避孕套甩左一半

Period完之後5日有戴套做左一次,
男朋友話佢係拔出嚟先射
但拔出嚟個陣個套甩左一半,仲有一半係入面。
個套入面都無乜精液主要都係地下。
想問會唔會有機會有左:confounded:

係插入過程中有使用安全的話基本上都好安全嘅,雖然係除套嘅時候安全套未有完整咁離開陰道,留咗一半係陰道內,但如果密封過一面(安全套頂端,有儲精囊果邊)依然係緊貼陰道的話,咁內裏嘅分泌物(例如尿道球腺液)有意外接觸到陰道嘅機會都唔高,變相會導致懷孕嘅可能性亦好微,唔需要太擔心。

其實有正確使用安全套的話係無需要體外射精嘅,而且射精唔係咁容易控制到,有機會情急之下就導致類似今次嘅安全套漏咗係體內,或者令安全套意外破裂嘅情況出現,反而令風險變大。

正確使用安全套嘅步驟同埋注意事項可以留意呢個post:https://www.instagram.com/p/B4EX0FVFLUf/?igshid=4go60hgr5h

下次想退出陰道嘅時候可以緊記要捉緊安全套底部,即係貼近陰莖根部嘅位置,確保有捉住安全套先將陰莖退出身體,咁都可以避免到有今次嘅情況發生!

同埋如果擔心安全套嘅保護性比較高,可以考慮同時使用一啲荷爾蒙避孕法,例如係事前避孕藥或者避孕針,呢啲相對可靠同埋成效較高嘅方法,比起體外射精會可靠得多架~

謝謝你!聽完你既解釋同我男朋友都同我講其實無係入面射,係拔出先射,知道懷孕既機會極低。
但就係會忍唔住不停亂諗嘢,可以點做:confounded:

好明白你好擔心有意外懷孕嘅風險,就算知道咗上次性行為嘅懷孕風險好低都係會有啲緊張同擔憂。 :persevere:
你試下深呼吸,放鬆下心情,同自己講:「冇事嘅」。你都可以嘗試下做下自己鍾意嘅嘢,同信任嘅朋友傾下計,可以分散下注意力輕鬆下。 :blush:
如果你都仲係好驚,你可以考慮進行驗孕。依照驗孕棒包裝說明書嘅指示驗孕,喺時限內觀察結果。喺性行為7日後驗就會有初步結果,11日後驗就會有較為準確嘅結果;見到驗孕嘅陰性結果之後,可能你就會安定啲唔會再「亂諗嘢」。 :relaxed:
不過喺現時除咗耐心等待之外其實暫時都冇乜嘢可以做到,反而可以趁呢段時間諗吓、了解下自己嘅內心點諗。 :face_with_monocle:例如可以諗吓究竟點樣先會令到自己安心?係聽完我哋嘅資訊話俾你知你嘅風險好低?定係見到驗孕結果?定係要等到下一次月經?諗好咗之後都可以當係制定一個「目標」俾自己,例如你覺得見到驗孕陰性結果已經可以有信心相信自己冇事,咁就要話俾自己知,等到驗孕之後就唔好再擔心啦。同埋要問返自己係擔心啲乜嘢?係未有準備好懷孕?擔心意外懷孕會影響同伴侶嘅關係?定係如果懷孕唔知點面對屋企人?了解完自己擔心嘅原因之後,就可以更好嘅去應對你嘅憂慮。你可以同伴侶商討下如果真係有意外懷孕嘅情況你哋會點做,如果選擇終止懷孕,可以喺家計會診所、公立醫院同部份私家醫院進行終止懷孕手術;如果選擇繼續懷孕,都可以選擇領養或者寄養服務。同伴侶有共識之後,就算將來真係面對意外懷孕都可以多一份信心嘅。 :wink:

同埋都要提多你一次,下次發生性行為嘅時候要全程正確使用安全套,唔需要體外射精都可以有好高嘅避孕成功率。

如果你想之後再發生性行為嘅時候有多一分保護同埋想更加安心啲,可以考慮用埋其他安全措施,配合安全套一齊使用,可以增加避孕成功率。例如荷爾蒙避孕法(口服避孕藥或避孕針)同子宮環。避孕針同子宮環要經醫生評估你嘅身體適合使用後先幫你注射/置入體內;而避孕藥雖然喺香港唔係處方藥物,但都建議要見醫生,等醫生評估你嘅身體狀況之後開最適合你嘅劑量俾你。現時喺家計會診所(需要預約)、某啲私家診所、母嬰健康院(需要預約,而且可以預約嘅時間選擇相對較少)都有呢啲服務。如果你有需要可以去諮詢下醫生呀 :woman_health_worker:t2: :man_health_worker:t2:

咁我呢個情況應該唔使食事後丸?我上一次係14號做。

同埋想問下因為個日用左潤滑劑,會唔會因為用得太多搞到個套甩左?

Hello~ 就好似Kitty同Ching咁講,照你所講嘅情況嘅機會好低,而緊急避孕藥嘅副作用較大,例如有機會出現頭痛、噁心、頭暈、疲倦、經痛、腹痛、背痛及乳房脹痛等現象,亦都有機會令下一次月經提早或者延遲幾日,所以你可以考慮下要唔要服食緊急避孕藥。

不過因為緊急避孕藥喺香港係必須經醫生處方嘅藥物,而且緊急避孕藥主要分為單一荷爾蒙(黃體酮)同黃體激素受體劑兩種,單一荷爾蒙緊急避孕藥嘅服用時限係性行為後嘅 72 小時內,越遲服藥,失敗率越高;而黃體激素受體劑嘅服用時限係性行為後嘅 120 小時內,服用時間唔會影響藥效,所以如果決定服食嘅話就要盡快去睇醫生,你可以到家計會、母嬰健康院、婦女健康中心、婦科診所或者私家診所經醫生評估後拎取緊急避孕藥 :man_health_worker:t2: :woman_health_worker:t2:

另外,使用潤滑劑並唔會令安全套鬆脫嘅,因為本身安全套嘅表面都有潤滑劑,而喺性行為期間安全套嘅表面嘅潤滑劑會逐漸揮發,而當安全套嘅潤滑度不足嘅時候就有機會導致安全套破裂,所以係可以按需要配合潤滑劑使用嘅,不過要留意油性嘅潤滑劑會侵蝕乳膠安全套,令安全套容易破裂,所以係唔可以同安定套一齊使用嘅 :x:

不過都有方法可以減低安全套鬆脫嘅機會嘅 :blush: 首先要確保安全套嘅尺寸合適,大部份安全套嘅包裝盒上都會印有安全套嘅尺寸,主要都係透過量度陰莖根部嘅圓周去計算,所以可以先量度陰莖嘅尺寸再選購合適嘅安全套。另外,配戴安全套嘅時候要套至陰莖根部,而每轉一個體位/將陰莖拔出後再插入時都要換一個新嘅安全套,同埋好似Kitty咁講,射精嘅時候唔需要特登抽出陰莖,因為射精時嘅衝力加上抽出陰莖嘅動作反而有機會令安全套鬆脫,只要做到以上幾點就可以有效咁避免安全套鬆脫架啦 :relaxed:

最後我無食到緊急避孕藥,但每朝起身都會有小量分泌物係內褲。咁係咪正常咖?:confounded:
我上次period 係2月6-9… 通常都會29-35日先黎一次period…

知道你依然好擔心呀,每日見住有少少分泌物都會好驚。但係嗰啲分泌物有冇顏色㗎?會唔會有類似魚腥嘅味道?狀態係好似蛋清咁定係好似豆腐渣咁呀? :thinking:

如果身體上會有啲荷爾蒙嘅變化,例如係比較接近排卵期或者月經前後分泌物都會增加。可能食過一啲藥物,又或者好擔心緊張嘅情緒,都會有機會令分泌物有變動。如果分泌物都係透明嘅,冇特別嘅味道,狀態好似蛋清咁,都唔會有咩問題嘅,因為其實陰道正常嚟講每日都會有一啲分泌物,所以基本上都唔需要太擔心。 :innocent:

月經週期可以受到好多嘢嘅影響,例如最近會唔會病咗、食緊藥、夜晚遲瞓咗、瞓得唔係幾好、心情有冇好大波動、會唔會成日都好憂慮擔心、生活上有冇好大嘅改變等等, 而你呢排不斷都擔心緊會懷孕嘅事,可能就會令你嘅月經週期受到影響,好似 @Ching 咁講 :

如果你都仲係好驚,你可以考慮進行驗孕。依照驗孕棒包裝說明書嘅指示驗孕,喺時限內觀察結果。喺性行為7日後驗就會有初步結果,11日後驗就會有較為準確嘅結果;見到驗孕嘅陰性結果之後,可能你就會安定啲唔會再「亂諗嘢」。

驗孕棒係一般嘅個人護理產品商店度已經可以買得到,去到你只需要拎咗驗孕棒去櫃檯畀錢,商店職員都只係會幫你收錢,最多可能會問你有冇散紙,唔會特別問你其他問題,所以你可以唔使擔心㗎。 記住要跟足說明書上面嘅指示去做,同埋喺指定嘅時間我去睇返個結果,過咗指定嘅時間個結果就唔準㗎喇。 :wink:

暫時仲未夠時間驗,但feel到下腹有d脹痛,胸有時會痕同覺得好攰同眼瞓。

正常就算有左都應該唔會咁快有呢d反應?

我今個月係6-9/2 period… 一般都29-35日一個cycle …

除停經之外,其他懷孕初期徵兆普遍會於懷孕後第4-6星期左右變得明顯(例如情緒不穩、嘔心感覺、嘔吐、容易疲累、乳房脹痛、尿頻等)。不過並非每一位女性懷孕期間都會出現以上嘅徵兆 :blush:

參考《Healthline - Pregnancy Symptoms: 15 Early Signs That You May Be Pregnant》:

正如 @Kitty_StickyRiceLove 有提及到,14/2該次性行為導致懷孕嘅風險係好微,無需太擔心 :blush: 相信下腹脹痛、胸部感到痕癢、容易感到疲倦嘅感覺並非由懷孕引起,依月經週期日子所見,亦未必屬經前症狀。可以留意一下最近有無咩原因,有機會令自己有以上情況出現(例如飲食狀況、個人作息等等。不過如果情況感到困擾,或者下腹脹痛嘅感覺加劇,咁到時都建議睇睇醫生,了解不適情況出現嘅原因啊 :relaxed:

今日多左分泌物,好似蛋清咁,抹既時候會有。下腹都會痛,前幾日都有腰痛。
係咪因為排卵期先會咁?定係懷孕?:persevere:

排卵期一般為下次月經前約14日嘅時間,所以按照你所講嘅月經週期計算都有機會係處於排卵期間,而排卵期間因為荷爾蒙嘅轉變分泌物的確會增多,只要無色無味,陰部亦無痕癢嘅情況都係無問題嘅,你可以喺分泌物較多嘅日子使用護墊,以保持陰部乾爽,避免感染念珠菌 :blush:

至於下腹痛同腰痛亦都有機會係因為排卵期所致,只要疼痛無加劇同持續一段長時間都唔需要太擔心嘅 :relaxed: 建議現階段你可以先喺性行為嘅11日後進行驗孕,因為長期處於擔憂嘅情緒都有機會影響經期同身心健康嘅 :pleading_face:

我想問驗孕棒係咪邊款都得?
我見佢地既使用時間都話係要等預計月經日先可以用

只要喺有信譽嘅個人護理用品店購買嘅驗孕棒都係可靠嘅 :blush: 至於使用驗孕棒嘅時間方面,好多驗子棒都會建議喺預期黎經嘅日子進行驗孕係因為嗰時嘅hCG (人绒毛膜促性腺激素) 水平較高,所以驗孕結果嘅準確度亦都會進一步提升,不過就好似頭先咁講,因為驗子棒係透過檢測尿液中嘅hCG水平去測出懷孕結果,依種激素會喺受精卵著床之後開始分泌,而受精卵著床大概需要6-9日嘅時間,所以基本上喺性行為嘅11日或以後驗孕嘅結果都係好準確架啦 :relaxed:

部分驗孕棒嘅說明書會列明喺未到預期黎經嘅日子進行驗孕嘅使用方法,例如一定要用朝早起身嘅第一泡尿驗孕,所以使用驗孕棒嘅時候,只要謹記按照說明書嘅指示進行驗孕,就可以得出準確嘅驗孕結果架啦 :blush: