸緊係咪有事,繼而就會去睇醫生。中間有試過幾次嘅唔舒服,例如成日好似陰莖唔舒服,但可能只係因為我搽咗3星期類固醇藥膏嘅關係。又例如係口乾,少少頸緊,少少喉緊喉痛,但去睇醫生又話我喉龍冇事。呢個醫生好好,基本上2月期間我每個星期都去睇下佢,每次check我所講嘅問題之後,都係話冇事的。睇到最尾一次佢就我心理層面診症,最尾refer咗我去睇心理醫生。所以我就係到唸,之前嘅陰莖唔舒服,口乾,喉痛,係咪焦慮產生。早兩日因太忙冇咩時間唸咁多,好似冇覺得個人有咩唔妥,但琴日發現左邊大脾接近內側好似生咗一小塊唔知係咪癬嘅野,同埋腋下好似生咗粒暗瘡,我擠咗佢出嚟重有粒好似油脂粒嘅野,我又開始擔心。依家打緊呢個post又feel到喉有少少緊同埋痛,但我開口照又同上次個情況一樣冇紅冇腫冇發炎。

因本身係呢件事前,冇咩點留意身體及龜頭位置,一有少少唔同就即刻去check,早兩日我又去咗睇皮膚科睇個龜頭,因成日覺得好似膚色唔平均同埋扯旗後有點點,但check完後都係話冇事,話好正常。

我想知我到底咩事?

其實陰莖膚色唔平均、有凹凸係好正常嘅。正如你所講,你之前冇好好留意過陰莖,而家再睇就可能未必好習慣。有時龜頭不適,除咗細菌感染之外,都有可能因為清潔不當/過度清潔/日常習慣影響 :persevere:。正如你都有講,著太緊太貼嘅褲,底褲唔通風,都有機會令陰莖喺悶熱嘅環境下覺得唔舒服。所以,要每日用暖水溫和溫柔地清潔,記得要反包皮清潔,盡量著棉質通風嘅底褲同褲 :wink:

既然你睇咗咁多次醫生,醫生都話冇事,咁就要嘗試去相信呢個結果。喉嚨不適、皮膚出現變化、生暗瘡,呢啲現象唔一定同性病相關,可能天氣乾燥、或者你飲食唔均衡、身體水份唔夠都會導致。如果你依然好擔心嘅,不如設定一個目標比自己。睇多最後一次醫生,做全面嘅檢查,如果今次結果依然係各方面都正常嘅話,就要說服自己,自己好正常,咩事都無,唔好再因為呢件事困擾。 :blush:

性病嘅傳播途經有:血液、精液、陰道分泌等體液交換;有損傷的皮膚、眼睛、口腔和鼻腔等黏膜交換。所以冇使用安全套嘅口交、陰道交或者肛交係比較高風險嘅性行為。但你當日同性工作者發生性行為嘅時候有全程使用安全套,所以風險都好低微。 :wink:
而你龜頭感染大腸桿菌,好有可能係因為清潔不當,未必同性工作者嘅性接觸有直接關係。而大腸桿菌感染係可以通過藥物完全根治嘅,並唔需要過於擔心。 :blush:
因為社會文化對性工作者嘅污名化同歧視,令好多人覺得性工作者「污糟」/「有性病」。但其實佢地為咗自身安全同健康,會有好高嘅意識去使用安全措施,反而有啲客會要求唔用套,甚至性行為中途除套,令性工作者有好高嘅感染危機 :disappointed_relieved:

你嘅焦慮情緒可能受呢種文化影響,而希望破解完迷思之後會令你放鬆咗。又或者你將對伴侶/家人嘅緊張/羞愧嘅情緒,轉化成為你對自己身體嘅焦慮。或者你平時會唔會都比較容易緊張?比較容易因為情緒壓力而不知所措?其實可能有時緊張嘅心情都會影響我地對於身體狀況嘅感知嘅 :confounded:

如果你真係覺得情緒壓力好大,小小身體唔舒服都會令你擔憂同埋聯想到性病,甚至影響你嘅日常生活嘅話,就要思考下點樣去應對。人有情緒好正常,但最緊要要搵到適合自己嘅方法去面對/釋放情緒。你可以考慮搵專業人士尋求幫助,例如心理學家或者輔導員,佢地幫你梳理完情緒,搵到適合你嘅方法去應對呢啲情緒,可能都會幫助到你。而且其實有好多人都會因為焦慮或者其他情緒困擾而好容易放大咗一啲身體嘅症狀,或者好少嘅事就覺得自己有大病,類似一種「疑神疑鬼」嘅感覺。你遇到嘅情況都係好常見,唔需要覺得自己奇怪或者唔正常而抗拒搵專業人士傾訴自己嘅情況啊~如果你想搵人傾下嘅話,有啲機構都會提供相關服務嘅,例如「有種部隊」,佢係附屬於「關懷愛滋」男士健康團隊,你可以去有種部隊facebook睇下資料(有種部隊 Guts Army - Home | Facebook ),佢地有唔同嘅聯絡方式嘅(例如whatsapp或者facebook messager),你可以選擇你舒服嘅方法。如果你有需要,我地都有轉介服務㗎,可以幫你轉介。你睇下邊一種方式係最適合你啦~ :sparkling_heart:

好多謝你嘅回覆!

我4月12號,即接觸按摩女郎後剛好3個月,再做咗一次全面嘅檢查。所有結果都係陰性。我都相信檢查後嘅結果。

但唔知係咪呢三個月期間嘅焦慮,令到我依家長期都好似處於係呢個焦慮嘅狀態。對於身體上嘅變化會變得非常sensitive。有時皮膚某個spot位痛咗一下,我又會唸好多嘢。同埋之前食緊抗生素果陣(即1月第一次睇醫生果陣) 有跑步減壓,唔知係咪因為咁,大髀內側肌肉好似成日肌肉拉傷嘅感覺 / 稍為做少少激烈嘅運動就好似好易拉親 (因醫生講過話食抗生素會好易整親肌肉)。我本身係有舉開重,自己都有唸過會唔會係果排gym lock down 冇做weight training 太耐,所以一下子做咁多運動就易整親,加上我平時又好少拉筋。

再者,我有時陰莖會有少少不適,一嚟我唸緊會唔會係可能係因大髀肌群嘅拉親,間接影響埋陰莖。二嚟我都會唸係咪因為之前喺龜頭用咗3個星期嘅steroid cream。因我上網有睇過台灣一篇文章話,龜頭吸收嘅% 會高過其他部位嘅皮膚好多,無記錯好似around 40%。重有另一篇文章係美國一位皮膚專家 Marvin Rapaport講過 Topical Steroid Withdrawal,當中提及過好多濕疹病患喺唔用steroid cream 之後會慢慢康復。但康後期間係會經歷2個月-半年皮膚不適等等,所以我就唸會唔會關事。但我睇醫生,醫生又話用咁短時間唔會。但 Marvin Rapaport 有提過好多醫生係唔會講steroid cream 嘅副作用。依家我嘅龜頭間唔事都會有少少脫皮,原因係因為之前用咗steriod cream 整到龜頭皮膚dry 咗,但醫生都會正常無事嘅,但我次次講龜頭不適佢就好似無咩comment。只係我間唔事感到陰莖不適又會令我唸呢樣唸果樣。不過又講番我痾尿,自慰,係完全無問題的。

重有個問題,就係唔知係咪因焦慮感作怪,我喉嚨成日覺得卡卡地,但睇醫生又話無事。

同埋唔知焦慮會唔會降低免疫力?因呢排開番gym我去番做運動,但我一向做完運動都唔會沖涼,只係直接換衫走人。因大髀內側成日有汗焗住,依家初起咗少少股癬。琴日去睇醫生,醫生都俾咗少少藥膏我查緊。喺呢件事之前我都係咁做,都唔會有咩汗癬,所以我就唸會唔會係焦慮降低咗免疫力。

麻煩晒我好多問題。

恭喜恭喜恭喜你!有曬結果就唔使擔心啦! :tada: :tada: :tada:

你話啲肌肉好容易拉傷,我諗醫生都同你解釋過食抗生素係會令肌肉容易啲拉傷,同埋lock down 冇做weight training都真係會好容易整親,可以想像一個從來都冇做開健身嘅人突然之間去做健身,拉傷嘅機會都好大嘅。同埋如果真係覺得自己成日受傷嘅話,喺運動前就要有足夠嘅拉筋同埋熱身啦。 :sunglasses:

steroid cream都係一隻類固醇嘅藥膏,通常啲濕疹嘅朋友經常都會用到,用得多嘅時候都會可能有甩皮嘅情況。本身龜頭嘅皮膚係比較薄啲嘅,類固醇都會令皮膚薄啲啦,所以龜頭度有甩皮嘅情況同埋你覺得好乾都係正常嘅,唔洗擔心。隨住你慢慢停藥,身體會自動修復返,所以都唔駛好擔心㗎。建議你可以飲多啲水,又或者真係好擔心嘅話可以同醫生要求一啲茶喺龜頭或者陰莖嘅保濕藥物,咁就可以舒緩返你而家嘅情況。 :relaxed:

好欣賞你自己會再搵一啲網上嘅文章或者醫學報告,去了解下而家自己嘅情況,如果真係擔心嘅藥係有副作用嘅話,不如問下醫生究竟隻藥係有邊啲副作用,或者直接同醫生講睇下可唔可以換第二隻藥。如果你都能夠自慰得到,而且都有晨勃嘅,基本上性功能都係正常嘅,唔使擔心。 :grinning:

焦慮會唔會直接令人嘅身體免疫力會有所下降,暫時真係冇相關嘅醫學報告。不過焦慮可能影響到你嘅睡眠、生活習慣、情緒等等,好間接咁影響到你嘅免疫力,但係就唔係因為焦慮直接令你嘅免疫力下降。 :bangbang:

至於你有股癬嘅情況,可能都係因為你好耐冇做運動啦,因此身體嘅皮膚上可能唔太適應,再加埋免疫力有所下降,有一啲暫時性嘅情況出現,都唔使特別擔心嘅。 :relaxed: