調轉安全套

係2月12日進行性行為時,男友一開始將安全套戴入發現戴唔入去,然後佢發現倒轉左,就調返轉戴繼續,我想問會唔會有機會懷孕,因為都咁岩係排卵期,而且過左4日都錯過左服用事後丸的黃金期,請問會唔會大機會懷孕

Hello~ 男性受到性刺激嘅時候,陰莖會自動分泌一啲透明而黏黏地嘅液體,叫做尿道球腺液,當中都含有少量精子,所以照你所講嘅情況,安全套有機會接觸到尿道球腺液,然後喺調返轉戴嘅時候將尿道球腺液入陰道,所以係有懷孕嘅機會嘅 :pleading_face:

不過因為尿道球腺液所含嘅精子數量相對精液少,而且精子有機會喺抽出陰莖重新戴上安全套嘅過程中因為接觸到空氣而死亡,所以懷孕嘅機會都唔算太高嘅。而因為就好似你咁講,宜家已經過左緊急避孕藥嘅服食時限 (最長為性行為後嘅120小時內),雖然子宮環可以喺性行為嘅五日內作緊急避孕之用,但係約見醫生同放置子宮環都需時,亦唔係每個人都適合使用子宮環,所以比較建議你喺嗰次性行為嘅7-11日後進行驗孕。

驗孕棒最早可以喺性行為嘅7日後驗出初步結果,而喺性行為嘅11日或以後驗出嘅結果就更準確,你可以買兩個唔同牌子嘅驗孕棒,並按照說明書嘅指示進行驗孕,如果兩個嘅結果都係陰性就應該係無懷孕啦 :relaxed:

另外,下次性行為時如果發現戴反左安全套,記住換過一個新嘅套阿 :wink: 如果覺得好難分辨安全套嘅正反,可以試下對住個套輕輕吹一口氣,如果膠圈喺外面就係正面,相反如果膠圈被包住喺入面就係反面,知道就咁講可能有啲抽象,所以你可以參考下糖不甩嘅依個ig post,入面有圖示安全套嘅正反分別嘅 :blush: https://www.instagram.com/p/B4EX0FVFLUf/?igshid=1o2eryo4tlfj5