避孕藥一問🙇🏼‍♀️

只從食左避孕藥之後,覺得情緒起伏好大,脾氣都暴躁左,夜晚自己一個仲會亂諗喺度喊,請問係咪有關係

Hello,首先想問下你食咗避孕藥幾耐呀?食避孕藥之前有冇睇過醫生先開始食呀? :face_with_monocle:

雖然藥房都可以買到避孕藥,但市面上有唔同種類嘅避孕藥,當中嘅荷爾蒙成份同劑量唔同嘅。而且唔係每個人嘅身體狀況都適合食避孕藥嘅,例如有心臟、肝功能、免疫系統問題嘅人,就未必可以食避孕藥。所以我地建議第一次食避孕藥之前要見下醫生,等醫生評估下你嘅身體狀況,確認你係咪適合食,同埋適合食邊一款避孕藥。服用一段時間後,就算身體無咩特別反應,我地都會建議每年睇一次醫生,睇下自己係咪仲適合繼續服用。現時家計會診所、母嬰健康院、部分私家診所/醫療中心都有呢項服務㗎,你有需要就去預約諮詢下醫生意見啦。 :woman_health_worker:t2: :man_health_worker:t2:

避孕藥當中含有人造荷爾蒙,服用之後其中一種可能出現嘅副作用係情緒波動/有明顯起伏,或者情緒抑鬱。 :persevere:不過副作用嘅情況因人而異。通常身體適應咗藥物之後,就會建立咗穩定嘅避孕功效,同埋副作用都會消退。而適應藥物嘅時間通常為1至6個月不等,都係會因人而異嘅。但如果你覺得副作用情況比較嚴重,就算過咗幾個月都未有好轉,咁就要詢問下醫生,睇下需唔需要轉食另一款藥。有好多人都係換過幾隻藥先搵到自己覺得合適嘅牌子,所以現階段都唔需要覺得灰心或者想放棄避孕藥住架~ :wink:

不過情緒呢樣嘢除咗藥物之外都可能有其他因素影響嘅。你最近會唔會有其他嘢令你壓力大?或者會唔會呢排休息得唔好?有比較多令你心煩嘅事?如果發生咗咩令你困擾嘅事,你可以同信任嘅人講;又或者如果你願意話俾我地知嘅話,我地都會盡力幫你嘅! :blush:

呢排你可以嘗試做啲令你放鬆嘅嘢,或者你感興趣嘅事。試下同朋友/家人/信任嘅人傾下計,去下街。同時俾身體啲時間再去適應下隻藥,睇下情況會唔會好啲。

就算唔食藥,可能我地間唔中都會有情緒低落/起伏大嘅時候,想話比你知呢啲情緒並唔可怕,最緊要係要我地搵到適合自己嘅方法去梳理/釋放呢啲情緒。 :smiling_face_with_three_hearts:

但如果情況長時間持續甚至加劇,咁就要去尋求醫生或者其他專業人士嘅幫助啦。

1個讚