我由細到大都係手汗多，係咪應該要考慮下手術治療，因為連渣筆都有
有女仔鐘意都吾敢拖人隻手，有咩方法吾拖手仔/講明自己有病？
Hello~ 唔怕同你分享，我都係一個多手汗嘅人，有時多到要不斷搵紙巾抹手，而每次參加一啲要有肢體接觸嘅活動嘅時候都會覺得好大壓力同好尷尬，所以我好明白你嘅困擾 
從中、西醫唔同嘅角度分析，手汗多都有好多唔同嘅原因，例如體質偏虛或濕熱、身體交感神經作用旺盛、情緒緊張等等，唔同嘅原因都有佢嘅治療方法，而部份治療方亦都有機會出現副作用，所以要改善手汗多嘅情況，就先要去睇醫生了解返確實嘅原因同埋適合邊種治療方法 
除左接受治療之外，我都可以根據我嘅個人經驗同你分享下喺日常生活中點樣調整自己嘅心態，從而減低手汗多造成嘅困擾同壓力 
首先要明白無人係完美嘅，每個人都有佢嘅缺陷，例如有啲人有近視、有啲人因為牙齒問題要箍牙咁，所以手汗多其實同近視/牙齒唔整齊一樣，都只係身體缺陷嘅其中之一，如果你唔覺得見到人戴眼鏡或者箍牙好尷尬同奇怪，咁你都唔需要因為自己手汗多而覺得難堪 
可能依個時候你會話: 就咁諗當然容易，但係當面對手汗多而又要接觸人嘅時候就好難咁輕鬆自在，的確我都曾經因為咁而刻意避免同其他人肢體接觸，但始終有啲無可避免嘅時候，而每到要接觸嘅時候所承受嘅心理壓力都令我覺得好攰，好想脫離依個情況 
所以後黎我就慢慢嘗試喺肢體接觸之前事先同對方講，我會好平常咁同對方講: 「我手汗比較多，可能久唔久要抹下汗～」 ，咁樣一方面唔洗猜測對方發現自己手汗多時嘅反應，而當我地用平常嘅語氣同對方講時，對方都會覺得依見係一件好平常嘅事，而且好多時對方口嘅反應都比我地預期中正面，就好似我過曾經試過講完之後對方表示其實佢都好多手汗，或者覺得肢體接觸時有手汗係好正常嘅事，所以好多時我地事先以自然平常嘅態度同對方講反而可以減少我地同人接觸時嘅焦慮感，而根據我個人嘅經驗，好多時當焦慮感減少嘅時候手汗多嘅情況都會有所改善
見你提到唔知點樣同心儀嘅對象表明自己手汗多嘅情況，建議你可以喺同對方建立左一定程度嘅信任同了解之後，同對方表明你手汗多嘅情況，相信只要對方係真心接納你嘅話，係唔會因為咁而影響你地嘅關係嘅