好驚中招啊😭

本身同女朋友未計畫咁快行下一步,所以好少有性生活,1月6號黎m,係23/1個日只係親熱咗(應該係危險期)過程中有用手互相幫,唔肯定手上有冇自己分泌物,但肯定掂佢下面之前,隻手有撫摸過佢其他地方,同埋兩個人都有隔著底底摩擦咗一陣,冇帶安全套,但最後係射係唔近佢下面嘅位置。之後大家都有擔心,過程中隔內褲摩擦,有分泌液係褲底底度會出事。

但女朋友過去幾個月生理期都30-35日左右,1月6號黎m,理論上今個月頭(2月)應該黎m,但如果用30日一個period計,到今日都未黎m。其實已經係19/2號(親熱後第27日)買咗「clxxrblue」嘅驗孕棒用晨尿試,顯示係negative,雖然女朋友沒有跟說明書要對準尿液5秒鐘(可能只係2秒),但肯定試紙變曬色,control window都有顯示出間條。
P.S 女朋友1月份黎m時血量俾以前少,同比以前辛苦。

問題:

  1. 驗孕棒有冇機會唔準(未夠5秒),定係可以確定冇中招?
  2. 還是假設是中招會唔會太低hCG濃度太低,而驗唔到(但計落係親熱後第27日,用30日period計,遲黎m第14日)
  3. 有冇需要再驗多次,幾時再驗最適合?
  4. 但遲遲未黎m,又未feel到黎m,始終都係擔心!

謝謝

Hello @hlykelly1 :blush: :wave:t2: 首先都講番你23/1果次親密接觸嘅懷孕風險先。

就你同女朋友嘅情況,懷孕嘅機率係近乎零。因為一般尿道球腺液(陰莖性興奮時分泌嘅透明分泌物)/精液,接觸到空氣或者其他物質(例如皮膚、內褲)嘅時候,於幾分鐘內就會乾透。分泌物內含嘅精子,亦會因為失去活動能力而死亡。所以精子係好難穿過幾層嘅布料,並游入你嘅陰道內導致女朋友懷孕。所以除非女朋友嘅下體同你嘅分泌物有直接嘅接觸,否則會導致懷孕嘅機率都係近乎零,所以無需要太擔心~ :wink: :relaxed:

而驗孕方面,等我都回覆一下你嘅疑問。

  1. 雖然未夠5秒,不過如果見到試紙已經變曬色,應該都無太大問題。加上質控窗(control window)內有顯示一條藍線的話,咁代表呢次嘅驗孕測試係有效嘅,negative結果係可靠,所以無需太擔心未夠5秒會對驗孕結果有明顯影響。不過下次都建議依番說明書指示進行驗孕,驗孕結果會比較準確啊 :wink:

  2. 一般受精卵著床需要6-9日,所以性行為7日後進行驗孕,就已經可以有初步嘅驗孕結果,而性行為11日後驗孕,結果就會較準確及可靠。因此,如果23/1的性接觸如果有導致女朋友懷孕的話,於性行為後第27日驗孕,相信hCG濃度已經足夠令驗孕棒檢測得到 :blush:

  3. 暫時睇23/1該次性行為嘅懷孕風險較低,亦已經進行左一次有效驗孕,其實未有太大需要再驗多一次。不過如果你同女朋友都係唔太放心的話,一般我地會建議於預計來經日子再進行多次驗孕。但係因為依家已經過左預計來經日子,咁可以隨時再買多支驗孕棒再進行一次測試 :relaxed:

  4. 月經來遲可以有唔同嘅原因,例如情緒有起伏、壓力過大、生活作息唔定時、飲食唔均衡、最近生病有服藥(特別係抗生素)等。可以先了解一下最近女朋友有無經歷類似嘅情況(例如病過、生活有變化、身體有特別狀況),有機會令月經來遲 :smiling_face_with_three_hearts:

女朋友1月份來經方面,經血量比以前少方面無需太擔心。每個月嘅經血量唔同,係正常嘅情況。經血量係受身體雌激素嘅分泌嘅濃度影響,所以有時長期疲勞、壓力大都會有機會令經血量變少~ 最近呢個月食少左野,或者減肥都有機會有所影響 :wink: 反而你提及女朋友1月份來經比以前辛苦,有無話具體係咩情況? :pleading_face:

因為之前都有提及到過往月經週期都係大概30-35日,所以今次都的確比起過往嘅月經黎得比較遲。加上上文提及到1月份經血量突然變少,如果女朋友過多一兩日都未來經,都建議考慮打電話去家計會預約,睇睇醫生。到時應該醫生都會建議驗孕一次,同埋做番個詳細嘅檢查,從而了解今次月經週期來遲係咩原因。因為過往都曾經聽過類似個案,係因為體內荷爾蒙有變動,而醫生都檢查過並非子宮或卵巢異樣,最後醫生係處方左荷爾蒙藥物幫助催經 :blush:

最後,都提醒番下次接觸過分泌物之後,建議先洗手,再觸碰彼此嘅性器官。咁就可以避免導致懷孕嘅風險,而大家都可以放心D~ :relaxed: 而正如上文提及到,月經週期可以受到唔同因素影響,排卵日有機會因為呢D因素而提前/延遲。所以都唔建議依賴所謂嘅「危險期/安全期」等日子,而去發生唔安全嘅性行為啊

多謝你詳細的解答。冇錯,我始終都擔心,所以都決定今朝早驗多次(第29日,今次跟足指示5秒,結果都係negative。

我上網睇過好多cases自己用驗孕棒都係驗唔到,最後幾個星期甚至10個星期先驗到!

所以佢始終一日唔黎m,我都仍然有啲擔心。

明白發生性行為之後月經遲遲未黎的確令人擔心:pleading_face: 不過兩次驗孕嘅結果都係陰性,加上你嗰次性行為嘅風險好低,其實都可以幾肯定係無懷孕架啦 :relaxed: 至於你提到嘅網上個案,有機會係因為錯誤使驗孕棒所致,而且每個人嘅情況都唔同,好難用作參考。

無止境嘅等待同猜測的確好令人煎熬:persevere: 所以都建議你女朋友去睇醫生了解返身體狀況阿 :woman_health_worker:t2: :man_health_worker:t2:

我地都抽緊時間盡快去睇醫生

不過佢琴日開始都腹痛同胸有啲脹…唔知係就黎定係…:sob:,當然係琴日先開始,離親熱剛好一個月,月經依然第47日未黎…究竟會唔會驗唔到,但支驗孕棒都係sensitive…而且親熱後都29日negative…唔知點:sob:

昨天(親熱後35日)同女朋友去看醫生了,照咗超聲波發覺冇特別,當場再驗多次驗孕棒,都係negative,

  1. 但照超聲波前飲過好多水,會唔會影響驗孕棒結果?
  2. 會唔會因為時間還早,超聲波照唔到野?

醫生話佢增厚緊…其實係唔係代表準備黎m?

現時多數驗孕棒都有好高嘅敏感性和特異度(Sensitivity and Specificity),就算驗完之前有飲大量水,或者唔係用晨尿,結果都係會好準確嘅。 :wink:建議用晨尿只係因為通常晨尿中hCG(一種受精卵著床之後就會開始分泌嘅荷爾蒙,而受精著床嘅過程大概係性行為後6-9日就會完成,所以一般如果真係懷孕,由性行為9日後已經會開始見到有hCG嘅分泌、)濃度相對比較高,會更加容易得到結果。

如果伴侶真係有懷孕,去到睇醫生個陣懷孕週數已經有6週(一般懷孕週期係由最後一次月經完結開始計算:女朋友對上一次月經係6/1開始,假設大概嚟咗6日,係11/1結束。咁噚日(27/2)去睇醫生嘅時候已經係6個星期後嘅事),而呢個週數嘅超聲波影像通常係可以清晰見到胚胎嘅。但醫生話超聲波冇胚胎影像,咁就可以確定係冇懷孕嘅。而且一般如果真係懷孕,去到第6週,hCG嘅數量都已經上升到1080-56500 mlU/mL,所以用驗孕棒去測試的話基本上係一定會得到結果架啦。 :grimacing:

月經前子宮內壁係會加厚嘅,而月經期間子宮內膜會脫落。如果醫生診斷後並冇俾催經嘅藥物伴侶,咁就可以再耐心等候下。 :relaxed:同一時間,排除咗懷孕可能性之後,如果希望快啲黎月經的話,可以向醫生查詢處方催經藥,睇下身體適唔適合服食。之後亦可以考慮透過服食避孕藥。一來可以避孕功效比較高,可以提供全天候嘅保障,即使係無直接插入嘅性行為都唔需要擔心因為冇使用安全套而有意外嘅風險。藥物亦可以令月經變得規律,同埋減少經期期間常見嘅不適。關於催經藥同埋事前避孕藥都可以考慮去家計會嘅診所見醫生,或者徵詢返幫你地做超聲波嘅醫生。

正如之前Sze所講,有好多其他因素都會影響月經週期嘅。可能擔心懷孕呢種好緊張嘅情緒都係其中一個令伴侶月經週期變化嘅原因。放鬆下心情,月經會出現嘅。 :smiling_face_with_three_hearts:除此之外,因為今次月經嘅日子都比預期中有差距,代表今個月嘅月經周期比起以往有更明顯嘅變動。係今次月經嚟咗之後,下個月都未必可以用返以往30-35嘅週期去預計下個月嘅月經,要有定心理準備呀~ :sparkling_heart:

多謝詳細的回覆,醫生開咗催經藥啊,但女朋友話傷身唔敢食,等佢自然黎:man_facepalming:t6::man_facepalming:t6::man_facepalming:t6:,其實食催經藥會唔會對身體有影響?

PS…一日未黎,都係好焦慮驚中咗:man_facepalming:t6::man_facepalming:t6::man_facepalming:t6:

其實西醫處方嘅催經藥嘅原理係利用含黃體素(Progesterone) 嘅藥物提高體內黃體素嘅濃度,當停藥嘅時候,體內黃體素濃度就會急速下降,造成人為嘅月經來潮 (參考資料: https://www.mmhfm.tw/mmhfm/index.php/menu-travel-clinic/149-adjustment-period.html)。服用黃體素後有機會出現噁心、輕微陰道出血、乳房漲痛、體重增加、頭暈、情緒低落等情況 (參考資料: https://medlineplus.gov/druginfo/meds/a604017.html),但係一般都會喺短時間內消失 :blush: 而且醫生係評估你女朋友嘅身體狀況後先處方催經藥,所以係唔需要太擔心會影響身體健康嘅 :relaxed: 反而如果因為未黎經而長時間處於擔憂嘅狀態,都會影響身心健康阿 :pleading_face: