我女朋友27號黎m 當晚28日既凌晨 01:00 食左第一粒避孕藥，上yaz官網睇有話如果黎m即日食就可以即時有避孕效果，因為今日（2月2日食左第6日藥）有進行過性行為而且冇戴安全套但冇內射，但因為有啲朋友話一定要食夠7日先會有效，請問需唔需要買事後丸？
你好呀 @kenny 
你地懷孕嘅風險好低，唔需要食事後丸呀。值得留意嘅係，事後丸係香港係處方藥物嚟嘅，要經醫生評估身體狀況提供適合嘅事後丸，所以記住日後有需要就要搵返家計會或者醫生買啦，坊間藥房因為無處方，可能會用維他命丸冒充事後丸架，而且唔清楚藥物成份嘅情況底下食事後丸都唔係咁好架。
首先解釋返點解要係月經週期嘅時候開始食啦，因為需要確保食藥嘅時候係無懷孕嘅，而且係呢段時間內開始服食都會比較容易令月經周期變得規律。的確，如果係月經週期第一日就已經開始食藥嘅話，藥效就會即時出現架啦，但係如果係月經來潮嘅第 6 天或者以後才開始食避孕藥，就需要係頭7日內加用其他非荷爾蒙避孕嘅方法，例如安全套。 
雖然一般我哋都建議即使係月經期間開始食藥都需要係頭7日額外使用安全套，原因係第一次食藥嘅話每個人嘅身體反應都唔一樣，為咗避免因為出現嚴重副作用或者嘔吐而令藥效喪失，我哋都會建議頭7日要額外使用安全套嘅。不過你哋食到第6日如果身體都無出現咩嚴重副作用的話，基本上都代表身體適應緊藥效，即使發生無安全套嘅性行為都唔需要擔心，避孕藥嘅藥效已經可以做到避孕嘅效果。 
雖然你無內射，懷孕嘅風險都唔高，但係要留意返體外射精並唔係一個可靠嘅避孕方法嚟，因為陰莖係勃起受到刺激興奮嘅時候，會分泌一種透明嘅液體：尿道球腺液，裡面會含有少量精子，因此都有導致懷孕嘅風險架。而且係正確同定時服用事前避孕藥嘅情況底下其實都無需要透過體外射精去減低風險，因為避孕藥嘅避孕功效已經係相當高架啦～ 
好詳細嘅回答 謝謝
另外想問多少少 因為我女朋友唔係太識得食藥丸
每次都係粒藥溶左一部分先至吞到落肚，條利都會有啲藥粉，想問咁樣食法會唔會無效？
如果最後藥粉都係有吞到落肚，被身體所吸收的話，相信對藥效唔會有太大影響，可以放心啊 
食完藥丸嘅方法因人而異，上網搵到呢段影片，如果你女朋友有需要的話，都可以考慮睇睇參考一下 
同埋，如果試多一個月都係覺得食藥丸有困難的話，都可以試下考慮打避孕針啊～
