你好 請問如果以前細個曾經去過家計會終止懷孕 ，係咪第2次吾會再幫我？
家計會並唔會因為你以前進行過終止懷孕而唔幫你嘅。 
不過要注意嘅係，家計會診所只可以對懷孕週數10週內嘅人提供服務。所以如果你發現咗自己意外懷孕，而決定咗要進行終止懷孕，而懷孕週數唔夠10週，咁就要盡快預約啦。你可以參考呢個網頁，搵方便你去嘅家計會診所然後預約：https://www.famplan.org.hk/zh/our-services/clinic-services/termination-of-pregnancy/content
現時香港除咗家計會診所之外，政府醫院同埋部份私家醫院都有提供呢個服務嘅，你有需要都可以考慮下。同埋都想同你講，除咗終止懷孕之外，你仲有其他面對意外懷孕嘅方法，如果你想繼續生育嘅話，香港現時都有領養同埋寄養服務嘅。你可以做出最適合自己嘅選擇，無論你最後點決定，我哋會支持你嘅！ 
好明白你而家可能會有複雜嘅心情或者有好多擔憂。如果你有任何疑慮你願意嘅話都可以同我哋分享，我哋會盡力解答㗎。 
如私家醫院是不是需要醫生證明？
Hello~ 首先根據「香港合法墮胎條例」，申請終止懷孕嘅當事人要經兩名醫生證明其正在懷孕，而且繼續懷孕對孕婦生命構成嘅生理或心理損害較終止懷孕大 (參考資料: https://www.famplan.org.hk/zh/health-info/unplanned-pregnancy) 。現時提供終止懷孕服務嘅私家醫院只有仁安醫院、港怡醫院、明德國際醫院同埋養和醫院，而喺私家醫院終止懷孕需唔需要轉介信就視乎情況：
如果你選擇到私家醫院嘅門診見醫生，經醫生評估後一般係可以直接轉介至私家醫院進行終止懷孕嘅，咁樣一條龍服務就可以免卻左轉介信嘅程序，而且因為私家醫院嘅門診唔係好似一般診所咁只有一位醫生，所以喺申請兩名醫生證明時較方便同慳時間，不過因為疫情關係，建議先致電私家醫院嘅服務熱線了解返門診轉介嘅詳情同埋需要嘅文件 
另外，因為未必每一間私家診所都熟悉轉介終止懷孕申請者到私家醫院嘅程序，所以你可以選擇到家計會見醫生後，申請安排轉介到私家醫院進行終止懷孕嘅服務，因為你之前到過家計會進行終止懷孕，所以家計會可以根據你嘅記錄評估你嘅身體狀況從而提供較適切嘅意見 
不過如果你唔想去返家計會嘅話，亦都可以選擇向其他機構例如: 青躍、母親的抉擇等尋求援助，佢地都會有一啲相熟嘅私家診所可以轉介 