你好！
其實呢件事都困擾左我好耐，日日都擔心緊，一諗起就會上網search發生咩事同機率。
我嘅週期大約34-35日，每次黎m都會唔太舒服，喺未發生過親密接觸之前，多數都34-35日就黎。
喺24/12/2020，同男朋友有親密接觸，但我地嘅性器官冇直接接觸過，因為身體狀況暫時唔容許懷孕，所以一直唔夠膽冒險。但過程中有互相撫摸，佢亦有用手掂佢自己嘅下面，再用手摸及手指插我嘅陰部，唔知會唔會因為咁而有左？睇返app原來係排卵期，之後就幾乎日日都好擔心。而12月29至1月1有睇生食感冒藥。去到1月9號(比預期遲左2-3日)，去廁所抹到好少嘅血，就好開心。之後幾日都有血，但對比起之前嘅經期就少左一半，第一日嘅量(2隻手指嘅長闊度)就好似之前第三/四日咁，但去廁所小便嘅時候係見到啲小便有m嘅顏色，沖涼沖洗下體都有明顯嘅血絲沖出黎。成個經期只有4日，但冇痛冇唔舒服，其實我係咪真係黎m，定係假嘅？
之後25/1都有發生過親密接觸，但性器官都係冇直接接觸，不過有手指插入陰道，佢隻手都係有掂過佢自己下面，之後同樣地我都係好擔心。去到29/1，去廁所用紙巾抹嘅時候見到有啡色嘅分泌物，隔左2個鐘再去廁所再抹就變左鮮紅色(血)嘅分泌物，跟住夜晚就冇出現過。去到30/1嘅夜晚又有啡色嘅，跟住31/1成日都冇出現過。1/2 feel到下腹好似平時黎m咁痛左一下，下面又感覺到濕濕地，用紙巾抹就見到分泌物帶鮮紅色嘅血絲，就好似之前黎m先兆咁，但去到第二朝(即2/2)係冇m，變返啡色分泌物，加上我下一次黎m應該係13/2，從來冇試過早10日。
所以我想問下
1）懷孕嘅概率(因為我係第一次進行親密接觸，咁樣指交會唔會有事？)
2）1月9號嗰次係真m定假m？
3）宜家嘅出血係著床出血定排卵期出血/其他？(因為睇過其他話著床同排卵期出血唔會維持咁耐，而我又斷斷續續，一時有一時冇，仲會一日全日都冇啡/紅，得白帶，跟住第二日又有返啡/紅，而分泌物都係黏嘅)
我每一次帶啡/紅分泌物嘅量都係用紙巾抹先有，但底褲係冇hi到嘅。最近見到自己個肚好似脹左好多，下腹又好似成日都隱隱作痛，會唔會已經有左1個幾月？宜家一feel到有分泌物就好驚，日日都諗到底會唔會有事，因為之前從來冇試過非經期出血，我亦冇同過人發生真正嘅性行為。呢1個月都好擔心，一有時間就上網search發生咩事，呢幾日仲會成日用紙巾抹下下面睇下有冇啡/紅，定係其實我需要去驗孕？
唔好意思啊打左咁多
可能會好混亂麻煩哂你地啦
比啲意見我唔該哂你地
Hello
首先想同你解釋返，精子接觸咗空氣之後好快就會死亡。的確陰莖係受到刺激嘅時候會分泌透明嘅尿道球腺液，當中有機會含有少量精子，但如果伴侶接觸完自己分泌物一陣後／分泌物已經抹乾咗再接觸你嘅陰道，都係唔能夠導致懷孕嘅唔需要擔心嘅。 
下次再同伴侶發生性接觸嘅時候，可以考慮使用安全套、口交膜、指套等安全措施（可以參考：https://www.stickyricelove.com/post/口交膜及指套 ），並且接觸完分泌物之後抹乾先再接觸性器官，咁就可以避免精子意外直接接觸到陰道啦。 
而月經同排卵係由身體幾個繁複嘅系統互相配合而形成嘅，所以好容易受到其他因素影響。例如荷爾蒙分泌、作息、飲食、壓力、藥物等等，你12月29號至1月1號有食藥可能就影響咗你1月嘅月經（1月9號）。再加上你係12月24號嘅親密行為之後一直都覺得好擔心，緊張嘅情緒都有機會令月經出現變化，例如係日子上嘅差距，或者血量上嘅唔同，都係好常見嘅事唔洗太擔心呀！而且有無唔舒服嘅感覺係唔能夠作為判斷個次出血係咪月經，你都可以回想下係發生親密接觸之前，都未必係每次月經都一定會唔舒服，或者唔舒服嘅程度／地方都一樣。 
另外，app嘅記錄只能夠用作參考，係唔能夠作準嘅，因為每個月經都係一個新嘅週期（由嚟月經果日直到下次月經之前果日為之一個週期，所以其實月經一日未來我哋都唔會知道今個月嘅週期到底係有幾長架），未必每次嘅長度、日期、流血量都一樣。而「排卵日」其實要喺月經來之後先可以推算返係邊日排卵，所以除非每日用排卵試紙測試，否則我哋都唔可以係月經出現之前確定究竟邊日係「排卵日」。 
通常排卵期出血血量都比經期小，而且出血嘅日子更加短，通常會有啡色嘅分泌物或者帶有血絲較為黏稠嘅分泌物，同你嘅情況都類似。不過排卵出血未必每個人每次排卵都會出現，特別係如果以往都無呢個情況，最近又無發生過咩特別事例如食過藥或者有比較明顯嘅情緒起復，覺得唔確定同埋擔心嘅，都可以搵醫生檢查下。 
至於著床性出血，通常係發生係受精後一段時間（大概性行為後6－10日），因為受精卵係子宮壁著床而導致，通常流血量小，只有1－2日，而且亦唔係一個好常見嘅現象嚟。
另外一個導致29/1開始嘅出血嘅可能性係25/1當日嘅指交過程中令陰道出現咗少量傷口，好多時我哋單靠剪指甲都唔能夠令到指甲嘅邊緣變得完全圓滑，係無使用指套或者安全套嘅情況之下都好容易會意外刮傷咗陰道壁，導致係性行為後有出血。 
暫時睇你嘅情況，1月9號嗰次係月經。而你嘅懷孕風險其實都相對低。但如果你擔心想求心安嘅，都可以自行驗孕。喺發生性行為後，7日驗可以得到初步結果，而11日後可以得到比較準確嘅結果。所以現時驗孕的話已經可以為12月24號嘅性行為有冇導致懷孕得到一個好準確嘅結果，亦可以為1月25日嘅性行為有無導致懷孕取得一個初步嘅結果。
係排除咗懷孕嘅可能性之後，突然月經血量發生大嘅變化，或者有非經期陰道出血，其實都有機會有其他健康問題，例如子宮或者子宮頸嘅病變。如果你嘅情況持續，呢排生活上又冇發生好大嘅變化（例如食藥），都建議搵醫生檢查下，睇下有冇其他健康狀況。
都知道你好擔心，我地慢慢嚟，一步一步睇返先。 
首先，可以排除咗你懷孕嘅情況，原因好似 @Ching_StickyRiceLove 咁講：
「首先想同你解釋返，精子接觸咗空氣之後好快就會死亡。的確陰莖係受到刺激嘅時候會分泌透明嘅尿道球腺液，當中有機會含有少量精子，但如果伴侶接觸完自己分泌物一陣後／分泌物已經抹乾咗再接觸你嘅陰道，都係唔能夠導致懷孕嘅唔需要擔心嘅。」
另外，月經週期係會受到好多嘢嘅影響，好似你食過藥咁，其實有可能會令你月經週期早咗到，而呢樣嘢個App係唔會有數據可以計算得到，因為佢只係用一般月經週期28日加埋之前你入落app裡面嘅月經日子嚟估算你下一次月經嘅時間，所以只係可以參考，唔可以作準。 
你都有講到，有啲症狀同你平時嚟月經係一樣嘅，但係其實並唔係每次月經都一定會出現呢啲症狀嘅，而且你都可能聽過，個人體質都會影響有咩症狀，有啲人會有下腹痛，但有啲就完全無嘅，所以症狀都係好因人而異嘅，有或者無出現其實都唔代表啲咩，所以唔洗太擔心啊架。
你上一次係9/1嚟咗月經，依家1/2號有血流出，日子上其實都差唔多，而且你係有持續地出血，都可能係月經嚟，係血量同以往嘅有啲唔一樣而令你覺得擔心。血液嘅顏色一時紅一時啡咁，的確會令人感覺好混亂，唔知究竟係咪月經。因為呢個情況對你嚟講可能係比較異常，雖然係月經嘅可能性都好大，你持續擔憂嘅情緒都有機會係導致血液顏色同量出現改變嘅原因。不過就好似 @Ching_StickyRiceLove 咁講：
「突然月經血量發生大嘅變化，或者有非經期陰道出血，其實都有機會有其他健康問題，例如子宮或者子宮頸嘅病變。如果你嘅情況持續，呢排生活上又冇發生好大嘅變化（例如食藥），都建議搵醫生檢查下，睇下有冇其他健康狀況。」既然呢個流血嘅狀況令你感到唔安心，以往無出現過類似嘅情況，最近呢個月又冇咩特別事情發生過，又排除咗懷孕嘅可能性，都不妨考慮下見醫生，做詳細嘅檢查，了解一下會唔會係荷爾蒙水平變動嘅影響，定係身體有其他狀況出現咗。
啲症狀(例如肚谷住谷住同腰酸背痛)同我平時黎m嘅症狀感覺差唔多，除左冇m痛同量少之外…我已經分唔到係黎m定其他