心理作用🥲

咁我自己本身都食咗避孕藥差唔多一年,每次做完之後都會有啲擔心係咪有咗啦,會成日睇下自己有咩變化,人個就開始緊張同擔心 然後唔知係咪心理作用關係,有少少變化呢就會覺得係有咗。
同男朋友係2月15同做完之後射咗入去,咁清潔番個陣發現有好少好少嘅血,咁我估可能係過程中用力咗。我呢次做完之後唔知點解過咗兩三日就覺得子宮位置定唔係膀胱位置好似有野壓住咁 ,跟住當我訓係到嘅時候明明頭先先去完廁所但好快就又種感覺想再去,我想問關唔關做嘅時候用力咗?定係我自己太過擔心然後令到心理同生理出現變化?

唔好意思遲咗覆你 :bowing_man:t2: :bowing_woman:t2:

避孕藥係通過人造荷爾蒙,抑制排卵;同埋令子宮內膜發生變化,令受精卵唔會喺子宮著床;仲會增加子宮頸分泌物嘅粘稠度,令到精子難以穿過黏液進入子宮。呢啲原理加埋,就能夠達致避孕嘅效果。正確服用避孕藥嘅避孕成功率有91-99.7%。而你已經差唔多服用一年,身體應該已經適應咗藥物,喺冇漏食或者嘔吐嘅情況下,其實你已經有好穩定嘅避孕效果啦。所以唔使好擔心會意外懷孕嘅。而如果你依然好擔心,你都可以考慮同時使用安全套,配合口服避孕藥,可以更加提升避孕成功率,亦可以減低性病同其他疾病嘅傳播。 :relaxed:有關正確使用安全套嘅資訊,可以參考:https://www.stickyricelove.com/post/__安全套

你有提及性行為中出現出血嘅情況,有機會係因為太激烈同埋潤滑不足,導致陰道有輕微嘅受傷所以流血。通常呢啲細微嘅傷口會好快好返,做好日常清潔,就可以避免有發炎感染嘅風險。你下次可以考慮使用潤滑劑,咁就可以避免潤滑不足而覺得痛/有輕微破損。你可以參考:https://www.stickyricelove.com/post/__潤滑劑

而你所講嘅不斷有想去廁所嘅感覺都可能有好多原因造成。例如有時飲水比較多,或者心情比較緊張嘅時候會有呢種感覺。而有啲人有時會喺月經前覺得下腹漲、容易尿頻,呢啲係正常嘅經前症狀。性行為過程比較刺激都有機會產生呢種感覺,不過都會係性行為發生嘅當日開始有,未必會好似你嘅情況係2/3日後先出現。建議你嘗試放鬆心情,應該情況會有改善。 :blush:
但如果你嘅情況持續,尿頻而且每次只能夠排出少量尿液、小便時仲有痛楚嘅感覺、小腹脹痛、甚至有發燒,咁就可能係尿道感染、膀胱發炎或者子宮有出現其他狀況。建議你去睇醫生進行相應嘅治療。食咗避孕藥之後都建議大概每一年就要做一次身體檢查,睇下係咪適合繼續食藥,如果呢啲症狀持續到不妨襯呢個機會去做一個全面嘅身體檢查,特別係婦科檢查。 :wink: