會唔會有病㗎?

想知道如果男朋友手指淨係摸過陰唇個位 而佢手上都好似冇好大/明顯嘅傷口 會唔會中啲咩病 好擔憂 自己同男朋友都係處 但都怕有風險 唔該曬你地解答我嘅問題:pray:t2:真係麻煩曬了

補充返少少 到而家下面都冇乜異樣 但仲係好擔心⋯⋯⋯⋯⋯ 因為都只係上個禮拜嘅事嚟

如果你係擔心有性病感染嘅話,可以同你介紹返性病嘅傳播途徑先。性病嘅傳播途經有:血液、精液、陰道分泌等體液交換;有損傷的皮膚、眼睛、口腔和鼻腔等黏膜交換。所以冇使用安全套嘅口交、陰道交或者肛交係比較高風險嘅性行為。但你當日只係手交,而對方嘅手係冇開放性傷口(流緊血/有破損),而且只係接觸到陰唇,咁手交嘅過程都係好低風險嘅。所以你呢一次嘅性接觸感染性病嘅風險好低微,唔需要擔心。 :blush:

除咗性病之外,都有其他病係有機會因為性接觸而導致嘅,例如尿道感染、陰道細菌感染、念珠菌感染等等,可能係因為清潔不足(例如手指/指甲/陰部冇好好清潔,有機會會有細菌),而係性接觸嘅時候接觸到陰道口或者尿道口,咁就會有感染發炎嘅風險。不過如果你今次都只係接觸到陰唇,而且過咗幾日暫時無唔舒服嘅感覺,咁應該感染風險都好低嘅。 :relaxed:

如果你擔心嘅話,下次再發生性接觸之前,記得你同伴侶都要做好清潔。同埋即時你地唔係發生陰道插入式嘅性行為,都可以使用安全套/口交膜/指套呢啲阻隔式嘅安全措施,咁就可以更加安心啦!發生完性接觸之後,你可以去小便,從而減低尿道感染嘅風險。 :wink:

關於正確使用安全套,可以參考:https://www.stickyricelove.com/post/__安全套

關於其他阻隔式安全措施用品,可以參考:https://www.stickyricelove.com/post/口交膜及指套

與此同時,你同伴侶平時都要注重個人清潔,每日用溫和嘅暖水溫柔地清潔陰部(要注意清潔大小陰唇之間,同埋要反包皮清潔),咁就可以避免性器官因為清潔不當/過份清潔而感到唔舒服。 :sparkling_heart:

你亦都可以考慮同伴侶接種hpv疫苗,咁樣就會更加多一份保護。(不過要注意嘅係注射疫苗之後,並唔可以防禦所有嘅性病或其他感染,如果你想更加安全,就仍然需要使用安全套)疫苗相關資料可以參考:https://www.hpv.com.hk/