好焦慮 會唔會有咗

我係女仔,我上個月第一次同男朋友發生咗親密關係,但我哋只係互相幫對方,並沒有進行插入嘅性行為。上個月我嘅經期遲咗好多,我去咗睇醫生食藥先嚟返,以前未試過遲咁多(一兩個星期)。

到今日我哋中間都發生過幾次類似嘅親密關係(今天也有),佢嘅性器官都冇直接接觸我嘅陰部,都係淨係佢隻手會掂到,佢射精嗰陣精液一般冇接觸到我嘅陰部(射在大髀位置)。今個月我嘅經期都係遲咗,因為上個月開始就食緊藥,所以expect應該準。

我個人本來就好易緊張焦慮,所以同男朋友每次發生親密關係之後我都會好緊張好驚有咗,每日都好擔心,前幾日有買過驗孕棒,測試結果沒有懷孕,但月經來遲仍然令我十分焦慮無法放鬆。

其實我想問一問,如果男朋友掂到自己射精前的分泌物,再摸我的陰部,懷孕機會大嗎…?我11月是月尾嚟m,12月遲咗,推到1月頭1月中先嚟,咁計我依家係咪應該係安全期,機會會更小嗎?我也不知道⋯⋯我真的很焦慮:(

補充返~上次係1月28日發生親密行為,2月6日驗孕的

Hello~ 男性受到性刺激嘅時候陰莖會自動分泌一啲透明而黏黏地嘅液體,叫做尿道球腺液,當中都含有少量精子嘅,不過精子接觸到空氣之後通常幾分鐘內就會死亡,而接觸到皮膚、衣物等表面都會進一步減低精子嘅存活率,所以照你所講嘅情況,如果男朋友掂到尿道球腺液,再觸摸你嘅陰部所造成懷孕嘅機會係好低嘅 :blush:

見你有嘗試驗孕,的確係一個可靠嘅方法去消除疑慮 :relaxed: 驗孕棒最早可以喺性行為嘅7日後驗出初步結果,而喺性行為嘅11日或以後驗嘅結果會更準確,所以你宜家可以再驗多次,記住按照說明書嘅指示進行驗孕,如果結果都係陰性嘅話就應該係無懷孕架啦 :relaxed:

至於月經遲黎方面,首先經期本身係會受好多唔同嘅因素影響嘅,例如生活習慣改變、心理壓力大、生病服食過藥物等等,所以月經遲黎並唔一定係懷孕,亦都好難準確計算經期,所以安全期並唔係一個可靠嘅避孕方法。見你提到食緊醫生處方嘅藥物調經,相信係一啲含人造荷爾蒙嘅藥物,雖然食完藥之後係會令經期比以前準,但係因為身體都需要時間適應藥效,所以服藥頭幾個月經期未係好穩定都係正常嘅,唔需要太擔心 :relaxed:

見你提到每次同男朋友發生性行為之後都會好驚懷孕,想你知道其實喺性器官無直接接觸嘅情況下,懷孕嘅機會係好低嘅 :blush: 如果依然好擔心懷孕嘅話,可以同伴侶傾下你嘅憂慮,或者考慮下先暫停性行為,等你準備好嘅時候先好好享受性愛喔 :smiling_face_with_three_hearts:

因為每次我嘅分泌都幾多,好驚佢掂到我嗰陣有機會懷孕:(

Hello 見到你提及之前因為發現月經無嚟所以醫生處方左啲藥物令到月經嚟返,後邊你又再提及上個月開始食藥。都想問返清楚你係咪由上個月已經開始服用緊事前避孕藥?因為月經無嚟的話,有時醫生都會處方荷爾蒙藥,但就未必係事前避孕藥嚟。除非醫生表明處方俾你嘅藥物係可以當作避孕藥咁用,否則佢好大機會只係用作調經嘅荷爾蒙藥,未必可以起到避孕嘅功效。

如果你係上個月開始已經有每日準時咁服食事前避孕藥的話,其實避孕功效係好高嘅,即使係冇用安全套嘅情況底下都可以有好高嘅避孕功效。而係有準確食藥嘅情況下,係任何時間接觸到帶有精子嘅分泌物會導致懷孕嘅機會都非常之微,所以都唔需要太擔心啊!另一方面,服用避孕藥之後其實頭三至六個月都係身體嘅適應期,身體未必係第一個月就已經完全適應到藥物,然後按預計咁出現月經。但只要驗孕嘅結果係冇事,基本上都唔需要太擔心。再加上你本身為咗呢件事都已經有好多焦慮嘅情緒,呢啲都係有機會進一步影響月經嘅因素。

如果覺得單憑藥物都未能夠令你完全安心,都可以係有任何直接或間接嘅性接觸嘅時候都使用安全措施,例如安全套、指套、口交膜同口交套,去避免分泌物直接接觸到性器官。