我已經食左YAZ避孕丸3個月左右
其實係唔係唔使再理安唔安全期? 定安全期做愛會安全D?
Hello，首先想問下你食避孕藥之前有冇睇過醫生先呀？同埋你所講嘅「安全」係指咩？意外懷孕風險？定係性病等感染嘅風險？ 
雖然藥房都可以買到避孕藥，但市面上除咗YAZ之外，都仲有好多唔同種類嘅避孕藥，當中嘅荷爾蒙成份同劑量唔同嘅。而且唔係每個人嘅身體狀況都適合食避孕藥嘅，例如有心臟、肝功能、免疫系統問題嘅人，就未必可以食避孕藥。所以我地建議第一次食避孕藥之前要見下醫生，等醫生評估下你嘅身體狀況，確認你係咪適合食，同埋適合食邊一款避孕藥。服用一段時間後，就算身體無咩特別反應，我地都會建議每年睇一次醫生，睇下自己係咪仲適合繼續服用。現時家計會診所、母嬰健康院、部分私家診所／醫療中心都有呢項服務㗎，你有需要就去預約諮詢下醫生意見啦。 
避孕藥含有人造荷爾蒙，可以抑制卵巢排卵，因此達至避孕效果。同埋避孕藥會令子宮內膜產生變化，使受精卵無法著床；仲會增加子宮頸分泌物的黏稠度，使精子難以穿過黏液，進入子宮腔內。所以正確服食藥物一段時間，冇漏食，亦都冇嘔到／腹瀉呢啲身體狀況出現，咁身體適應咗避孕藥之後會建立到穩定嘅避孕效果。你已經食咗藥3個月，身體應該已經有比較穩定嘅避孕功效，所以懷孕風險好低。但避孕藥唔能夠防止性病嘅傳播或者其他因為性行為引起嘅感染（例如念珠菌感染、陰道細菌感染等），如果你擔心嘅話，都可以喺發生性行為嘅時候用埋安全套，咁就會多一份保護啦。關於正確使用安全套嘅資訊，可以參考：https://www.stickyricelove.com/post/__安全套
而你所講嘅「安全期」，係指冇用荷爾蒙避孕方法嘅情況下，通過避開排卵期前後嘅日期發生性行為，從而避免懷孕。但並唔建議使用。因為排卵、月經呢啲生理現象好容易受到其他因素影響，例如荷爾蒙分泌、飲食、作息、壓力、藥物等等。而且每一次嘅排卵期都要等月經出現之後，先可以推算出上一次嘅排卵日係邊一日。所以除非每日用排卵試紙測試，否則我地係唔可以好準確咁去知道究竟邊一日排卵。一啲App嘅紀錄只能夠係一個大概嘅參考，唔可以準確嘅肯定排卵期係幾時。所以所謂嘅「安全期」嘅避孕成功率並唔係好高，唔建議使用。 
當服用避孕藥之後，排卵被抑制，每次嘅月經只係子宮內膜喺荷爾蒙影響下增厚同脫落嘅結果，並冇卵子。所以亦都冇所謂嘅「安全期」。所以冇話邊一日嘅懷孕風險會低啲，只要有正確服藥，每日都一樣有好高避孕成功率嘅。 
SORRY～我問得唔好 
我係想問意外懷孕風險～
我每日都定時食藥的
咁係咪照常做愛都可以？唔需要理會邊日係安全期咁？
根據研究數據，第一年使用口服避孕藥嘅避孕成功率係99.7%（perfect use，完全正確使用），及91%（typical use，一般使用） 。如果依足說明書指引，每日都有定時服藥，意外懷孕嘅風險係好低啊 
無錯啊，只要一直有按指示定時持續服藥，就無需要再擔心幾時係安全期，因為你嘅身體已經係會因為避孕藥藥效嘅緣故，而抑制左排卵同埋令精子難以同卵子結合及著床，抑制排卵後服用避孕藥期間係唔會有「排卵日」。如果有持續穩定咁服藥，其實每一日都係你嘅「安全期」啊
所以有好好按指示服藥就無需太擔心啊！！ 
（一般需要停藥後第一個月經週期先會恢復排卵）