究竟我係咪鐘意佢?要分手嗎?

我而家有男朋友 一齊左10個月到佢提出分手 我超級傷心 過左一排復合翻(佢提出的) 我都猶豫了好耐最後都係答應復合 但今次我對佢係已經有個防備係到(因為之前分手比佢傷得太深) 到今年先開始比較放得低 但問題來了 我好似已經唔鐘意佢 我唔肯定 我同佢相處都係開心 舒服 而且都鐘意同佢有親密接觸 但我就係有種已經唔想再同佢一齊嘅念頭 咁至於我點解仲無同佢分手? 我覺得自己好似太留戀一段關係 唔捨得離開 。

而且 我都唔太想過單身生活(繼續我同佢分左呢排應該都唔會有新戀情) 我應該點處理呢段關係好

另外 我仲好似鐘意左第二個 我同佢係同學 所以都有少少交流 感覺如果我肯主動(雖然我唔係一個主動嘅人) 會算係有機會
我原本覺得自己對佢嘅只係好感 但呢排成日發夢夢見佢 仲會對佢有性幻想 咁樣唔係咪已經鐘意左佢?同埋我係咪已經唔鐘意我男朋友?

我話呢排應該都唔會有新戀情係因為我一直都係無咩異性緣 桃花運嘅意思 另外我又話如果我肯主動可能有機會係因為個人感覺佢可能對我有啲好感(純粹猜測 雖然可能係我唸多左)
難道真的就沒有嘅唔去 新嘅唔黎
其實我已經有同而家男朋友分手嘅念頭一段時間 但我怕hurt到佢 都怕hurt到自己…

舊嘅唔去 新嘅唔黎* (上面打錯字)

Hello @oneone :relaxed: :wave:t2: 首先我地可以嘗試分開番兩個人,兩段關係先 :blush:

第一段關係,見到你已經有提及分手嘅想法都已經出現左一段時間,亦唔想同對方再一齊。都想了解一下,你覺得呢種唔想再一齊嘅念頭,係點樣萌生出黎?因為你有提及到相處依然舒服開心,亦都鍾意同對方有親密接觸,所以好奇你係覺得「鍾意」嘅感覺已經無以前咁強烈,唔想再繼續維繫?還是你對男朋友或者關係有其他嘅想法、顧慮,令你已經唔想再繼續呢一段關係?定係真係因為受果位你鍾意嘅同學影響,令你從喜歡嘅感覺相比,想同同學一齊多D? :wink:

關係係兩個人之間嘅互動,如果你覺得現階段唔想分手的話,想繼續維繫住先嘅,當然可以係一種選擇 :blush: 如果對男朋友嘅行為或者相處上有想法,會唔會都可以先嘗試同男朋友去提出,透過溝通去慢慢磨合?不過都可以試想像,當你已經再無同男朋友一齊嘅想法,你覺得相處嘅過程中,男朋友會唔會其實都感受得到你已經無再咁鍾意佢?雖然分手有機會hurt到對方以及你自己,但係另一方面,繼續維繫係咪對於雙方都係健康嘅做法,還是有機會更傷害左雙方嘅感情及時間?

單身嘅生活,你覺得係一個點樣嘅生活模式?點解會唔太想過?:blush: 係過往單身嘅日子曾經有過D咩經歷,令你覺得唔太鍾意;還是同拍拖嘅日子相比,有好唔同嘅地方,令你比較享受交往嘅日子?

愛情入面,我地都期望可以得到唔同嘅野,例如安全感、親密感、滿足感、陪伴嘅感覺。得到嘅同時,我地又有無相應嘅付出,讓伴侶都可以感受得到呢?如果之後只係得番單方面嘅喜歡、鍾意,對於男朋友而言可能都只會越黎越氣餒,或者更加唔知道要點樣維繫呢段關係。

分唔分手,或者幾時分手,你都有呢個權利去選擇。只係繼續維繫嘅時候,到底對你而言,對男朋友而言,以及對關係而言,係咪都係「好」嘅做法,我估只有你以及男朋友先會最清楚 :relaxed:

而第二段關係,都可以解釋番有性幻想唔一定係鍾意左對方,又或者想同對方拍拖。每個人嘅性幻想對象都可以唔同,有人可能對網絡唔認識嘅人有性幻想,有人可能對虛擬嘅角色有性幻想,亦可以同時對唔同嘅對象有性幻想,亦係好正常嘅情況 :smiling_face_with_three_hearts:。而呢一種性幻想,係源於片刻嘅快感、鍾意,還是想同對方發展長遠嘅關係,就可能每個人都有唔同嘅答案。

一段愛情,除左包含好感、性之外,有時都會包含親密感、承諾等等。你覺得從同學嘅相處上,佢對你如何?只係上堂同你有交流,還是其他時候都有關心你?兩個人日常相處上你覺得都舒服?都可以先嘗試多D留意平日嘅相處,睇下雙方都覺得彼此係合適嘅交往對象啊~

最後,雖然話就話「舊嘅唔去 新嘅唔黎」,不過都可以諗諗「舊嘅係咪需要去 :blush:」,「新嘅係咪適合黎 :shushing_face:」。可能唔少人都享受拍拖時嘅感覺,有陪伴親密嘅感覺。但係如果只係為左持續「拍拖」呢一個生活,而同一位唔適合自己,或者自己唔太鍾意嘅對象一齊,彼此係咪依然都會幸福開心呢?單身嘅生活可能會相對有點寂寞,或者少左一個人嘅陪伴,但係同時都可以有多點時間比自己,同埋體驗其他嘅生活。例如陪多D朋友、屋企人,發展自己嘅興趣、或者好好咁去放鬆一下自己。

可以多聽聽自己內心嘅聲音,到底自己依家需要D咩,以及點樣處理兩段關係,可能對你及對方而言先會比較好啊~ :smiling_face_with_three_hearts: 有其他嘅想法或者感受,我地糖不甩都好歡迎你繼續同我地傾訴。

我有出現唔想再同佢一齊係因為我覺得佢唔係我嘅理想型 (當然會一齊嘅未必會復合你嘅理想!) 我唔知點表達 即係你可以當係佢有啲character係唔符合我嘅摘偶要求(唔係啲咩大缺點 純粹係唔符合我嘅preference) 另外對佢嘅熱情都減退左啦 同埋我都會對其他人有好感 同埋我已經知道我地遲早會分 純粹係遲同早嘅分別 例如一個月後 半年後 定一年後

簡單啲黎講 我而家就係鐘意佢鐘意我… 我知道呢仲做法好差 所以我都想完結呢段關係

我唔想單身係因為想有人平時可以陪我 傾計 出街啊 個啲 當然我都會同朋友咁做 但我同朋友唔係會keep住每一日傾計個啲 如果有另一半就可以同佢分享生活個啲 一齊陪伴大家咁

另一個顧慮係其實我都幾鐘意同我而家男朋友嘅相處 出街一齊挽 食飯 傾計咁 不過就係我內心已經想搵過另一個…

Hello~ 美國嘅一位心理學家Robert Jeffrey Sternberg 曾經發表過一個愛情三角論 (Triangular Theory of Love),當中將愛情比喻為一個三角形,而依個三角形分別由親密(intimacy)、 激情(passion)、 承諾(commitment)依三大元素構成。依三大元素可以分別組成唔同類型的關係,例如只有激情會產生短暫而熱烈的迷戀式愛情,或者只有親密同承諾嘅就係好似密友嘅關係,只有激情同親密嘅係浪漫式愛情等等。雖然理論中指出具備三種元素嘅就是完美嘅愛情關係,但係當然每個人都可以有佢對愛情嘅期望 :thought_balloon: (參考資料: https://treehole.hk/psychology/愛情三角理論/)

見你提到覺得自己對男朋友嘅熱情減退左,亦都知道遲早有一日會分手,但係就依然享受對方嘅陪伴,咁可能你地之間嘅關係有親密依個元素 (親密並唔係指身體接觸方面,而係講緊彼此嘅陪伴同溝通),但係就缺少左激情同承諾。所以係決定要唔要結束依段關係,以至閞展一段新關係嘅時候,你可以按照愛情三角論思考下自己期望嘅關係係包括邊啲元素,而對方嘅期望又係唔係同你一致,因為雙方對愛情嘅期望越一致,兩個人嘅感情就會越幸福 :smiling_face_with_three_hearts:

最後,想同你分享一段幾有趣嘅關於戀愛嘅短片,當中係從一啲科學嘅角度,去讓我地了解多啲自己處於一段關係唔同階段嘅時候嘅反應,希望都可以喺你作選擇嘅時候幫到你 :relaxed: