話說情人節14/2，啱啱嚟完m，仲有少少血，同男朋友
，內射咗，會唔會有咗？今日24/2，原定排卵日，係咁作嘔，好驚有左點算
，經期好飄忽，有時兩三個月會好準，一兩個月會唔準，有冇人可以解答我thx a lot!
你好 @Mmccy 
排卵嘅日子都可以因為好多唔同嘅因素而改變，有機會提早或者遲咗，所以雖然你啱啱嚟完月經，但係都唔可以完全排除懷孕嘅風險。而排卵日只可以推算，實質上如果真係想知道邊一日係排卵日嘅話，係需要係醫生嘅指導下每日使用排卵棒驗先會知道邊一日係排卵日，而今個月嘅排卵日子又同下個月未必一樣，而且排卵嘅日子受到好多因素影響，都未必一定係月經完結先會排卵嘅，有啲人月經週期比較短嘅，好可能係嚟緊月經嘅時候已經排緊卵架啦，所以唔可以講實係邊日，都只能夠粗略估計架咋。 
影響月經週期嘅原因有好多， 例如近排會唔會有好大嘅生活習慣改變啦、會唔會食緊藥喇、身體有冇咩病痛、最近會唔會成日失眠、情緒有冇好大嘅波動等等，都有可能令月經早左或者遲咗，所以你講嘅經期好飄忽呢樣嘢，其實係好普遍好多人都會遇到嘅事。 
另外， 如果你真係好擔心會懷孕，可以去一啲個人護理嘅商店買驗孕棒驗孕，你係25/2，即係你14/2性行為之後嘅11日後去驗孕，個結果都好可信㗎喇。記住要跟返說明書上面嘅指示去做，同埋係指定嘅時間內睇結果。你驗完之後，都可以上返嚟再同我哋傾返，睇下到時候會唔會有啲咩新嘅進展或者資料可以畀你啦。 
見你都話你月經週期比較飄忽啦，同時亦都有避孕嘅需要，可以試下一啲荷爾蒙式嘅避孕方法， 例如食事前避孕藥、打避孕針等等，咁樣唔單止可以令到你嘅月經週期變得比較穩定，同時亦都可以避孕。但係要留意返， 荷爾蒙嘅避孕方法係需要喺月經期間開始進行嘅， 所以如果你真係有需要嘅話，可以喺下一次月經嚟嘅時候打去家計會到約時間，等醫生評估你嘅身體狀況適合食邊一隻避孕藥， 咁就可以一舉兩得啦。 
同埋如果都係經常好飄忽，而你又好擔心，都可以去婦產科度做一啲檢查，都有可能係因為身體出現咗啲問題，令到月經週期變得唔穩定，咁樣至少可以排除一個月經週期唔穩定嘅因素，你都可以安心啲。 
仲有仲有，記住下次一定要使用安全措施呀。 