人際/感情問題

咁多位糖不甩嘅staff大家好,首先祝大家新年快樂先。

我係男,廿幾歲,正式拍過兩次拖,另外一次試用期未完我就斬咗纜。

由細到大都冇咩家庭溫暖 (單親),所以想有個自己嘅屋企。

第一次拍拖係puppy love,拍咗一年。

第二次拍拖拍咗半年,前度因為某個原因(sexually related)飛咗我,但係唔夠兩個禮拜就另結新歡。

第三次完全冇feel所以斬纜。

期間有斷斷續續咁用交友app,亦都有識到人約過人出嚟,但係到最後都冇下文。

冇用嘅其中一個原因係因為我覺得好自卑,我唔高,又唔係靚仔,更加唔係外向,
啲女仔識人好似去街市買菜咁,又要高又要靚仔又要外向乜乜物物,
有時見到啲profile咁樣都唔敢like,廢事獻醜。

另一個原因係啲人好唔attentive,我明白大家都有自己生活,但係想識人就要用時間,
我唔知係咪我唔值得啦,但係十個有八個都會失蹤,淨返兩個就一係hea覆,一係勁耐先覆一次。

現實識又搵唔到對象,喺學校大家好似啲生活習慣好唔同,兩個世界咁。(我插班上大學,基本上個個都細過我兩三年)

我又比較成熟 (自以為),甚至俾我揀我寧願同年紀大過我嘅一齊。

我真係好辛苦,好迷茫,好灰。原本我好渴望有一段穩定嘅關係,依家我已經頹哂,冇哂動力。

希望各位可以指點迷津。

你好呀 @Konayuki :wave:t2: :wave:t2:

我地都祝新年快樂,身體健康呀! :firecracker: :firecracker:

睇得出你好渴望一段關係,但係似乎一直喺度搵嘅時候都冇辦法搵得到,有種好無力嘅感覺,好想去努力,但根本就無從著手,令你覺得好似冇嘢做到咁。 :disappointed:

不過都唔希望你咁快就放棄,因為我相信會有一個同你夾到嘅人。 :wink:

我諗你嘅心情都會好似首歌裏面咁樣講:「一個接一個,也沒有結果,方知海闊天高。」
望見街上情侶一對對,特別情人節啱啱過咗,難免會心諗:「耀眼的即使似瑰寶,但已經有別人擁抱。」

我覺得首歌裡面有一句講得幾好,「是你的終於會碰到,別太早替未來苦惱。」

但係後面嗰句:「只差一點好時辰,主角,始終會等到。」

係咪淨係得個等字呢?

答案當然唔係啦。 :bangbang: :bangbang:

你講過你有三段感情, 第一段係puppy love,第二段因為一啲(sexually related)嘅原因完結咗,第三段因為你完全冇feel所以都好快完咗。 :shushing_face:

我留意到你講呢三段嘅感情嘅時候,第二同埋第三段都有講完結嘅原因,唯獨係第一段冇講,好想知道第一段完結嘅原因係啲咩呀,介唔介意話畀我聽啊? :face_with_monocle:

你第一段感情係點樣樣㗎?回想下當初嘅呢一年拖,有乜嘢令到你哋可以一齊咁耐?而整段嘅過程,你有冇啲咩改變呀?無論係好定壞都可以試下用紙寫低,強烈建議你真係用紙筆寫低之後,先至繼續睇落去,唔好偷懶啊,之後會用到㗎。(如果你用電腦打低都得嘅,但係一定要有啲文字畀你自己再睇返) :bangbang: :bangbang: :bangbang: :bangbang:

唔知係你嘅第二段感情裏面,係咪都成日會問自己呢一個問題呢? :face_with_hand_over_mouth:

「若愛是但求開心,」我問:「要不要求其傷心?」

應該係一個好哲學嘅問題,相愛係想雙方都開心,但係相處到最後偏偏雙方都傷心。究竟喺愛情裏面,係咪開心就一定伴隨住唔開心。

係第二段關係裡面係咪都會有呢啲掙扎呢? :thinking:

你講得好簡單呀,第二段感情係因為一啲(sexually related)嘅原因完結咗,呢啲原因係啲咩嚟㗎?

而第三段感情裏面,你最後話冇feel,所以就完結咗,我都好好奇想知道,當初你哋係點樣開始㗎?

你係心裡面答咗呢兩條問題之後,而家你可以拎返頭先你寫低喺第一段感情裏面嘅改變,去睇番第二段第三段感情,呢啲嘅改變有冇影響到呢兩段嘅關係呢?

好欣賞你會用好多唔同嘅辦法係識唔同嘅人,令到自己可以快啲進入一段關係裡面。 :+1:t2:

就算你唔高,你唔靚仔,又唔係好外向,都唔緊要㗎,總會有一個識得欣賞你嘅人。 :grinning:

好多時候你嘅唔自信會令到你自己都唔識得發光,點解有啲人條件未必咁好,但係睇落去都好charm,好多人圍住佢咁?係因為佢哋搵到一個自己嘅「閃光點」,令到其他人喺茫茫人海之中都可以睇到佢哋。 :dizzy:

可能你會話,我冇喎我冇閃光點㗎,咁就嘗試去發掘下啦。 :star2:

好老土咁樣諗下自己嘅優點缺點先,我哋先將缺點擺埋一邊先,主要睇下個優點,可以點樣強化佢。有冇一啲嘢你覺得自己特別擅長?有冇一啲活動係你特別鍾意?

我聽過一句說話,「愛人是一種能力,被愛是一種天賦」,我部分同意呢句說話。的確,愛人真係一種能力嚟嘅,你可以自己去控制同學習點樣去愛人。但係被愛絕對唔係一種天賦,因為每一個人都值得被愛,只要你發掘到自己嘅閃光點,我相信你都會覺得自己值得被愛㗎。 :smiling_face_with_three_hearts:

我見到你嘅字裏行間畀咗好多框框自己, 「女人一定要一個又高又靚仔又外向嘅人」「見到啲靚女都唔敢like,費事獻醜」「 我覺得我比較成熟,所以我想搵一個大過我嘅人」

呢啲框框都限制咗你, 令你就算見到鍾意嘅都唔敢去認識, 不如我哋嘗試拋開呢啲框框,單純咁去認識一個人,話唔定咁樣會更加容易係識到人呢。 :wink: