我真係好煩惱

上年大概年尾嘅時候發現自己嘅下面有時會痕,因為係間中先會痕,係大概陰蒂附近有生毛嘅皮膚,我諗應該係一日可能幾次咁,所以都無咩點理過,但係沖涼嘅時候洗緊陰部嘅時候,就唔知點解會特別痕,每次都會拗到甩咗三四條陰毛,之後有一日沖涼先意識到自己啲毛少咗成一半,先覺得有啲唔對路,同埋發現自己嘅底褲起痕嘅位置特別薄,重有條薄到穿咗個窿,咁應該係都幾嚴重下?表面睇落都無生嘢,皮膚又冇咩異樣。其間都有啲黃黃地嘅分泌物,有時會有啲好似渣咁,上網查過之後諗緊會唔會係念珠菌,但係我又完全冇異味,靜係得以上兩種情況。之後我有一個月完全冇嚟m,跟住之後果幾次量都唔係太多,搞到我有啲擔心。

我平時間唔中會用花灑沖住下體嚟自慰,有時隔成個月,有時就可能一星期兩次左右,但係意識到上面嘅情況之後我就冇再咁做。我諗過會唔會係因為我過度清潔,所以就嘗試縮短沖涼時間,減少水沖住下面嘅時間,用熱水洗底褲,又多着咗鬆身嘅褲咁。我又諗緊會唔會係因為我用m巾嘅習慣唔好,之前嚟m尾嘅幾日量比較少,我有時就會懶,隔好耐先換,唔知有冇關係。總之就係我感覺上情況有好轉,雖然都係會痕。其實沐浴乳有冇影響?因為我都有停用一段時間

哩段時間有時諗起嘅時候心情都唔太好,有時會擔心,驚會唔會影響到日後嘅生育能力。我冇任何嘅性經驗,又唔知應該點算好,應唔應該睇醫生定係慢慢等下睇下會唔會慢慢好返。但係睇醫生嘅話要去邊度睇?同埋我覺得有啲難同阿媽開口講我嘅問題,我真係覺得會幾尷尬下,我唔知應該點處理好,我今年要考dse,我又諗過會唔會關壓力事。我究竟應該點做好?:cry::cry::cry:

你好呀 @Janee :wave:t2: :wave:t2:

見到你話外陰會有痕癢,再加埋分泌物有少少黃色,同埋有啲好似渣咁嘅情況,雖然完全冇臭味,但係都好有可能係陰道炎,最好都係去睇醫生啦。其實一般私家診所都已經可以處理到陰部發炎嘅問題,但如果你怕尷尬嘅話可以考慮去家計會嘅診所,26歲以下可以去青少年保健診所,唔駛家長陪同都可以去架。家計會嘅診所係專門處理同生殖健康有關嘅情況,醫生護士都會比坊間友善一啲,都可以考慮一下啊~ :laughing:

好似你咁講,緊身嘅衣物的確會令寄生喺身體嘅念珠菌增生, 引致發炎嘅情況。其實你都做得啱嘅,換番啲鬆身啲嘅衫褲,分開洗底褲,的確可以減少細菌繼續增加嘅情況。另外,雖然月經最後幾日血量會比較少,但係依然都會有汗同埋細菌積聚,因此隔一陣就要換啦。沐浴露其實就唔算好大影響嘅,除非你係用一啲比較刺激性嘅沐浴露,又或者唔小心將好大量嘅沐浴露沖入陰道裏面,基本上都唔會有咩問題。 不過平日其實用清水溫柔地清潔外陰嘅位置就足夠架啦,因為有啲沐浴露嘅pH值同陰部唔吻合,長期使用嚟清潔嘅話都有機會影響陰部嘅益生菌狀況,增加發染風險。 :relaxed:

至於M巾嘅情況,一般4小時左右都建議要換一塊,因為經血接觸空氣之後都會滋生細菌同異味,太長時間唔換到的確會增加下體唔舒服嘅風險。如果最尾幾日血量比較少,不如試下改用護墊,一來會比較透氣,亦會比較容易見到滿咗分泌物,會大啲動力去換得密啲。 :grin:

同埋見到你提及覺得很嘅時候會好大力抓陰部,有時會見到陰毛都甩埋,亦見到內褲嘅位置變得比較薄。其實陰部嘅皮膚係比其他位置嘅皮膚更加脆弱嘅,太大力去抓有時都會令皮膚變得更加脆弱,覺得更加痕。下次好痕嘅時候不如試下輕輕力拍下陰部嘅位置,代替大力抓。亦可以搽一啲成份比較天然,例如比BB搽嘅lotion係陰毛嘅皮膚位置,幫助止痕。但呢啲方法都係只可以幫你舒緩唔舒服嘅感覺,最重要都係要睇醫生檢查啊! :bangbang:

其實陰道發炎呢件事一生人之中唔多唔少都會試過,都係一件好平常嘅事,好多人都會經歷嘅,我相信你開口嘅話,屋企人都會願意去幫你架。 :wink:

見你講過話你試過成個月都唔嚟月經,好似你咁講,壓力都係影響月經週期嘅其中一個因素,仲有好多嘅,例如有冇食緊藥喇、心情上會唔會有好大波動、係咪病咗等等,當然如果你真係有疑慮嘅話,都可以喺見醫生嘅時候同佢講埋,睇下佢會有啲咩建議畀你。 :relaxed:

好啊,我會試下同屋企人講下,真係好多謝你咁認真答我,幫咗我好多,我都安心咗唔少:see_no_evil::relieved:

1個讚