我好緊張同好擔心..

你好呀…我對上一次月經係28/12但直到而家都未嚟月經🥲已經遲咗第十日。我曾經同男朋友係5/1 23/1同30/1曾經有過性行為。但係呢 我已經用過兩個牌子買過三次嚟驗孕,結果都是沒有懷孕。但喺點解到而家仲未嚟呢?我曾經睇過中醫,中醫話情緒太緊張會影響週期。我想問我有冇懷孕嘅可能性,謝謝:pray:t6:

Hello @szemang :blush: :wave:t2: 首先,都想了解一下:
1) 過往有無都曾經試過月經遲大概十日都未黎? :relaxed:
2) 5/1、23/1、及30/1嘅性行為,有無在整個性行為過程中都戴好安全套,或者使用其他嘅安全措施?
3) 三次嘅驗孕,分別係咩日子驗? :wink:

如果整個過程都有戴好安全套,而性行為後亦有檢查安全套無穿到的話,咁懷孕機會係好微,無需太擔心。但係,因為陰莖性興奮嘅時候,會分泌出透明嘅尿道球腺液,內含少量精子,有機會導致懷孕。所以如果性行為過程中,係曾經試過無戴安全套,而陰莖係有直接接觸/進入陰道,咁過程中尿道球腺液就有機會進入陰道,有導致懷孕嘅風險 :pensive:

驗孕方面,因為受精卵著床一般需要6-9日,所以性行為7日後進行驗孕,可以得到初步嘅驗孕結果。而性行為11日後驗孕,驗孕結果就會較準確以及可靠。所以要視乎番你三次嘅驗孕係幾時進行,先能夠知道該次驗孕,係能夠反映邊次嘅性行為沒有導致驗孕 :wink:

最後,就如中醫所講,情緒有起伏、壓力過大,都有機會影響月經週期。其他有機會導致月經來遲嘅原因,亦包括生活作息唔定時、飲食唔均衡、最近生病有食過藥(特別係抗生素)等。如果最近都有類似嘅情況發生,咁都有機會影響到你嘅月經黎遲左啊 :blush:

回答返你嘅問題🥲
1)好耐好耐之前有過一次遲咗大約10日 但係之後嘅週期大概都遲三四日就嚟 我記得三次嘅性行為都有帶好套 全程帶的 然後除咗出嚟面頭會有啲奶白色嘅液體 應該是屬於我的愛液 因為安全套並沒有漏
2)驗嘅日子係31/1 3/2 同埋5/2呢三日
3)我有曾經試過好頭痛所以食必理痛同埋保濟丸
謝謝你 我真的很擔心🥲

另外補充返 其實我一直減緊肥 晚上沒有食飯 但早上和中午都有正常食 我想問這會有影響嗎

如果你三次發生性行為都有全程戴好安全套,而且安全套無穿無漏,其實意外懷孕嘅機率都好微小,唔使太擔心。 :wink:

你呢三次驗孕嘅結果,可以確定1月5號同埋1月23號發生嘅性行為冇導致懷孕,而1月30號發生嘅性行為,喺7日後(2月6號)驗孕會得到初步結果,11日後(2月10號)驗孕會得到比較準確嘅結果。 :relaxed:

正如之前所講,有好多因素會影響月經,因為月經係由身體幾個唔同嘅系統互相配合而成。例如壓力大,你呢排擔心情緒好緊張會影響月經;藥物,而你都曾經有食過藥,都有機會令到月經週期變長;飲食習慣改變,減肥食少咗嘢都會打亂到荷爾蒙嘅分泌,所以影響咗月經週期;仲有作息時間等等因素。雖然一般成藥都月經嘅影響唔會好大,但因為你本身減緊肥,最近吸收少咗營養,身體出現唔舒服嘅時候有可能引致嘅影響都好可能會比平日大,以致影響到你嘅月經週期。 :persevere:

同埋都想解釋返,每一次嘅月經週期都係一個新嘅週期,未必會同之前完全一樣。所以你記錄嘅日子只係一個參考,唔可以好準確咁去推斷下一次月經一定會係邊一日出現。
好明白你而家都係好擔心好緊張,就算驗孕結果係無懷孕你都會擔憂,試下深呼吸,嘗試放鬆下,諗下你之前都有試過月經週期比以往長10日,而最後月經都係會出現,今次都會嘅! :sparkling_heart:

另外,其實單純地減少每日餐數有機會導致我哋其他餐不經意地食多咗去平衡飢餓嘅感覺,亦有機會令我哋身體吸收唔到每日所需嘅營養同熱量,長遠來講令身體長期處於飢餓同營養不良嘅情況。除咗有機會影響月經,亦有機會導致皮膚同頭髮出現變化,例如會容易啲甩頭髮,嚴重嘅亦會導致停經架! :cold_sweat:如果想健康地減肥的話不妨都建議參考下營養師嘅建議,由飲食嘅細節入手,例如食嘅食物種類或者配搭,再加埋適量嘅運動,減少對身體嘅傷害。 :blush: