你好，本人因同多年女友分開，失去理智，前日24/2飲酒後，不慎去咗搵性工作者(一樓一），今次係我人生第一次去依啲地方。事後好後悔亦都好驚。
我跟那妓女沒有陰道性交，只有她幫我用手(無套)及全程帶套口交(由一開始幫我口交到射，全程有帶)，想問有愛滋病及性病嘅機率大嗎？
另外當時因為有沖涼，她有給予我毛巾抹身，會否因用一些其他人我做過的毛巾而感染性病或愛滋病嗎求救
Ps:完事後返到屋企硬係覺得周身痕，唔自在
求幫忙
性病（包括愛滋病）嘅傳播途經有：血液、精液、陰道分泌等體液交換；有損傷的皮膚、眼睛、口腔和鼻腔等黏膜交換。所以冇使用安全套嘅口交、陰道交或者肛交係比較高風險嘅性行為。但你當日口交嘅時候有全程使用安全套，所以風險都好低。而只要對方嘅手係冇開放性傷口（流緊血／有破損），咁手交嘅過程都係好低風險。 
至於共用毛巾呢方面，只要毛巾上面冇分泌物／體液同你嘅黏膜組織／開放式嘅傷口有直接接觸，其實都唔會有風險嘅。而且即使毛巾上有其他人嘅分泌物，其實接觸到毛巾嘅表面後好快都會被吸收，令內裡可能有嘅細菌同病毒失去活動能力。而且例如係愛滋病病毒HIV，呢種病毒本身就係好容易受外在因素影響嘅，只要接觸到空氣基本上都好快會死亡。所以除非有進行以上所提及性器官有直接互相接觸嘅行為之外，會因為其他行為而感染到性病嘅機會率係好低。
另外，其實好多時性工作者都比一般人更加注重性行為期間嘅安全性同衛生，亦會恆常地進行性病檢查去確保自己嘅身體狀況。好多性工作者都會主動提出係接觸性器官嘅時候要使用安全套，反而好多時都係客人要求、強迫、甚至欺騙性工作作出唔安全嘅性行為。覺得性工作「好污糟」或者「一定有性病」其實都係社會對性同性工作嘅污名嚟。會唔會感染性病其實同發生性行為嘅對象冇直接關係，重點係性行為期間有冇正確咁使用安全措施同埋恆常進行性病檢查，否則即使係同伴侶發生性行為都一樣可以感染到性病。係現實中亦有好多人係因為同自己嘅伴侶發生性行為而感染性病嘅，因為好多性病都有一定潛伏期，甚至可以長期冇病徵，所以係同唔同性伴侶（例如轉換過伴侶）發生性行為嘅時候如果無用安全套，都一樣有傳播／感染性病嘅可能性。
你感覺到周身痕或者唔自在好多機會係來自於心理因素嘅影響，可能係因為你覺得搵性工作者呢個決定係衝動嘅（例如你都提及事後有覺得後悔同好驚），亦可能係你對性工作者嘅健康同衛生習慣有嘅假設，而導致出現一啲生理反應，簡單來講就係有種周身唔聚財嘅感覺。雖然今次嘅性行為會感染性病嘅風險好低，但如果你以往都冇進行過性病檢查嘅話，都不妨趁呢次機會去做一個全面嘅檢查。一般全面嘅檢查都會建議係過咗空窗期（例如愛滋病病毒係發生性行為後3個月）後先做，可以考慮去衛生署嘅社會衛生科（合資格人士費用全免亦毋須預約）、家計會或者坊間有提供免費測試嘅機構（機構嘅服務有時會限制係某啲群體先可以使用，事前都要自己上網了解一下先）。而如果經濟上你能夠負擔得到，有好多私家診所都有提供有較短空窗期嘅測試，亦會有唔同嘅package可以做全面嘅檢查可以俾你選擇。而家（過咗最後一次性行為嘅空窗期之後）去做測試除咗可以確定呢次同時性工作者嘅性接觸有冇風險之外，亦可以確認埋以往同嘅性經驗有冇令身體感染到性病，而自己一直都唔知道。有部份嘅測試（例如係疱疹嘅IgG同IgM測試）係可以大概知道感染係屬於近期定以往，但大部分測試都唔能夠知道實際感染日期，所以即使測試結果係有感染都依然係唔可以確定係咪由性工作身上感染嘅（加上本身行為風險唔高，如果有感染的話好大機會都唔係因為性工作者）。可以按自己嘅情況同需要選擇適合嘅測試，令自己現在同日後再發生性行為嘅時候都可以更加放心。 
感謝回覆，但我上網搵過好多網站(包括香港台灣大陸)，原來安全套都不是完全可防愛滋病（淨係有講避孕有98%），尤其是細菌、病毒、衣原體等的性病，還是有機率穿透孔徑，接觸皮膚的。死火啦，我依兩天硬係覺得下體有啲不自然感覺，又或者會否佢提供的套，係假嘢，或者劣質，或者過期。而另個套完全無效呢？
唔好意思，麻煩到你
應該係話網上講，安全套其實防唔到性病
其實現時除咗唔發生性行為之外，無一種安全措施可以做到100%避孕，安全套亦唔會話100%防止性病傳播。但只要性行為過程中有全程正確使用安全套（可以參考：https://www.stickyricelove.com/post/__安全套），其實感染風險係好低嘅。
你所講嘅致病原穿透安全套其實正常情況下係唔會發生嘅。呢啲情況可能係因為使用嘅安全套破裂／漏，所以令到體液同黏膜組織直接接觸。 
導致安全套破損／漏嘅原因有好多，例如：打開包裝／佩戴嘅時候有尖銳嘅嘢刮損（例如指甲、牙齒）；因為潤滑不足摩擦令到安全套破損；冇擠走儲精囊嘅空氣；射精後冇㩒住安全套底部先拔出體外；安全套過期；安全套儲存不當等等。至於你擔心所使用嘅安全套會唔會已經過期，其實係任何情況之下，我哋係使用前都有責任去檢查安全套嘅包裝係咪仍然完整或者係咪未過期。呢樣嘢係無論對象係伴侶定係性工作者都應該要做嘅步驟。 
而安全套唔可以完全防止所有性病傳播係因為有啲性病嘅傳播並非只靠插入式嘅性行為。例如陰虱會寄生喺陰毛／陰部皮膚表面，即時有使用安全套，因為安全套唔可以覆蓋整個陰部嘅皮膚，所以都有機會感染。又例如疱疹、椰菜花呢啲性病會令到皮膚有破損，黏膜組織接觸到破損嘅皮膚都有機會感染。
而愛滋病除咗性行為之外，共用針筒都可以感染到。
之前都同你解釋過，有使用安全套嘅口交感染性病嘅機率係好低嘅。
你覺得下體唔舒服，可能係因為心理因素，或者清潔不當／過度清潔。之前都有同你解釋過，性工作者會比較有意識保護自己嘅健康同安全，佢地多數會購買值得信任嘅牌子嘅安全套，而亦有一啲機構會向性工作者免費提供安全套等佢哋可以試用嘅。將性工作者同性病、「污糟」呢啲嘢直接連繫其實係社會文化中對性工作者嘅污名化，而呢啲文化同社會風氣上嘅刻板印象亦會影響你點樣面對今次嘅性接觸。性工作更加唔會刻意俾過期或者已經破損嘅安全套客人使用。因為一旦有感染的話，除咗自己身體健康會受影響，亦會影響自己嘅生意，甚至有啲客人會惡意係網上散佈有關性工作者嘅謠言同個人資料，所以其實性工作者係會更加注意呢啲細節嘅。如果下次擔心對方提供嘅安全套唔適合自己，都可以考慮自己攜帶安全套，呢一點係不論性行為對象都可以做嘅。
如果你依然擔心嘅，其實你可以考慮參考之前同你講嘅測試，你可以更加清楚知道自己嘅身體情況。但都要強調返，如果你之前一直都冇進行過性病測試，而測試結果呈陽性，都唔可以証明你嘅感染一定係同呢次性接觸有關。
而你嘅測試結果呈陰性嘅話，應該就可以舒緩你緊張擔憂嘅情緒嘅。所以你可以留意下唔同機構／中心嘅測試項目，睇下邊個最適合你。 