停打針後仲未嚟M

打左3個月避孕針,最後一支避孕針係1月嘅時候打,原先打針嘅原因係自己生完之後啲m血量好多咁睇醫生嘅時候同醫生講埋佢就建議我打針話可以令血量無咁多同準啲,但打完之後啲血量的確少咗但嚟嘅日子就起碼14日以上,我覺得咁樣仲煩,所以就決定唔再打針,宜家遲左4日嚟m好驚又有左,3/3試過一次無帶安全套(停針後有keep住帶除咗呢次)

你好呀 @Yankin :wave:t2: :wave:t2: :wave:t2:

都想知道你知唔知道打嘅係混合荷爾蒙避孕針定係單一荷爾蒙避孕針,如果係前者嘅話,通常一個月打一次,有效期係一個月,咁你一月嘅時候打,到依家三月已經無效,加上無用其他避孕措施,懷孕嘅風險都係比較高嘅。 :smile:

如果係單一荷爾蒙避孕針就會有三個月嘅有效期,三個月打一次,咁樣暫時嚟講藥效都仲係身體發揮緊,暫時都唔需要擔心嘅,懷孕嘅風險都比較低。 :wink:

另外,打避孕針其中一個初期嘅副作用係令經期變得唔穩定,可能會好似你咁令嚟月經嘅日子長咗或者係無預計嘅日子嚟月經,通常打單一荷爾蒙避孕針(3個月打一次個款)呢個副作用都會比較明顯,但一般係適應期之後(大概3-6個月)都會慢慢變得穩定。如果你日後都仲想繼續使用荷爾蒙式嘅避孕方法,可以考慮下食避孕藥,佢嘅調節月經功效係最明顯嘅。另外都可以考慮放置含荷爾蒙嘅子宮環,一樣可以令月經量減少,特別係如果你短期內都無再生育嘅打算的話,呢個都係唔錯嘅選擇。你可以試下再同醫生傾下,睇下會唔會可以轉第二隻避孕針(例如由混合型轉成單一型)或者試下藥物。因為每個人嘅體質都會唔一樣,有時都需要試下邊隻方法啱你身體多啲,都有好多人試咗幾次先知道邊隻啱自己架,都係好平常嘅事嚟架。 :sunglasses:

因為避孕針只係打咗3個月,身體都會相對可以比較快回復自然嘅排卵同月經週期。不過都未必咁快就回復返打針前嘅週期日子,亦即係話週期嘅日子都係有機會浮動,月經嘅日子亦可能比你預期嘅有差距。因為3/3發生過無套嘅性行為,係有一定嘅懷孕風險,你都可以係聽日11/3,姐係對上一次性行為後7日用驗孕棒驗孕,到時會有初步結果。而係15/3,即係性行為11日後,驗孕嘅結果就更準確同可信。 :wink:

已在13/3驗孕,顯示無懷孕,但一直遲遲都仲未黎M,已經遲咗9日了

正如之前所講,喺性行為7日後(11/3)驗孕已經可以得到初步結果,而11日後(15/3)驗孕就會得到較為準確嘅結果嘅。如果你13/3驗孕結果係陰性,咁就可以初步確認到你3/3發生嘅嗰次性行為冇導致懷孕。如果你依然擔心嘅,你都可以再次驗孕嘅,咁就會得到比較準確嘅結果。 :wink:

之前都有同你解釋過,打針係注射人造荷爾蒙,而你而家停咗打針,身體都需要一段時間恢復同埋適應進行荷爾蒙分泌。所以停咗針之後,可能都會有幾個月經週期唔係好穩定嘅。呢個係正常嘅,同埋每人身體狀況唔同,適應嘅時間因人而異。 :relaxed:
同埋本身月經就好容易受其他因素影響,例如荷爾蒙分泌、飲食、作息、壓力、藥物等等。你呢排會唔會休息得比較少?或者有冇食過啲咩藥物?或者可能你擔心懷孕,好緊張自己仲未有月經呢一種情緒壓力都影響緊你嘅月經週期嘅。你回想下,你未打針之前,係咪都有試過月經週期唔係次次都一樣? :nerd_face:

好明白你而家心情好緊張,好似一日未有月經出現就總會擔心住咁。如果你想再驗多一次孕去令到自己心情舒緩啲嘅,咁就可以設定一個目標俾自己,如果聽日見到驗孕結果依然係陰性,咁就要去相信呢個結果。試下放鬆心情,做下你鍾意嘅嘢,同你信任嘅人傾下計。月經會出現嘅! :smiling_face_with_three_hearts:

而正如Kaleo之前介紹過,如果你唔想再打針但又想調理下月經,你可以諮詢返醫生意見睇下可唔可以試下食避孕藥。不過都想提返你,要有心理準備適應避孕藥都需要時間(因人而異,1至6個月不等),未必食避孕藥嘅第一個/頭幾個週期就會好「準時」或者「穩定」嘅。
同埋見你都好擔心之前打針帶嚟嘅幅作用,如果你想,你可以諮詢返之前幫你打針嘅嗰位醫生,可能佢解釋完之後你都會覺得安心多啲。同埋可能佢比較了解你嘅身體狀況,你都可以向佢問吓避孕藥/子宮環呢啲避孕方式適唔適合你用。而如果你想搵下其他醫生問關於避孕措施嘅資訊,你可以去家計會/母嬰健康院/部分私家診所或醫療中心預約了解下下㗎。 :woman_health_worker:t2: :man_health_worker:t2: