我本身由細到大經期都唔準，上個月岩岩開始食左優悅避孕藥，中間都有小小血出，去完廁所抹下體嘅時候有啲啲血絲。
咁琴日就食到白色第一粒藥，應該黎M啦，但今朝起身都冇平時黎M嘅血量，得超小，都係要去廁所抹先有，但就比早期食藥嘅多啲啲，但都未係要用M巾嘅量。
我以往黎m唔準，有時兩三個月先黎一次，但每次都係海量嘅血。
我想問下我呢個情況正唔正常？
你好啊～你所遇到情況都係正常架！係服用避孕藥初期（適應期由3至6個月不等，亦有人一食已經適應咗）有機會出現唔同嘅副作用，例如不規則嘅陰道出血、頭暈、作嘔等等。你所見到嘅少少血絲係常見嘅副作用嚟嘅唔洗擔心。
而係服食避孕藥之後，月經量都會慢慢減少。特別係你以往經血量比較多，係食藥後都會見到比較明顯嘅分別，係正常嘅唔洗擔心！
都想了解下你係食藥前有無參考過醫生嘅意見呢？雖然事前避孕藥係香港唔屬於處方藥物，不過每一個牌子所含嘅荷爾蒙同劑量都有啲分別，而且都唔係每一個人嘅身體都適合食用。特別係你提及以往月經都唔係太規律，而且經血量比較多，都比較建議係經過醫生檢查確保身體真係適合食藥先去服用。而且如果本身月經唔太規律嘅話服食含有較高劑量荷爾蒙嘅藥物都會有助令月經變的規律，而優越係屬於低劑量配方。
如果食之前都冇見過醫生的話，可以考慮去家計會約見醫生。除咗有比較完善嘅檢查同複診服務，喺家計會診所買藥亦比市面平一半架～