應唔應該食事後丸

我係7號同8號都發生過性行為,全程有用安全套。因為今個月停咗避孕藥,又正值危險期,所以比較驚。7號事後冇check condom,見到冇明顯穿窿,男朋友亦冇射到,冇精液。8號事後男朋友話condom上面有白色乳清物,佢打咗個結捏話冇漏,白色乳清物應該係我嘅唔係精液。
*
上個月我係2月16嚟m,嚟咗7日。因為之前2個月都有食事前避孕藥,所以冇谷m亦好規律。用app計話排卵期係3月5號,所以即使有戴套我都好擔心。
*
停避孕藥嘅原因係個人食到好水腫,我係食娜迪的,所以就打算停咗今個月睇下係咪佢引致水腫。停完藥之後今個月谷返m,宜家個下腹好唔舒服令我好不安。
*
如上我應該去食事後丸嗎?

你好呀 @Ladxoxo

基本上你懷孕嘅風險都係好低嘅,唔使擔心。 :wink:

好似你咁講你全程有用安全套, 而且避孕套都冇穿到,精子入唔到陰道裏面,遇唔到卵子,所以懷孕嘅風險都好低。 :grin:

你話8號事後condom上面嘅白色乳清物,的確係女性嘅分泌物嚟嘅,係用嚟喺性行為嘅過程當中作潤滑嘅用途。 :relieved:

關於App預計既排卵期,其實一般嚟講都要等嚟咗月經我哋先會知道呢個月嘅週期係幾多日,從而大概計算返可能係邊段時期排卵。正正因為有太多因素可以影響到月經週期,所以以上個月嘅嚟M日子或者週期數字去推斷今個月嘅情況都唔會係100%準確架,所以apps只可以用嚟參考架咋。再加上你之前兩個月嘅週期都係係避孕藥嘅影響之下,用哩兩個月嘅週期日子去預計今個月無食藥嘅情況亦係無太大參考作用嘅,因為冇咗藥物來嘅人造荷爾蒙之後,身體需要時間去適應返自然排卵,月經週期嘅日子都會有比較大嘅波動。而且月經一日未來都係唔能夠推算番排卵嘅日子,亦即係話唔可以知道幾時係所謂嘅「安全期」或者「危險期」。 :sunglasses:

見你話「今個月谷返m」,我諗你之前一向都有咁嘅情況,只係喺食事前避孕藥期間情況有改善。你停咗藥之後先至再出現下腹唔舒服同埋谷m嘅情況,同你未食避孕藥之前係一樣嘅,所以都唔需要咁擔心住,再加埋你喺性行為期間全程有用安全套,懷孕嘅風險真係非常之低㗎,唔使擔心。 :grin:

如果你仍然好擔心懷孕,其實可以買驗孕棒測試一下。一般係性行為7日後(15/3)驗已經會有初步結果,而係11日後(19/3)或者預計月經日子驗結果都會更加準確。 :relaxed:

另外見到你話係因為食藥期間有水腫嘅情況所以想試下停藥睇下係咪真係藥物嘅影響。你係食藥之前有無見過醫生做檢查呢?雖然事前避孕藥唔屬於處方藥物,但因為每個牌子所含嘅荷爾蒙種類同劑量都唔一樣,亦唔係每個人嘅身體都適合食避孕藥,所以都建議可以搵醫生檢查一下先。而且出現副作用都唔代表係唔可以再食藥架,只要唔係出現比較嚴重嘅情況(例如休克、吐血、暈倒等等),都可以考慮使用其他牌子嘅藥物。好多人都要試幾次先搵到適合自己嘅藥物架~ :wink:

因為今日我問得太急,等唔切回覆,已經食咗120小時內嘅事後丸。如你所講,我未食事前避孕藥個陣就會有谷m嘅清況,經期亦不準時。食完事後丸之後,谷M嘅情況反而緩和咗:dizzy_face:覺 得好奇怪,但我宜家冇咁擔心會懷孕。睇完你詳盡嘅回覆就更加冇咁擔心:relaxed:之後我都會試其他牌子嘅事前避孕藥避孕。但我仍然有以下問題求解:

1.食完事後丸會早嚟定遲嚟m?
2. 食完事後丸嚟m嘅經期可以推算返今個月嘅排卵期?
3. 網上見到有人話如果已排卵咁食事後丸都冇用,咁事後丸到底點發揮效用?:thinking:
4. 食完事後丸好傷身係唔係真?:nauseated_face:
5. 家計會話食完120小時內嘅避孕丸,一週期內唔可以再用荷爾蒙避孕方法。
假若我今日(11/3)食咗事後丸,7日內(18/3前)嚟m。咁我就唔可以食事前避孕藥?或應該係經期5日內但事後丸7日後食?但有啲事前避孕丸係要經期第一日食,有啲係經期5日內。
到底食完事後丸要點食事前避孕藥?
6. 如果用每日量體溫嘅方法,突然高溫嘅個一日就係排卵日?
7. 2月食事前避孕藥個陣想改m期,本身7/2食完21日避孕藥,我開咗排新嘅食多咗5日,即係13/2係第一日停藥,16/2嚟m。想問下呢個情況要點先可以食下一排21日嘅藥?正常係食完一排藥7日後再開。即係經期第5日(20/2)食?但盒又話第1日食:persevere:完全唔知點開排新:pleading_face:

經過今次之後我發現對自己身體嘅運作有好多疑問:face_with_raised_eyebrow:到底有咩途徑比我更認識子宮同避孕?

食事後丸其中一個副作用係會影響當次月經週期之內嘅月經,但無特別規律話一定會早咗或遲咗,而且除咗日子,月經量同血嘅狀況(例如顏色或者質地)都有機會因為食過事後丸而有變化架。 :persevere:

呢兩個問題連埋一齊答:事後丸係含有高劑量人造荷爾蒙,透過唔同嘅途徑去得知緊急避孕,包括:抑制排卵、增加子宮頸黏液分泌令精子難以通過、改變子宮腔環境令受精卵難以著床。好多時事後丸都會包含以上一種或以上嘅功效,所以即使已經排咗卵,只要係指定時間之內按照醫生指示服用都仍然可以做到緊急避孕。同一時間,因為我哋未必單憑藥盒就會清楚知道內含邊隻荷爾蒙,亦可能知道到底身體排左卵未,所以有需要食事後丸嘅時候一定要先得到醫生嘅意見同處方。否則假如已經排咗卵,但自行食咗只能夠做到抑制排卵嘅藥物,咁就失去咗功效架啦。 :confounded:

另一方面,其實即時無食事後丸我哋都好難透過日子計算到排卵嘅日子嘅,一般嚟講除非你係醫生嘅指引下每日使用排卵棒+量體溫測試,否則都好難準確知道幾時係排卵期。同一時間事後丸內嘅荷爾蒙可以令身體以為已經排咗卵,你可能會好奇如果身體無自然排卵咁點解之後又會有月經。其實係因為內含嘅荷爾蒙仲可以令子宮內壁少量增厚,再導致脫落,形成好似月經嘅狀態,但其實佢嘅學名係「撤退性出血」。亦因為係咁樣,係食藥之後見到月經嘅時候其實我哋都唔能夠確定到底係【因為抑制咗排卵而出現嘅撤退性出血】,定係【身體已經排卵但藥物阻止咗受精後再係荷爾蒙刺激下出現嘅月經】,亦變相無辦法原來推算返呢個月嘅排卵期。 :x:

如果只係單次作緊急避孕用途的話基本上對身體無咩傷害嘅。除非係長期每個月都服用事後丸,甚至當長期避孕工具咁去使用,咁就會令體內嘅荷爾蒙水平受到比較大嘅影響。長期服用有機會令子宮內壁變薄,令受精卵難以著床,會需要停藥休養一段時間後身體先會回復自然排卵同比較可以順利受孕。所以記住事後丸只可以當作緊急使用,要避免每個週期都用啦。 :x:

第5條同第7條喺到一齊答你!正如之前Kaleo所講,我地建議食避孕藥之前要睇醫生嘅。雖然藥房都可以買到避孕藥,但市面上有唔同種類嘅避孕藥,當中嘅荷爾蒙成份同劑量唔同嘅。而且唔係每個人嘅身體狀況都適合食避孕藥嘅,例如有心臟、肝功能、免疫系統問題嘅人,就未必可以食避孕藥。所以我地建議第一次食避孕藥之前要見下醫生,等醫生評估下你嘅身體狀況,確認你係咪適合食,同埋適合食邊一款避孕藥。服用一段時間後,就算身體無咩特別反應,我地都會建議每年睇一次醫生,睇下自己係咪仲適合繼續服用。現時家計會診所、母嬰健康院、部分私家診所/醫療中心都有呢項服務㗎。 :woman_health_worker:t2: :man_health_worker:t2:

而你今次去咗家計會進行緊急避孕,你可以等到月經出現之後再預約時間上去見醫生。通常家計會會叫你月經開始5日內開始食藥,而且會好詳盡咁教你點樣食藥嘅。加上你係係家計會處方事後丸,佢哋嘅醫生都會更了解你嘅身體狀況去建議你啱食嘅避孕藥牌子。而且藥物嘅價錢亦比坊間平大概一半,又會有覆診同跟進服務,有咩事都可以返去再見醫生。如果係俾28粒裝嘅藥,就每日食一粒,唔需要停藥嘅,通常食到安慰劑嘅時候會月經;如果係俾21粒裝,就要每日一粒,然後停藥7日,停藥期間月經會出現,7日後無論月經係咪完,都要開新一排藥。

見你話之前因為水腫所以停咗食藥,如果下次醫生俾你嘅藥都令你水腫,就唔好自行停藥。避孕藥其中一種副作用係導致水腫,但當身體適應咗藥呢啲副作用就會消退。每人身體狀況唔同對避孕藥嘅適應時間未必一樣,適應時間1至6個月不等。如果你出現副作用,你可以俾身體一段時間去適應下藥物;如果副作用持續,而且情況比較嚴重,咁你就可以話比醫生知,睇下需唔需要轉食另一款藥。有啲人可能要試幾款先搵到啱自己嘅避孕藥嘅。同埋下次如果想用藥物嚟改變月經日子,都可以考慮尋求醫生嘅指引,會話俾你知要食到邊一日再停藥,同埋下次點樣再開新一pack藥食,咁就唔使事後先心思思啦~ :wink:

就好似上面咁講,除非你係醫生嘅指引下每日使用排卵棒+量體溫測試,否則都好難準確知道幾時係排卵期。因為有太多因素會影響到我哋嘅體溫,所以單憑量度體溫去計算排卵期都係唔夠準確架。而且好多時亦要量度一段時間後先至知道自己平均嘅體溫係幾多,再去判斷到底幾時為之「高咗」,並唔係話高過幾多度就一定係排卵嘅。 :blush:

的確我地平時比較少途徑去了解關於月經、避孕等等知識,但我地對於身體有好多嘅擔憂同埋疑問係好正常嘅!如果想了解多啲相關知識嘅話,其實可以留意下唔同社交平台嘅資訊,例如我哋嘅ig page會不定期有相關嘅知識發佈,有post都係同避孕相關嘅 :nerd_face:https://www.instagram.com/stickyricelove/?hl=zh-hk ),而嚟緊都會有新post更加詳盡深入地去介紹避孕藥等唔同避孕方法,你可以留意下~同埋我地嚟緊都會有啲網上小組工作坊,其中有一節會介紹身體部位同性器官嘅、都有一節會介紹唔同嘅安全措施,同埋收集大家關於呢啲話題嘅疑問,解答一啲常見問題,你有興趣都好歡迎你參加 :smiling_face_with_three_hearts:,我地會喺ig到發佈消息嘅。

仲有一啲其他ig page都會介紹安全措施,破解一啲關於身體嘅迷思,你可以去留意下。

而家計會網站到都有好多相關資訊,你可以望下:https://www.famplan.org.hk/zh

希望呢啲資源可以解答到你嘅問題,如果你仲有其他疑問,好歡迎你隨時同我地講,我地會盡力解答㗎! :sparkling_heart:

多謝你哋詳細解答咗我咁多疑問呀:smiling_face_with_three_hearts:Thank you​:pray:t2:

1個讚