對上兩次黎M分別係20/12-24/12同14/01-19/01，之後係24/01有發生過性行為，全程有戴套，到左尋日15/02用紙巾抹到帶紅色血絲既分泌物，以為係黎M，但係墊左M巾就得勁少血，到左今日就一啲血都冇T_T
想知其實我係咪真係黎M，如果唔係黎M既我會唔會有左:(
Hello~ 只要每次性行為嘅時候都有正確使用安全套嘅話 (有關正確使用安全套嘅方法可以參閱糖不甩IG嘅依個post：https://www.instagram.com/p/B4EX0FVFLUf/?igshid=4go60hgr5h 
)，懷孕嘅機會係好低嘅，唔洗太擔心 
至於你提到嘅血絲分泌物，睇返你過去兩個月黎經嘅日子，有機會係因為黎經前少量子宮內膜脫落引起嘅，你可以留意多幾日分泌物嘅狀況，如果血量逐漸增多嘅話，就係代表黎經啦
如果真係好擔心懷孕嘅話，可以進行驗孕，驗孕棒最早可以喺性行為嘅7日後驗出初步結果，而喺性行為嘅11日或以後驗孕嘅結果就更準確，所以你宜家驗孕嘅結果係好可靠嘅。你可以買兩個唔同牌子嘅驗孕棒，並按照說明書嘅指示進行驗孕，如果兩個嘅結果都係陰性嘅話咁就係無懷孕啦
謝謝你既解答呀，咁我睇多一兩日情況先，但都想問下黎經前少量子宮內膜脫落其實一般會持續幾耐？因為我由15/2起到尋日17/2大概都係都下晝五點幾就有帶血絲既分泌物出現，但可能到左第二朝又唔係好覺有咁
通常咁樣嘅情況都係會維持幾日，因為通常跟住落嚟血量就會慢慢增加， 咁就證明你嚟咗月經啦，唔使特別擔心㗎。 
不過都建議您可以觀察多幾日先，因為如果成個星期都係得一啲血絲但係都冇嚟月經， 都建議你到時再搵婦科醫生檢查下，因為如果持續咁耐嘅話，呢啲非經期嘅出血都有機會係一啲婦科病嘅先兆。 
即係黎經前少量子宮內膜脫落既話，血量應該會慢慢增加？因為我依兩日反而冇咩帶血絲既分泌物，反而16、17號仲比較多
而且到依家都未有黎M既跡象
通常經前有少量子宮內膜脫落嘅話，會導致經前有啡色／帶有血絲嘅分泌物。之後就會嚟經，所以血量會慢慢增加嘅。另一種會導致經前出血嘅因素係荷爾蒙，當月經週期中，體內黃體素唔足夠或者機能比較差嘅時候，就有機會出現月經前出血嘅狀況。 
建議你再觀察幾日，睇下有冇出血嘅狀況。同埋之後嘅月經週期都可以多加留意，正如Kaleo所講，不規則嘅陰道非經期出血可能係一啲疾病嘅症狀（例如子宮內膜異位），如果持續發生嘅話就要去睇下醫生啦。 
同埋都想同你解釋返月經其實好容易受到其他因素影響嘅，例如飲食、作息、壓力、藥物等等。所以每人每次月經嘅長度、週期長度都會唔同嘅。你最近有冇服用過藥物？或者壓力大，成日夜瞓？呢啲都可能會導致你嘅月經週期發生變化。
建議你再耐心等候多幾日，月經會出現嘅。
多謝你啲既解答呀，始終都係有啲擔心有左，所以今朝都買左兩支驗孕棒做test，結果都係冇事既，雖然仲未黎M不過都放心左啲，但係分泌物就冇再帶血絲，希望快啲黎M啦
如果兩支驗孕棒都顯示無懷孕，咁就可以放心曬啦
都可以留意一下最近有無以上類似嘅情況發生
有時放鬆心情，生活作息穩定D，飲食均衡，都有助令月經週期變得穩定番啊 
。
最近冇食過任何藥物呀，不過可能係夜瞓左
雖然驗左兩支都係顯示冇懷孕，但係今日都仲未黎M，會唔會話幾時都未黎既就應該再驗多次呢？
正如之前 @Ana_StickyRiceLove 所講， 24/1該次性行為嘅懷孕風險係好低嘅，無需太擔心啊。加上已經於性行為11日後，進行左兩次有效驗孕，結果亦都係可靠嘅，兩次驗孕結果亦都係negative，其實未有太大需要再驗多一次 。唔太放心的話，一般我地會建議於預計來經日子再進行多一次驗孕 。
其實我上個月即係14/1-19/1係早左黎M既，都早左十日左右，變左我都唔係好識計今個月預計黎M日子，但距離上次黎M已經40日，我係距離上次黎M 38驗，其實係咪都可以放心？
的確因為經期會受好多唔同因素影響，所以每次來經嘅日子都可能有浮動，如果唔太清楚自己嘅週期日數，因為嘗試記錄經期，宜家有唔少手機app都可以透過記錄經期幫助你更了解自己嘅週期日數同轉變
就好似Sze咁講，喺性行為嘅11日或以後驗孕檢測出黎嘅結果係好準確嘅，加上你已經進行左兩次嘅有效驗孕，其實就已經可以幾肯定係無懷孕架啦
明白無止境嘅等待同猜測的確好令人煎熬 所以都建議你去睇醫生了解身體狀況，你可以到家計會預約見醫生，佢地到時都會再同你驗多次孕，見你提到過往嘅經期都唔太穩定，所以亦都可以了解下幫助調經嘅方法，咁就可以釋除你嘅疑慮同擔憂啦
好多謝你地咁有耐性覆我呀今日去完廁所有抹到少少啡色類似血絲既野但係唔多既，但都仲係未黎M其實之前經期既日子都好穩定，係上個月14/1-19/1突然提早左但依家都未黎M始終有啲擔心係有左
知道你可能對上一次月經突然之間早咗，覺得好困惑，都想知道你上一個月係咪發生咗咩好大嘅變化呀？
就好似 @Ana 咁講，影響月經嘅因素有好多，你可以諗下你自己最近會唔會有好大嘅生活習慣改變、身體會唔會有咩病痛、最近有冇食緊藥、情緒會唔會好大波動等等，呢啲都係會影響月經週期嘅因素，而月經早到或者遲到其實都係一件好平常嘅事，好多人一生之中唔多唔少都會遇上，甚至有啲人每個月嘅月經週期都會唔一樣，所以唔需要太擔心㗎。 
同埋你對上一次月經週期提早咗，其實你成個週期都會提前咗，所以好難用返上一個週期嘅日子去計算返今個月嘅月經幾時嚟架。 
見你之前講話你嗰次嘅性行為全程都有戴安全套，基本上懷孕嘅風險真係非常之低㗎，所以唔需要太擔心。我見你都有用到驗孕棒驗過幾次，結果都係陰性，即係冇懷孕，其實個結果已經非常之可信㗎喇。另外可以試下用電子驗孕棒驗孕嘅，除咗會比較清晰啲咁睇到有無懷孕之外，都可以睇到懷孕嘅週期。
如果真係仲擔心嘅話，有啲診所會提供驗血驗孕嘅服務，驗血係最準確嘅方式，如果會令你更加安心，你可以嘗試下㗎。
其實道理大家都知，我諗我地話俾你聽懷孕嘅風險好低，你亦都有驗孕，但係都係會好擔心。好似頭先咁講，情緒嘅波動都會影響月經週期嘅，如果你一直擔心，月經受影響而遲嚟，月經遲嚟你又更擔心，你擔心又影響月經，咁樣落去，你會身心都好攰架，不如我地試下訂立一個目標呀， 例如我地驗孕驗咗幾多次就相信個結果？又或者真係去驗血拎到醫生報告？又或者真係等到月經嚟到？
如果你揀等月經嚟，咁你就可以暫時放低呢樣嘢先，去做一啲自己鍾意嘅嘢，令自己心情放鬆啲，月經自自然然就會嚟搵你架啦。