你好呀 @Konayuki 
我地都祝新年快樂，身體健康呀！ 
睇得出你好渴望一段關係，但係似乎一直喺度搵嘅時候都冇辦法搵得到，有種好無力嘅感覺，好想去努力，但根本就無從著手，令你覺得好似冇嘢做到咁。 
不過都唔希望你咁快就放棄，因為我相信會有一個同你夾到嘅人。 
我諗你嘅心情都會好似首歌裏面咁樣講：「一個接一個，也沒有結果，方知海闊天高。」
望見街上情侶一對對，特別情人節啱啱過咗，難免會心諗：「耀眼的即使似瑰寶，但已經有別人擁抱。」
我覺得首歌裡面有一句講得幾好，「是你的終於會碰到，別太早替未來苦惱。」
但係後面嗰句：「只差一點好時辰，主角，始終會等到。」
係咪淨係得個等字呢？
答案當然唔係啦。 
你講過你有三段感情， 第一段係puppy love，第二段因為一啲(sexually related)嘅原因完結咗，第三段因為你完全冇feel所以都好快完咗。 
我留意到你講呢三段嘅感情嘅時候，第二同埋第三段都有講完結嘅原因，唯獨係第一段冇講，好想知道第一段完結嘅原因係啲咩呀，介唔介意話畀我聽啊？ 
你第一段感情係點樣樣㗎？回想下當初嘅呢一年拖，有乜嘢令到你哋可以一齊咁耐？而整段嘅過程，你有冇啲咩改變呀？無論係好定壞都可以試下用紙寫低，強烈建議你真係用紙筆寫低之後，先至繼續睇落去，唔好偷懶啊，之後會用到㗎。（如果你用電腦打低都得嘅，但係一定要有啲文字畀你自己再睇返）
唔知係你嘅第二段感情裏面，係咪都成日會問自己呢一個問題呢？ 
「若愛是但求開心，」我問：「要不要求其傷心？」
應該係一個好哲學嘅問題，相愛係想雙方都開心，但係相處到最後偏偏雙方都傷心。究竟喺愛情裏面，係咪開心就一定伴隨住唔開心。
係第二段關係裡面係咪都會有呢啲掙扎呢？ 
你講得好簡單呀，第二段感情係因為一啲(sexually related)嘅原因完結咗，呢啲原因係啲咩嚟㗎？
而第三段感情裏面，你最後話冇feel，所以就完結咗，我都好好奇想知道，當初你哋係點樣開始㗎？
你係心裡面答咗呢兩條問題之後，而家你可以拎返頭先你寫低喺第一段感情裏面嘅改變，去睇番第二段第三段感情，呢啲嘅改變有冇影響到呢兩段嘅關係呢？
好欣賞你會用好多唔同嘅辦法係識唔同嘅人，令到自己可以快啲進入一段關係裡面。 
就算你唔高，你唔靚仔，又唔係好外向，都唔緊要㗎，總會有一個識得欣賞你嘅人。 
好多時候你嘅唔自信會令到你自己都唔識得發光，點解有啲人條件未必咁好，但係睇落去都好charm，好多人圍住佢咁？係因為佢哋搵到一個自己嘅「閃光點」，令到其他人喺茫茫人海之中都可以睇到佢哋。 
可能你會話，我冇喎我冇閃光點㗎，咁就嘗試去發掘下啦。 
好老土咁樣諗下自己嘅優點缺點先，我哋先將缺點擺埋一邊先，主要睇下個優點，可以點樣強化佢。有冇一啲嘢你覺得自己特別擅長？有冇一啲活動係你特別鍾意？
我聽過一句說話，「愛人是一種能力，被愛是一種天賦」，我部分同意呢句說話。的確，愛人真係一種能力嚟嘅，你可以自己去控制同學習點樣去愛人。但係被愛絕對唔係一種天賦，因為每一個人都值得被愛，只要你發掘到自己嘅閃光點，我相信你都會覺得自己值得被愛㗎。 
我見到你嘅字裏行間畀咗好多框框自己， 「女人一定要一個又高又靚仔又外向嘅人」「見到啲靚女都唔敢like，費事獻醜」「 我覺得我比較成熟，所以我想搵一個大過我嘅人」
呢啲框框都限制咗你， 令你就算見到鍾意嘅都唔敢去認識， 不如我哋嘗試拋開呢啲框框，單純咁去認識一個人，話唔定咁樣會更加容易係識到人呢。
